ತಿರುವನಂತಪುರಂ: ಕೇರಳ ವಿಧಾನಸಭೆ ಚುನಾವಣೆಗೆ ಪಾಲಕ್ಕಾಡ್ ಕ್ಷೇತ್ರದಿಂದ ಸ್ಪರ್ಧಿಸಿದ್ದ ಬಿಜೆಪಿ ಅಭ್ಯರ್ಥಿ ಮೆಟ್ರೋ ಮ್ಯಾನ್ ಎಂದೇ ಖ್ಯಾತಿಯಾಗಿರುವ ಇ ಶ್ರೀಧರನ್ ಅವರಿಗೆ ಸೋಲುಂಟಾಗಿದೆ.
ಅವರು ಯುಡಿಎಫ್ ಒಕ್ಕೂಟದ ಕಾಂಗ್ರೆಸ್ನ ಅಭ್ಯರ್ಥಿ ಹಾಗೂ ಹಾಲಿ ಶಾಸಕ ಶರೀಪ್ ಪರಾಂಬಿಲ್ ಅವರ ವಿರುದ್ಧ ಸೋತಿದ್ದಾರೆ. ಸದ್ಯದ ಮಾಹಿತಿ ಪ್ರಕಾರ 3600 ಮತಗಳ ಅಂತರದಿಂದ ಬಿಜೆಪಿಯ ಬಹು ನಿರೀಕ್ಷಿತ ಅಭ್ಯರ್ಥಿಗೆ ಸೋಲಾಗಿದೆ.
ಆರಂಭದ ಸುತ್ತಿನ ಮತ ಎಣಿಕೆಯಲ್ಲಿ ಶ್ರೀಧರನ್ ಅವರು ಲೀಡ್ ಕಾಯ್ದುಕೊಂಡಿದ್ದರು. ಇನ್ನೇನು ಅವರ ಗೆಲುವು ಪಕ್ಕಾ ಎನ್ನುವಂತಾಗಿತ್ತು. ಆದರೆ ಕೊನೆಯ ಕೆಲ ಸುತ್ತಿನ ಮತ ಎಣಿಕೆಯಲ್ಲಿ ಅದೃಷ್ಠ ಶ್ರೀಧರನ್ಗೆ ಒಲಿಯಲಿಲ್ಲ. ಇದರೊಂದಿಗೆ ಕೇರಳದಲ್ಲಿ ಒಂದು ಸೀಟ್ ಆದ್ರೂ ಗೆಲ್ಲುತ್ತೇವೆ ಎಂಬ ಬಿಜೆಪಿ ಕನಸು ಕೂಡ ನನಸಾಗಲಿಲ್ಲ.
ಚುನಾವಣೆಯಲ್ಲಿ ಶ್ರೀಧರನ್ ಅವರನ್ನು ಮುಖ್ಯಮಂತ್ರಿ ಅಭ್ಯರ್ಥಿ ಎಂದೇ ಬಿಂಬಿಸಲಾಗಿತ್ತು. ಕಡೆಗೆ ಬಿಜೆಪಿಯಿಂದ ಅವರೊಬ್ಬರಾದರೂ ಗೆಲ್ಲುತ್ತಾರೆ ಎಂದು ಬಿಜೆಪಿ ನಿರೀಕ್ಷಿಸಿತ್ತು. ಆದರೆ ಬಿಜೆಪಿಗೆ ಕೇರಳ ಫಲಿತಾಂಶ ತೀವ್ರ ನಿರಾಸೆ ತರಿಸಿದೆ. ಇನ್ನು ಕೇರಳದ ವಿಧಾನಸಭೆ ಚುನಾವಣೆ ಫಲಿತಾಂಶ ಬಹುತೇಕ ಅಂತಿಮಗೊಂಡಿದ್ದು, ಎಲ್ಡಿಎಫ್ 90 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿದೆ. ಯುಡಿಎಫ್ 45 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿದೆ. ಮತ್ತೆ ಪಿಣರಾಯಿ ವಿಜಯನ್ ಅವರು ಮುಖ್ಯಮಂತ್ರಿಯಾಗಿ ಇತಿಹಾಸ ಸೃಷ್ಟಿಸಲಿದ್ದಾರೆ.