ಅಹಮದಾಬಾದ್: ನಿಜಾಮುದ್ದೀನ್ ಮರ್ಕಜ್ನಲ್ಲಿ ನಡೆದಿದ್ದ ತಬ್ಲಿಘಿ ಜಮಾತ್ ಸಭೆಯಲ್ಲಿ ಪಾಲ್ಗೊಂಡು ಕರೊನಾ ಸೋಂಕಿತರಾಗಿರುವ ಜಮಾತಿಗಳು ಚಿಕಿತ್ಸೆ ಪಡೆಯಲು ನಿರಾಕರಿಸಿ, ಸಾಕಷ್ಟು ಗಲಭೆ ಎಬ್ಬಿಸಿದ್ದರು. ಅಲ್ಲದೆ, ಸರ್ಕಾರ ನಮ್ಮನ್ನು ಕೊಲ್ಲುವ ಉದ್ದೇಶ ಹೊಂದಿದೆ ಎಂದು ಆರೋಪಿಸಿ, ಗಲಾಟೆ ಮಾಡುತ್ತಿದ್ದರು.
ಆದರೆ, ಜಿಲ್ಲಾಧಿಕಾರಿ ಕೈಗೊಂಡ ಈ ಕ್ರಮದ ಬಳಿಕ ಅವರೆಲ್ಲರೂ ಚಿಕಿತ್ಸೆ ಪಡೆಯಲು ಸಮ್ಮತಿಸಿದರು. ಹಾಗಾದರೆ, ಈ ಚಮತ್ಕಾರ ಆಗಿದ್ದಾರೂ ಹೇಗೆ? ಜಿಲ್ಲಾಧಿಕಾರಿಗಳು ಕೈಗೊಂಡ ಕ್ರಮವಾದರೂ ಏನು?
ತಬ್ಲಿಘಿ ಜಮಾತ್ನಲ್ಲಿ ಪಾಲ್ಗೊಂಡು ಸೋಂಕಿತರಾಗಿರುವವರನ್ನು ದೇಶದೆಲ್ಲಡೆ ಪತ್ತೆ ಮಾಡಿ, ಐಸೋಲೇಷನ್ಗೆ ಕಳುಹಿಸಲಾಗುತ್ತಿದೆ. ಅಲ್ಲಿ ಅವರು ವೈದ್ಯರು, ನರ್ಸ್ಗಳೊಂದಿಗೆ ಅಸಭ್ಯವಾಗಿ ವರ್ತಿಸುವ ಸುದ್ದಿ ಸಾಮಾನ್ಯವಾಗುತ್ತಿದೆ. ಅದರಂತೆ ಅಹಮದಾಬಾದ್ ದರಿಯಾಪುರದ ಸೊಲಾ ಸಿವಿಲ್ ಆಸ್ಪತ್ರೆಯಲ್ಲಿ ಇರಿಸಲಾಗಿದ್ದ 26 ಜಮಾತಿಗಳು ಗಲಾಟೆ ಆರಂಭಿಸಿದ್ದರು.
ವಿಷಯ ತಿಳಿದ ಜಿಲ್ಲಾಧಿಕಾರಿ, ಮುಸ್ಲಿಂ ವೈದ್ಯರನ್ನು ಐಸೋಲೇಷನ್ ವಾರ್ಡ್ಗೆ ಕಳುಹಿಸಿ, ಅಂದಾಜು ಒಂದು ಗಂಟೆ ಕೌನ್ಸೆಲಿಂಗ್ ಕೊಡಿಸಿದರು. ನಿಮ್ಮನ್ನು ಕೊಲ್ಲುವ ಉದ್ದೇಶ ಸರ್ಕಾರಕ್ಕೆ ಇಲ್ಲ. ಬದಲಿಗೆ ನಿಮ್ಮೆಲ್ಲರನ್ನೂ ಉಳಿಸಲು ಅದು ಯತ್ನಿಸುತ್ತಿದೆ ಎಂದು ಮುಸ್ಲಿಂ ವೈದ್ಯರು ಜಮಾತಿಗಳಿಗೆ ಮನವರಿಕೆ ಮಾಡಿಕೊಟ್ಟರು. ಆನಂತರದಲ್ಲಿ ಅವರೆಲ್ಲರೂ ಚಿಕಿತ್ಸೆ ಪಡೆಯಲು ಸಮ್ಮತಿಸಿದರು.