ಮಾಸ್ಕೊ: ಕಜಕಿಸ್ತಾನದ ಅಕ್ಟಾವು ನಗರದಲ್ಲಿ ಬುಧವಾರ ಅಜರ್ಬೈಜಾನಿ ವಿಮಾನವೊಂದು ದುರಂತಕ್ಕೀಡಾಗಿದ್ದು 38 ಜನರು ಮೃತಪಟ್ಟಿದ್ದಾರೆ ಎನ್ನಲಾಗಿದೆ. ವಿಮಾನದಲ್ಲಿ ಐದು ಸಿಬ್ಬಂದಿ ಸಹಿತ ಒಟ್ಟು 67 ಜನರಿದ್ದು ಆ ಪೈಕಿ 29 ಜನರು ಬದುಕುಳಿದಿದ್ದಾರೆಂದು ಅಧಿಕಾರಿಗಳು ತಿಳಿಸಿದ್ದಾರೆ. ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಕಜಕಿಸ್ತಾನದ ತುರ್ತಪರಿಸ್ಥಿತಿ ಸಚಿವಾಲಯ ತಿಳಿಸಿದೆ. ವಿಮಾನದ ಇಬ್ಬರೂ ಪೈಲಟ್ಗಳು ದುರಂತದಲ್ಲಿ ಮಡಿದಿದ್ದಾರೆಂದು ರಕ್ಷಣಾ ಕಾರ್ಯದಲ್ಲಿ ತೊಡಗಿರುವ ಕಾರ್ಯಕರ್ತರು ಹೇಳಿರುವುದಾಗಿ ರಷ್ಯಾ ಸುದ್ದಿಸಂಸ್ಥೆ ಇಂಟರ್ಫ್ಯಾಕ್ಸ್ ವರದಿ ಮಾಡಿದೆ.
ಅಜರ್ಬೈಜಾನ್ ಏರ್ಲೈನ್ಸ್ನ ಎಂಬ್ರೇರ್ 190 ವಿಮಾನ, ಅಕ್ಟಾವು ನಗರದಿಂದ 3 ಕಿ.ಮೀ. ದೂರದಲ್ಲಿ ತುರ್ತಾಗಿ ಭೂಸ್ಪರ್ಶ ಮಾಡಿದಾಗ ಅಗ್ನಿಯುಂಡೆಯಾಗಿ ಉರುಳಿತು ಎಂದು ವಿಮಾನಯಾನ ಸಂಸ್ಥೆ ತಿಳಿಸಿದೆ. ದುರಂತದಲ್ಲಿ 25 ಜನರು ಬದುಕುಳಿದಿದ್ದಾರೆಂದು ಕಜಕ್ಸ್ತಾನದ ತುರ್ತು ಸಚಿವಾಲಯ ಮೊದಲಿಗೆ ಹೇಳಿತ್ತು. ಆದರೆ, ರಕ್ಷಣಾ ಕಾರ್ಯಾಚರಣೆ ಮುಂದುವರಿದಂತೆ ಅಪಾಯದಿಂದ ಪಾರಾದವರ ಸಂಖ್ಯೆ ಇನ್ನೂ ಹೆಚ್ಚಾಗಿದೆ. ಮೃತರ ಸಂಖ್ಯೆ ಮೊದಲು ಅಂದುಕೊಂಡಿದ್ದಕ್ಕಿಂತ ತಗ್ಗಿದೆ. ಕನಿಷ್ಠ 32 ಜನರು ಬದುಕುಳಿದಿದ್ದಾರೆಂದು ಅಜರ್ಬೈಜಾನ್ ಪ್ರಾಸಿಕ್ಯೂಟರ್ ಜನರಲ್ ಕಚೇರಿ ನಂತರ ಹೇಳಿದೆ. ಆದರೆ, ಇದು ಅಂತಿಮ ಸಂಖ್ಯೆಯಲ್ಲ ಎಂದೂ ತಿಳಿಸಿದೆ. ಬದುಕುಳಿದವರ ಸಂಖ್ಯೆಯನ್ನು ನೋಡಿದರೆ ಕನಿಷ್ಠ 30 ಜನರು ವಿಮಾನ ದುರಂತದಲ್ಲಿ ಮಡಿದಿರುವುದು ಸ್ಪಷ್ಟವಾಗಿದೆ.
