ನವದೆಹಲಿ: ಭಾರತೀಯ ಜೀವ ವಿಮಾ ನಿಗಮದ (ಎಲ್ಐಸಿ) ಆರಂಭಿಕ ಷೇರು ಮಾರಾಟ (ಐಪಿಒ) ಪ್ರಕ್ರಿಯೆ ಬುಧವಾರ ಆರಂಭವಾಗಿದ್ದು, ಮೊದಲ ದಿನವೇ 5,627 ಕೋಟಿ ರೂ. ಬಿಡ್ ಸಲ್ಲಿಕೆ ಆಗಿದೆ. ಸಂಜೆ 5ರವರೆಗೆ 10 ಕೋಟಿ ಈಕ್ವಿಟಿ ಷೇರುಗಳಿಗೆ ಬೇಡಿಕೆ ಸಲ್ಲಿಕೆ ಆಗಿದ್ದು, ಏಳು ತಾಸಿನಲ್ಲಿ ಶೇ. 67ರಷ್ಟು ಗ್ರಾಹಕರು ಷೇರು ಕೊಳ್ಳಲು ಆಸಕ್ತಿ ತೋರಿದರು.
ರಿಟೇಲ್ ಹೂಡಿಕೆ ವಿಭಾಗದಲ್ಲಿ ಶೇ. 0.55, ಸಾಂಸ್ಥಿಕೇತರ ಹೂಡಿಕೆಯಲ್ಲಿ ಶೇ. 0.33, ಎಲ್ಐಸಿ ಉದ್ಯೋಗಿಗಳ ಕೊಟಾದಲ್ಲಿ ಶೇ. 1.02 ಮತ್ತು ಪಾಲಿಸಿದಾರರ ಕೋಟಾದಲ್ಲಿ ಶೇ. 1.82 ಬಿಡ್ಗಳು ಸಲ್ಲಿಕೆ ಆಗಿವೆ. ಬೇಡಿಕೆ ಹೆಚ್ಚಿರುವ ಕಾರಣ ಶನಿವಾರವೂ (ಮೇ 7) ಷೇರು ಖರೀದಿಗೆ ಬಿಡ್ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ. ಮೇ 9ಕ್ಕೆ ಐಪಿಒ ಬಿಡ್ ಕೊನೆಗೊಳ್ಳಲಿದೆ. ಪ್ರತಿ ಷೇರಿಗೆ 902ರಿಂದ 949 ರೂಪಾಯಿ ಒಳಗೆ ದರ ನಿಗದಿ ಮಾಡಲಾಗಿದ್ದು, 22.14 ಕೋಟಿ ಷೇರುಗಳನ್ನು (ಶೇ. 3.5) ಮಾರಾಟ ಮಾಡಲು ಸರ್ಕಾರ ಉದ್ದೇಶಿಸಿದೆ. ಈ ಮೂಲಕ 21 ಸಾವಿರ ಕೋಟಿ ರೂಪಾಯಿ ಹೂಡಿಕೆ ಸಂಗ್ರಹಿಸುವ ಗುರಿ ಇರಿಸಿಕೊಂಡಿದೆ. ಎಲ್ಐಸಿ ಉದ್ಯೋಗಿಗಳಿಗೆ ಪ್ರತಿ ಷೇರಿನಲ್ಲಿ 45 ರೂ. ಮತ್ತು ಪಾಲಿಸಿದಾರರಿಗೆ 60 ರೂ. ರಿಯಾಯಿತಿ ಇದೆ.