ಪಟನಾ: ಪುತ್ರನಿಂದ ಗುಂಡೇಟು ತಿಂದ 55 ವರ್ಷದ ಮಹಿಳೆ ಸಾವು-ಬದುಕಿನ ನಡುವೆ ಹೋರಾಡುತ್ತಿದ್ದಾರೆ. 20 ವರ್ಷದ ಕಿರಾತಕ ಮಗ ತಾಯಿಗೆ ಗುಂಡು ಹೊಡೆದಿದ್ದು ಒಂದು ಕ್ಷುಲ್ಲಕ ಕಾರಣಕ್ಕೆ.
ಬಿಹಾರದ ಗ್ರಾಮಾಂತರ ಪಟನಾದಲ್ಲಿ ಘಟನೆ ನಡೆದಿದೆ. 20 ವರ್ಷದ ಯುವಕ ಅಂಗದ್ ಯಾದವ್, ತನ್ನ ಸ್ನೇಹಿತರೊಂದಿಗೆ ಚಾಟಿಂಗ್ನಲ್ಲಿ ಮುಳುಗಿದ್ದ. ರಾತ್ರಿ 10.30 ಆದರೂ ಊಟಕ್ಕೆ ಬಾರದೆ, ಮೊಬೈಲ್ ನೋಡುತ್ತಿದ್ದ ಮಗನನ್ನು ಅಮ್ಮ ಕರೆದಿದ್ದಾರೆ. ಪದೇಪದೆ ತನ್ನನ್ನು ಅಮ್ಮ ಕರೆಯುತ್ತಿರುವುದರಿಂದ ಕಿರಿಕಿರಿಗೊಂಡ ಮಗ, ಸಿಟ್ಟಿನಿಂದ ಅಲ್ಲಿಯೇ ಇದ್ದ ಪಿಸ್ತೋಲ್ನಿಂದ ಅವರ ತಲೆಗೆ ಗುಂಡು ಹೊಡೆದಿದ್ದಾನೆ.
ಅಂಗದ್ನನ್ನು ಬಂಧಿಸಿರುವ ಪೊಲೀಸರು, ಆತ ಅಮ್ಮನಿಗೆ ಶೂಟ್ ಮಾಡಲು ಬಳಸಿದ ಪಿಸ್ತೂಲ್ನ್ನು ವಶಪಡಿಸಿಕೊಂಡಿದ್ದಾರೆ.
ಗಾಯಗೊಂಡ ತಾಯಿ ಮಂಜುರ್ ದೇವಿ ಅವರಿಗೆ ಸ್ಥಳೀಯ ಖಾಸಗಿ ಆಸ್ಪತ್ರೆಯಲ್ಲಿ ಪ್ರಾಥಮಿಕ ಚಿಕಿತ್ಸೆ ಕೊಡಿಸಿ, ನಂತರ ಪಟನಾದ ವೈದ್ಯಕೀಯ ಕಾಲೇಜು ಮತ್ತು ಹಾಸ್ಪಿಟಲ್ಗೆ ದಾಖಲಿಸಲಾಗಿದೆ.
ಯುವಕ ತಾಯಿಯ ತಲೆಗೆ ಹಿಂದಿನಿಂದ ಶೂಟ್ ಮಾಡಿದ್ದಾನೆ. ಈತ ಮನೆಯ ಹೊರಗೆ ಕುಳಿತು ಚಾಟ್ ಮಾಡುತ್ತಿದ್ದ. ಎಷ್ಟೇ ಸಲ ಕರೆದರು ಮನೆಯೊಳಗೆ ಬಾರದ ಮಗನನ್ನು ಕರೆಯಲೆಂದು ಮುಖ್ಯಬಾಗಿಲಿಗೆ ಹೋದರು. ಅಲ್ಲಿ ನಿಂತು ಕರೆದು, ವಾಪಸ್ ಹೋಗುವಷ್ಟರಲ್ಲಿ ತಲೆಗೆ ಗುಂಡು ಹೊಡೆದಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ. ಇದನ್ನೂ ಓದಿ: ಅಮ್ಮಾ ಕ್ಷಮಿಸಿಬಿಡು, ಅವನೂ ನನ್ನ ಮದ್ವೆ ಆಗಲ್ಲ, ಬೇರೆಯವರನ್ನೂ ಆಗಲು ಬಿಡಲ್ಲ…
ಬಂಧಿಸಲು ಹೋದ ಪೊಲೀಸರತ್ತ ಕೂಡ ಆತ ಫೈರ್ ಮಾಡಿದ್ದಾನೆ. ಆದರೆ ಅದು ವ್ಯರ್ಥವಾಗಿದೆ. ಘಟನೆ ವೇಳೆ ಮಂಜುರ್ ದೇವಿ ಅವರ ನಾದಿನಿ ಕೂಡ ಇದ್ದರು. ಅವರ ಹೇಳಿಕೆಯನ್ನಾಧರಿಸಿ, ತನಿಖೆ ನಡೆಸಲಾಗುತ್ತಿದೆ ಎಂದಿದ್ದಾರೆ. (ಏಜೆನ್ಸೀಸ್)