20ನೇ ಏಷ್ಯನ್ ಗೇಮ್ಸ್ನಲ್ಲಿ ಮೊದಲ ಚಿನ್ನದ ಪದಕ ಒಲಿಸಿಕೊಂಡ ಆತಿಥೇಯ ಜಪಾನ್
ಐಚಿ-ನಗೋಯಾ: ಏಷ್ಯನ್ ಗೇಮ್ಸ್ (Asian Games) 20ನೇ ಆವೃತ್ತಿಯ ಮೊದಲ ಚಿನ್ನದ ಪದಕವನ್ನು ಆತಿಥೇಯ ಜಪಾನ್ ತಂಡವೇ ಗೆದ್ದುಕೊಂಡಿದೆ. ಪುರುಷರ ಟ್ರಯಾಥ್ಲಾನ್ನಲ್ಲಿ ಜಪಾನ್ನ ಟಕುಮಿ ಹೊಜೊ ಚಿನ್ನದ ಪದಕಕ್ಕೆ ಕೊರಳೊಡ್ಡಿದರು. 750 ಮೀ. ಈಜು, 20 ಕಿ.ಮೀ. ಬೈಕ್ ರೈಡ್ ಮತ್ತು 5 ಸಾವಿರ ಮೀ. ಓಟದ ಸ್ಪರ್ಧೆಯನ್ನು 30 ವರ್ಷದ ಹೊಜೊ 52 ನಿಮಿಷ, 56 ಸೆಕೆಂಡ್ಗಳಲ್ಲಿ ಮುಗಿಸಿ ಈ ಸಾಧನೆ ಮಾಡಿದರು ಮತ್ತು 2028ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್ಗೂ ಅರ್ಹತೆ ಗಳಿಸಿದರು. ಚೀನಾದ ಝಂಗ್ ಕ್ಸಿರುಯಿ ಬೆಳ್ಳಿ ಮತ್ತು ಕಜಾಕ್ಸ್ತಾನದ ಅರ್ಲಾನ್ ಝನಬೇ ಕಂಚಿನ ಪದಕಕ್ಕೆ ಕೊರಳೊಡ್ಡಿದರು.
ಬ್ಯಾಡ್ಮಿಂಟನ್ನಲ್ಲಿ ಭಾರತ 8ರ ಘಟ್ಟಕ್ಕೆ ಪ್ರವೇಶ
ಬ್ಯಾಡ್ಮಿಂಟನ್ ತಂಡ ಸ್ಪರ್ಧೆಯ ಮಹಿಳಾ ವಿಭಾಗದಲ್ಲಿ ಭಾರತ ತಂಡ ಕ್ವಾರ್ಟರ್ಫೈನಲ್ಗೇರಿದ್ದು, ಉಪಾಂತ್ಯಕ್ಕೇರಲು ಆತಿಥೇಯ ಜಪಾನ್ ವಿರುದ್ಧ ಸೆಣಸಾಡಲಿದೆ. ಪಿವಿ ಸಿಂಧು ಸಾರಥ್ಯದ ಭಾರತ ತಂಡ ಭಾನುವಾರ ನಡೆದ 16ರ ಘಟ್ಟದ ಪಂದ್ಯದಲ್ಲಿ ಕಜಾಕ್ಸ್ತಾನ ವಿರುದ್ಧ 3-0 ಅಂತರದಿಂದ ಗೆಲುವು ಸಾಧಿಸಿತು. ವಿಶ್ವ ನಂ. 11 ಪಿವಿ ಸಿಂಧು, ಉನ್ನತಿ ಹೂಡಾ ಮತ್ತು ತನ್ವಿ ಶರ್ಮ ಮೊದಲ 3 ಸಿಂಗಲ್ಸ್ ಪಂದ್ಯಗಳಲ್ಲೂ ಗೆಲುವು ಸಾಧಿಸಿದರು.
ಸಿಂಗಾಪುರಕ್ಕೆ ಶಾಕ್ ನೀಡಿದ ಟಿಟಿ ಟೀಮ್
ಭಾರತದ ಮಹಿಳೆಯರ ತಂಡ ಟೇಬಲ್ ಟೆನಿಸ್ ಸ್ಪರ್ಧೆಯಲ್ಲಿ ಬಲಿಷ್ಠ ಸಿಂಗಾಪುರ ತಂಡಕ್ಕೆ 3-2ರಿಂದ ಆಘಾತಕಾರಿ ಸೋಲುಣಿಸಿದೆ. ಎಫ್ ಗುಂಪಿನಲ್ಲಿ ಕನ್ನಡತಿ ಯಶಸ್ವಿನಿ ಘೋರ್ಪಡೆ ಒಳಗೊಂಡ ಭಾರತ ತಂಡ ದಿನದ ಮೊದಲ ಪಂದ್ಯದಲ್ಲಿ ಇಂಡೋನೇಷ್ಯಾ ವಿರುದ್ಧ 3-0ರಿಂದ ಜಯಿಸಿತು. ಬಳಿಕ ಸಿಂಗಾಪುರ ವಿರುದ್ಧ ಭಾರತ ಒಂದು ಹಂತದಲ್ಲಿ 1-2ರಿಂದ ಹಿನ್ನಡೆಯಲ್ಲಿತ್ತು. ಬಳಿಕ ದಿವ್ಯಾ ಚಿತಾಲೆ 4ನೇ ಪಂದ್ಯ ಗೆದ್ದು ಆಸೆ ಜೀವಂತವಿಟ್ಟರೆ, ಯಶಸ್ವಿನಿ ನಿರ್ಣಾಯಕ ಪಂದ್ಯ ಜಯಿಸಿದರು. ಪುರುಷರ ವಿಭಾಗದಲ್ಲಿ ಭಾರತ ತಂಡ ಇಂಡೋನೇಷ್ಯಾ ವಿರುದ್ಧ 3-0ಯಿಂದ ಗೆದ್ದರೆ, ಇರಾನ್ ಎದುರು 0-3ರಿಂದ ಪರಾಭವಗೊಂಡಿತು.