ನ್ಯೂಯಾರ್ಕ್: ಕರೊನಾ ಸೋಂಕಿತರಲ್ಲಿ ಮಧುಮೇಹಿಗಳಿದ್ದರೆ, ಹೃದ್ರೋಗಿಗಳಿದ್ದರೆ ರಿಸ್ಕ್ ಜಾಸ್ತಿ ಎಂಬ ವಿಷಯ ಈಗಾಗಲೇ ಬಹಳ ಸುದ್ದಿಯಾಗಿದೆ. ಜತೆಗೆ ಇದೀಗ ಕರೊನಾದಿಂದ ದೇಹದ ಪ್ರಮುಖ ಅಂಗವೊಂದಕ್ಕೆ ಅಪಾಯ ಹೆಚ್ಚು ಎಂಬ ವಿಷಯವೂ ಬಯಲಾಗಿದೆ.
ಅಮೆರಿಕನ್ ಸೊಸೈಟಿ ಆಫ್ ನೆಫ್ರಾಲಜಿ ಎಂಬ ಜರ್ನಲ್ನಲ್ಲಿ ಪ್ರಕಟವಾಗಿರುವ ಅಧ್ಯಯನ ವರದಿಯಲ್ಲಿ ಈ ವಿಷಯ ಉಲ್ಲೇಖಗೊಂಡಿದೆ. ಕೋವಿಡ್-19 ಸೋಂಕಿತರಲ್ಲಿ ಮೂತ್ರಪಿಂಡದ ವೈಫಲ್ಯ ಸಮಸ್ಯೆ ಸಂಭವಿಸುವ ಸಾಧ್ಯತೆ ಅಧಿಕವಿದೆ ಎಂದು ಅಧ್ಯಯನದಲ್ಲಿ ಕಂಡುಬಂದಿದೆ.
ಕರೊನಾ ಸೋಂಕಿತರಲ್ಲಿ ಸೊಲ್ಯೂಬಲ್ ಯುರೊಕೈನೇಸ್ ರಿಸೆಪ್ಟರ್ (suPAR) ಎಂಬ ಪ್ರೊಟೀನ್ ಮಟ್ಟ ಹೆಚ್ಚಾಗುತ್ತದೆ. ಮೂತ್ರಪಿಂಡದ ಸಮಸ್ಯೆ ಇರುವ ಸಾವಿರಾರು ರೋಗಿಗಳಲ್ಲಿ ಈ suPAR ಕಾರಣವಾಗಿದ್ದನ್ನು ಗಮನಿಸಿದ್ದಾಗಿ ಸಂಶೋಧಕರು ಹೇಳಿದ್ದಾರೆ.
ಇದಕ್ಕಾಗಿ 352 ಮಂದಿ ಕರೊನಾ ಸೋಂಕಿತರನ್ನು ಸಂಶೋಧನೆಗೆ ಒಳಪಡಿಸಿದ್ದು, ಅವರಲ್ಲಿ ಕಾಲುಭಾಗದಷ್ಟು ಜನರಲ್ಲಿ ಕಿಡ್ನಿ ಸಮಸ್ಯೆ ಕಂಡುಬಂದಿದ್ದು, ಅವರ suPAR ಮಟ್ಟ ಉಳಿದವರಿಗಿಂತ ಶೇ. 60 ಹೆಚ್ಚಿತ್ತು ಎಂದು ಅಧ್ಯಯನ ಹೇಳಿದೆ. (ಏಜೆನ್ಸೀಸ್)