ಬೆಂಗಳೂರು:
ಖರೀದಿ ಹಾಲಿನ ದರ ಕಡಿಮೆ ಮಾಡುತ್ತಿರುವ ಹಾಲು ಒಕ್ಕೂಟಗಳ ಬಗ್ಗೆ ಹಾಲು ಉತ್ಪಾದಕರು ತೀವ್ರ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
ದಕ್ಷಿಣ ಕನ್ನಡ ಹಾಲು ಒಕ್ಕೂಟವನ್ನು ಹೊರತುಪಡಿಸಿ ಬಹುತೇಕ ಎಲ್ಲಾ ಹಾಲು ಒಕ್ಕೂಟಗಳು ಪ್ರತಿ ಲೀಟರ್ಗೆ 1 ರಿಂದ 2 ರೂ ಕಡಿಮೆ ಮಾಡಿವೆ. ಬರಗಾಲದ ಸಂದರ್ಭದಲ್ಲಿ ರೈತರ ನೆರವಿಗೆ ನಿಲ್ಲಬೇಕಾದ ಒಕ್ಕೂಟಗಳು ಬೆಲೆ ಇಳಿಸಿ ರೈತರಿಗೆ ಇನ್ನಷ್ಟು ಕಷ್ಟದಲ್ಲಿ ಸಿಲುಕುವಂತೆ ಮಾಡುತ್ತಿವೆ ಎನ್ನುವುದು ಆಕ್ರೋಶಕ್ಕೆ ಕಾರಣ.
ಕಾಂಗ್ರೆಸ್ ಸರ್ಕಾರ ಅಧಿಕಾರಕ್ಕೆ ಬಂದ ಸಂದರ್ಭದಲ್ಲಿ ಪ್ರತಿ ಲೀಟರ್ಗೆ 3 ರೂ ಹೆಚ್ಚಳ ಮಾಡಲು ಒಪ್ಪಿಗೆ ನೀಡಿದ್ದ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಅಷ್ಟೂ ಹಣವನ್ನು ಹಾಲು ಉತ್ಪಾದಕರಿಗೆ ವರ್ಗಾಯಿಸಬೇಕು ಎಂದು ಕಟ್ಟು ನಿಟ್ಟಿನ ಸೂಚನೆ ನೀಡಿದ್ದರು. ಆಡಳಿತಾತ್ಮಕ ವೆಚ್ಚವನ್ನು ತಗ್ಗಿಸಿಕೊಳ್ಳುವ ಮೂಲಕ ರೈತರಿಗೆ ಹೊರೆಯಾಗದಂತೆ ಕೆಎಂಎ್ ಕಾರ್ಯ ನಿರ್ವಹಿಸಬೇಕು ಎಂದು ಕಿವಿ ಮಾತು ಹೇಳಿದ್ದರು. ಆದರೆ, ಇದ್ಯಾವುದೂ ಜಾರಿಗೆ ತರಲು ಯಾವ ಒಕ್ಕೂಟಗಳು ಆಸಕ್ತಿ ವಹಿಸುತ್ತಿಲ್ಲ ಎನ್ನುವುದು ಹಾಲು ಉತ್ಪಾದಕರ ದೂರು.
ಹಾಲಿನ ದರ ಹೆಚ್ಚಳ ಮಾಡುವ ಪೂರ್ಣ ಅಧಿಕಾರವನ್ನು ನಮಗೆ ನೀಡಬೇಕು. ಮಧ್ಯದಲ್ಲಿ ಸರ್ಕಾರ ಮೂಗು ತೂರಿಸಬಾರದು ಎಂದು ವಾದಿಸುವ ಕೆಎಂಎ್, ಒಕ್ಕೂಟಗಳಲ್ಲಿ ದಿಢೀರ್ ಹಾಲಿನ ಬೆಲೆ ಇಳಿಕೆ ಮಾಡಿದಾಗ ಯಾಕೆ ಮಧ್ಯ ಪ್ರವೇಶ ಮಾಡುವುದಿಲ್ಲ ಎನ್ನುವುದು ಉತ್ಪಾದಕರ ಪ್ರಶ್ನೆ.
ರಾಜ್ಯದಲ್ಲಿ ತೀವ್ರ ಬರಗಾಲ ಇರುವುದರಿಂದ ಈ ಬಾರಿಯಾದರೂ ಹಾಲು ಒಕ್ಕೂಟಗಳಲ್ಲಿ ಖರೀದಿ ದರವನ್ನು ಇಳಿಕೆ ಮಾಡಬಾರದು ಎಂದು ಸರ್ಕಾರ ಕೆಎಂಎ್ಗೆ ಸೂಚಿಸಬೇಕು ಎಂದು ರೈತರು ಒತ್ತಾಯಿಸಿದ್ದಾರೆ.