Facebook Live: ಕೇರಳದ ಪುನಲೂರು ಬಳಿಯ ಕೂತನಡಿಯಲ್ಲಿ 39 ವರ್ಷದ ಮಹಿಳೆಯನ್ನು ಆತನ ಗಂಡನೇ ಕೊಲೆ ಮಾಡಿ, ಫೇಸ್ಬುಕ್ ಲೈವ್ನಲ್ಲಿ ಕೊಲೆ ಮಾಡಿರುವುದಾಗಿ ತಿಳಿಸಿರುವ ಆಘಾತಕಾರಿ ಘಟನೆ ಸೋಮವಾರ (ಸೆಪ್ಟೆಂಬರ್ 22) ನಡೆದಿದೆ.
ಕೊಲ್ಲಂನ ಕೂತನಾಡಿ ನಿವಾಸಿ ಶಾಲಿನಿ ಮೃತ ಮಹಿಳೆ ಎಂದು ಗುರುತಿಸಲಾಗಿದೆ. ಎಫ್ಐಆರ್ ಪ್ರಕಾರ, ದಂಪತಿಗಳ ನಡುವೆ ಹಲವಾರು ಸಮಸ್ಯೆಗಳಿದ್ದವು. ಇನ್ನು ಬೆಳಿಗ್ಗೆ 6.30 ರ ಸುಮಾರಿಗೆ, ಶಾಲಿನಿ ಸ್ನಾನ ಮಾಡಲು ಅಡುಗೆಮನೆಯ ಹಿಂಭಾಗದಲ್ಲಿರುವ ಪೈಪ್ಲೈನ್ ಬಳಿ ಹೋದಾಗ, ಆಕೆಯ ಪತಿ ಚಾಕುವಿನಿಂದ ಹಲ್ಲೆ ನಡೆಸಿದ್ದು, ಆಕೆಯ ಕುತ್ತಿಗೆ, ಬೆನ್ನು ಮತ್ತು ಎದೆಯ ಭಾಗದಲ್ಲಿ ಗಂಭೀರ ಗಾಯಗಳಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಆರೋಪಿ ಕೊಲೆ ಮಾಡಿದ ನಂತರ ಫೇಸ್ಬುಕ್ ಲೈವ್ ಬಂದಿದ್ದು, ತನ್ನ ಹೆಂಡತಿ ಬಗ್ಗೆ ಅಪನಂಬಿಕೆ ಮತ್ತು ಆಭರಣಗಳ ದುರುಪಯೋಗ ಮಾಡಿದ್ದರಿಂದ ನಾನು ಕೊಲೆ ಮಾಡಿದ್ದೇನೆ ಎಂದು ಒಪ್ಪಿಕೊಂಡಿದ್ದಾನೆ. ತದನಂತರ ಕೊಲ್ಲಂ ಪೊಲೀಸ್ ಠಾಣೆಗೆ ಹೋಗಿದ್ದು, ತನ್ನ ಹೆಂಡತಿಯನ್ನು ಕೊಲೆ ಮಾಡಿರುವುದಾಗಿ ತಪ್ಪೊಪ್ಪಿಕೊಂಡಿದ್ದಾನೆ.
ವಿಷಯ ತಿಳಿದ ನಂತರ ಪೊಲೀಸರು ಮನೆ ತಲುಪಿದ್ದು, ಶಾಲಿನಿ ಮೃತಪಟ್ಟಿರುವುದನ್ನು ನೋಡಿದ್ದಾರೆ. ನಂತರ ಮೃತ ದೇಹವನ್ನುಮರಣೋತ್ತರ ಪರೀಕ್ಷೆಗೆ ಆಸ್ಪತ್ರೆಗೆ ಸಾಗಿಸಿರುವುದಾಗಿ ಪೊಲೀಸ್ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ದಂಪತಿಯ 19 ವರ್ಷದ ಮಗ ನೀಡಿದ ದೂರಿನ ಆಧಾರದ ಮೇಲೆ ಆರೋಪಿಯನ್ನು ಐಪಿಸಿ ಸೆಕ್ಸನ್ 103(1) ಕೊಲೆ ಪ್ರಕರಣದಲ್ಲಿ ಬಂಧಿಸಿದ್ದು, ಕೊಲೆ ನಡೆದ ಮನೆಯನ್ನು ವಿಧಿವಿಜ್ಞಾನ ತಂಡ ಪರಿಶೀಲಿಸುತ್ತಿದೆ. ಹಾಗೆ ಶಾಲಿನಿ ಹಾಗೂ ಆರೋಪಿ ಇವರಿಬ್ಬರ ಮೊಬೈಲ್ನ್ನು ವಶಪಡಿಸಿಕೊಂಡು ತನಿಖೆ ನಡೆಸುತ್ತಿದ್ದೇವೆ ಎಂದು ತಿಳಿಸಿದ್ದಾರೆ. (ಏಜೆನ್ಸೀಸ್)