ಬೆಂಗಳೂರು: ಕರ್ನಾಟಕ ಮಹಿಳಾ ಯಕ್ಷಗಾನ 25 ವರ್ಷಗಳನ್ನು ಪೂರೈಸಿರುವ ಹಿನ್ನೆಲೆಯಲ್ಲಿ ಸೆ.10ರಂದು ‘ಬೆಳ್ಳಿ ಹಬ್ಬದ ಸಂಭ್ರಮ’ ಕಾರ್ಯಕ್ರಮ ಆಯೋಜಿಸಿದೆ.
ನಗರದ ರವೀಂದ್ರ ಕಲಾಕ್ಷೇತ್ರದಲ್ಲಿ ಬೆಳಗ್ಗೆ 10.30ಕ್ಕೆ ನಡೆಯುವ ‘ಚಿಂತನ- ಮಂಥನ ಯಕ್ಷಗಾನ- ಮಹಿಳೆ- ಮಾಧ್ಯಮ’ ಕಾರ್ಯಕ್ರಮವನ್ನು ವಿಧಾನಸಭಾಧ್ಯಕ್ಷ ಯು.ಟಿ. ಖಾದರ್ ಉದ್ಘಾಟಿಸಲಿದ್ದಾರೆ. ಪತ್ರಕರ್ತ ರವೀಂದ್ರ ಭಟ್ಟ, ಯಕ್ಷಗಾನ ಸಂಶೋಧಕ ಡಾ. ಪೃಥ್ವಿರಾಜ ಕವತ್ತಾರು, ಉದ್ಯಮಿ ಉಪೇಂದ್ರ ಶೆಟ್ಟಿ, ಅಜೀಂ ಪ್ರೇಮ್ಜಿ ವಿವಿ ಪ್ರೊೆಸರ್ ಡಾ. ಎ. ನಾರಾಯಣ, ಯಕ್ಷಗಾನ ವಿದ್ವಾಂಸ ಡಾ. ಆನಂದರಾಮ ಉಪಾಧ್ಯ, ಲೇಖಕಿ ಡಾ. ಅನಸೂಯ ದೇವಿ ಇತರರು ಭಾಗವಹಿಸಲಿದ್ದಾರೆ.
ಮಧ್ಯಾಹ್ನ 2.30ಕ್ಕೆ ಪಂಚವಟಿ ಯಕ್ಷಗಾನ ಬ್ಯಾಲೆ ಏರ್ಪಡಿಸಲಾಗಿದೆ. ವಿದ್ವಾನ್ ಸುಧೀರ್ರಾವ್ ಕೊಡವೂರು ನಿರ್ದೇಶನದಲ್ಲಿ ಕರ್ನಾಟಕ ಮಹಿಳಾ ಯಕ್ಷಗಾನ ತಂಡ ಪ್ರದರ್ಶನ ನೀಡಲಿದೆ. ನಂತರ ಆಂಗ್ಲ ಭಾಷೆಯಲ್ಲಿ ‘ಕಂಸ ವಧೆ’ ಯಕ್ಷಗಾನ ಪ್ರಸ್ತುತಪಡಿಸಲಾಗುವುದು. ಸಂಜೆ 4.15ಕ್ಕೆ ತೆಂಕು ಹಾಗೂ ಬಡಗು ತಿಟ್ಟಿನ ಯಕ್ಷಗಾನ ವೈಭವ ನಡೆಯಲಿದೆ. ಭರತನಾಟ್ಯ ಕಥಕ್, ಯಕ್ಷಗಾನ, ಜಗುಲ್ಬಂದಿ ಇದೆ. ಸುದರ್ಶನ ವಿಜಯ ಹಾಗೂ ವೀರ ಅಭಿಮನ್ಯು ಯಕ್ಷಗಾನ ಪ್ರಸಂಗ ಪ್ರದರ್ಶನಗೊಳ್ಳಲಿದೆ. ಕನ್ನಡ-ಸಂಸ್ಕೃತಿ ಸಚಿವ ಶಿವರಾಜ್ ತಂಗಡಗಿ ಹಾಗೂ ಇತರ ಗಣ್ಯರು ಭಾಗವಹಿಸಲಿದ್ದಾರೆ.