ಮೊಬೈಲ್ ಫೂಟೇಜ್: ವಿಮಾನವು ತುಂಬಾ ಎತ್ತರದಿಂದ ಇಳಿದು ಭೂಮಿಗೆ ಬಅಪ್ಪಳಿಸಿ ಬೆಂಕಿಯುಂಡೆಯಾಗಿ ಉರುಳಿದ್ದನ್ನು ಮೊಬೈಲ್ ಫೋನ್ನಲ್ಲಿ ಚಿತ್ರಿತವಾಗಿರುವ ದೃಶ್ಯವೊಂದು ತೋರಿಸಿದೆ. ವಿಮಾನದ ರೆಕ್ಕೆಗಳು ಮತ್ತಿತರ ಭಾಗಗಳು ಪ್ರತ್ಯೇಕವಾಗಿ ಕಳಚಿ ಹುಲ್ಲಿನ ಮೇಲೆ ಬಿದ್ದ ಇನ್ನೊಂದು ಫೂಟೇಜ್ ಕೂಡ ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ. ವಿಮಾನದ ಒಳಗಿದ್ದವರನ್ನು ಬದುಕುಳಿದವರು ಹೊರಗೆ ಎಳೆಯುತ್ತಿದ್ದ ದೃಶ್ಯಗಳು ಕೂಡ ಪ್ರಸಾರವಾಗಿವೆ.
ಬಾಕುನಿಂದ ಗ್ರಾನ್ಝಿಗೆ: ವಿಮಾನವು ಮೂಲತಃ ಅಜರ್ಬೈಜಾನ್ ರಾಜಧಾನಿ ಬಾಕುನಿಂದ ರಷ್ಯಾದ ಉತ್ತರ ಕಾಕಸಸ್ನ ಗ್ರಾನ್ಝಿ ನಗರಕ್ಕೆ ತೆರಳುತ್ತಿತ್ತು. ವಿಮಾನದಲ್ಲಿ ಅಜರ್ಬೈಜಾನ್ನ 37, ರಷ್ಯಾದ 16, ಕಜಕ್ಸ್ತಾನದ ಆರು ಹಾಗೂ ರ್ಕಿಗಿಜಿಸ್ತಾನದ ಮೂರು ನಾಗರಿಕರು ಪ್ರಯಾಣಿಸುತ್ತಿದರೆಂದು ಅಜರ್ಬೈಜಾನ್ ಏರ್ಲೈನ್ಸ್ ತಿಳಿಸಿದೆ.
ಹಕ್ಕಿ ಬಡಿದು ದುರಂತ: ಹಕ್ಕಿಯೊಂದು ಬಡಿದಿದ್ದರಿಂದ ವಿಮಾನವನ್ನು ಅಕ್ಟಾವುಗೆ ತಿರುಗಿಸಲು ಪೈಲಟ್ ನಿರ್ಧರಿಸಿದ್ದು ಪ್ರಾಥಮಿಕ ತನಿಖೆಯಿಂದ ತಿಳಿದು ಬಂದಿದೆಯೆಂದು ರಷ್ಯಾದ ನಾಗರಿಕ ವಿಮಾನಯಾನ ಪ್ರಾಧಿಕಾರ ರೊಸಾವಿಸ್ಟಾಷಿಯಾ ಹೇಳಿದೆ. ಹಕ್ಕಿ ಬಡಿದಾಗ ಉಂಟಾದ ತುರ್ತು ಪರಿಸ್ಥಿತಿಯ ಹಿನ್ನೆಲೆಯಲ್ಲಿ ಪೈಲಟ್ ಈ ಕ್ರಮಕ್ಕೆ ಮುಂದಾಗಿದ್ದರು.