ಚೆನ್ನೈ: ಸೌತ್ ಸಿನಿಮಾ ಇಂಡಸ್ಟ್ರಿಯಲ್ಲಿ ಲೇಡಿ ಸೂಪರ್ಸ್ಟಾರ್ ಯಾರೆಂದರೆ ನಯನತಾರಾ(Nayanthara) ಎಂದು ಹೇಳುವ ಅವಶ್ಯಕತೆ ಇಲ್ಲ. ಅಂತಹ ಸೌಂದರ್ಯ ಮತ್ತು ನಟನೆಯಿಂದ ತಮ್ಮದೇ ಅಭಿಮಾನಿ ಬಳಗವನ್ನು ಹೊಂದಿದ್ದಾರೆ ಈ ನಟಿ. ದಕ್ಷಿಣದ ಎಲ್ಲಾ ಭಾಷೆಗಳಲ್ಲಿ ನಟಿಸಿ ಸೈ ಎನ್ನಿಸಿಕೊಂಡು ಇತ್ತೀಚೆಗೆ ಬಾಲಿವುಡ್ಗೆ ಎಂಟ್ರಿ ಕೊಟ್ಟು ಅಲ್ಲಿಯೂ ಕಮಾಲ್ ಮಾಡಿರುವ ನಟಿ ನಯನತಾರಾ ಸಿನಿಮಾ ಜಗತ್ತಿಗೆ ಕಾಲಿಟ್ಟು ದಶಕಗಳೇ ಕಳೆದರೂ ಈಗಲೂ ಅದೇ ಸೌಂದರ್ಯವನ್ನು ಉಳಿಸಿಕೊಂಡು ಸತತ ಆಫರ್ಗಳನ್ನು ಪಡೆಯುತ್ತಿದ್ದಾರೆ.
ಎಷ್ಟೇ ವಿವಾದಗಳಲ್ಲಿ ಸಿಲುಕಿದರೂ ಕುಗ್ಗದೆ ನಯನತಾರಾ ತಮ್ಮ ಸಿನಿಮಾಗಳ ಮೂಲಕ ಸವಾಲ್ ನೀಡುವಂತೆ ಮುಂದುವರಿಯುತ್ತಾರೆ. ಅಂದ್ಹಾಗೆ ನಯನತಾರಾ ಅವರು ವೃತ್ತಿಜೀವನವು ಮೊದಲು ಕೇರಳದ ಟಿವಿ ಚಾನೆಲ್ನಲ್ಲಿ ಸಣ್ಣ ಕಾರ್ಯಕ್ರಮ ನಿರೂಪಕರಾಗಿ ಪ್ರಾರಂಭವಾಯಿತು ಎನ್ನಲಾಗಿದೆ. ಅದಕ್ಕೆ ಪೂರಕವೆಂಬಂತೆ ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ನಿರೂಪಕರಾಗಿ ಕೆಲಸ ಮಾಡಿರುವ ಕ್ಲಿಪ್ ವೈರಲ್ ಆಗುತ್ತಿದೆ.
ಆ ಕ್ಲಿಪ್ನಲ್ಲಿನ ನಯನತಾರಾ ಅವರನ್ನು ನೋಡಿ ಇಂದಿನ ಲೇಡಿ ಸೂಪರ್ಸ್ಟಾರ್ ನಯನತಾರಾ ಅವರನ್ನು ಕಂಡ ನೆಟ್ಟಿಗರು ಆಶ್ಚರ್ಯ ಪಡುತ್ತಿದ್ದಾರೆ. ನಟಿಯರು ಸಿನಿಮಾ ಮಾಡುವುದು ಹೆಚ್ಚಾದಂತೆ ಅವರ ಲುಕ್ ಕೂಡ ಬದಲಾಗುತ್ತಿರುತ್ತದೆ. ಅಭಿಮಾನಿಗಳು ನಟಿಮಣಿಯರ ಈ ಬದಲಾವಣೆಗೆ ಸರ್ಜರಿಯೇ ಕಾರಣ ಎಂದು ಹೇಳುತ್ತಾರೆ. ಹಾಗೆಯೇ ನಯನತಾರಾ ಕೂಡ ಸರ್ಜರಿ ಮಾಡಿಸಿಕೊಂಡಿದ್ದಾರೆ ಎಂಬು ಗುಮಾನಿ ಹರಿದಾಡುತಿತ್ತು. ಸದ್ಯ ಈ ವಿಷಯಕ್ಕೆ ಸಂಬಂಧಿಸಿದಂತೆ ನಟಿ ನಯನತಾರಾ ಖುದ್ದು ಸ್ಪಷ್ಟನೆ ನೀಡಿದ್ದಾರೆ.
ನನ್ನ ಮುಖದಲ್ಲಿನ ಬದಲಾವಣೆ ಕಂಡು ಎಷ್ಟೋ ಮಂದಿ ನಾನು ಸರ್ಜರಿ ಮಾಡಿಸಿಕೊಂಡಿದ್ದೇನೆ ಎಂದುಕೊಂಡಿದ್ದಾರೆ. ಆನ್ ದಿ ರೆಕಾರ್ಡ್ ಹೇಳುತ್ತಿದ್ದೇನೆ ಅದು ನಿಜವಲ್ಲ ಎಂದು ಹೇಳಿದ್ದಾರೆ. ನನ್ನ ಮೊದಲು ಕಾಣುತ್ತಿದ್ದಕ್ಕೂ ಈಗ ಕಾಣುತ್ತಿರುವುದಕ್ಕೂ ಬದಲಾವಣೆ ಇದೆ ನಿಜ. ಆದರೆ ಇದು ಸರ್ಜರಿಯಿಂದ ಬದಲಾಗಿಲ್ಲ. ನನ್ನ ಈಗಿನ ಬದಲಾಗಿರುವ ಲುಕ್ಗೆ ನಾನು ಫಾಲೋ ಮಾಡುತ್ತಿರುವ ಡಯಟ್ ಕಾರಣವಾಗಿದೆ. ನನ್ನ ತೂಕದಲ್ಲಿನ ಏರಿಳಿತದಿಂದಾಗಿ ಮುಖದಲ್ಲಿ ಬದಲಾವಣೆ ಉಂಟಾಗಿದೆ. ಬೇಕಿದ್ದರೆ ನೀವು ನನ್ನ ಕೆನ್ನೆಯನ್ನು ಪಿಂಚ್ ಮಾಡಿ ನೋಡಿ, ಇಲ್ಲವಾದರೆ ಬರ್ನ್ ಮಾಡಿ. ಅಲ್ಲಿ ನಿಮಗೆ ಪ್ಲಾಸ್ಟಿಕ್ ಸಿಗುವುದಿಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ. ನಯನತಾರಾ ಕೊನೆಯದಾಗಿ ಅನ್ನಪೂರ್ಣಿ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಅವರ ಬಳಿ ಸಾಲು ಸಾಲು ಸಿನಿಮಾಗಳಿದ್ದು ಮೂಕುತಿ ಅಮ್ಮನ್ 2, ಥಾನಿ ಒರುವನ್ ಸಿನಿಮಾಗಳು ಅಭಿಮಾನಿಗಳಲ್ಲಿ ನಿರೀಕ್ಷೆಯನ್ನು ಹುಟ್ಟುಹಾಕಿವೆ. (ಏಜೆನ್ಸೀಸ್)