Iran vs Israel : ತಮ್ಮ ಪರಮಾಣು ಸೌಲಭ್ಯಗಳ ಮೇಲೆ ದಾಳಿ ಮಾಡಿದ ಇಸ್ರೇಲ್ ಮತ್ತು ಅಮೆರಿಕದ ಮೇಲೆ ಇರಾನ್ ತೀವ್ರ ಕೋಪಗೊಂಡಿದೆ. ಈ ಹಿನ್ನೆಲೆಯಲ್ಲಿ ಇರಾನ್ನ ಶಿಯಾ ಧರ್ಮಗುರು ಗ್ರ್ಯಾಂಡ್ ಅಯತೊಲ್ಲಾ ನಾಸರ್ ಮಕರೆಮ್ ಶಿರಾಜಿ ಅವರು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೇತನ್ಯಾಹು ವಿರುದ್ಧ 'ಫತ್ವಾ' ಅಥವಾ "ಧಾರ್ಮಿಕ ಆದೇಶ" ಹೊರಡಿಸಿದ್ದಾರೆ.
ಟ್ರಂಪ್ ಮತ್ತು ನೇತನ್ಯಾಹು ಅವರನ್ನು ದೇವರ ಶತ್ರುಗಳು ಎಂದು ಇರಾನ್ ಧರ್ಮಗುರು ಕರೆದಿದ್ದಾರೆ. ಇಸ್ಲಾಮಿಕ್ ಗಣರಾಜ್ಯದ ನಾಯಕತ್ವಕ್ಕೆ ಬೆದರಿಕೆ ಹಾಕುತ್ತಿರುವ ಅಮೆರಿಕ ಮತ್ತು ಇಸ್ರೇಲ್ ನಾಯಕರ ಸಾಮ್ರಾಜ್ಯಗಳನ್ನು ಉರುಳಿಸುವಂತೆ ಮಕರೆಮ್ ಶಿರಾಜಿ ಪ್ರಪಂಚದಾದ್ಯಂತದ ಮುಸ್ಲಿಮರಿಗೆ ಕರೆ ನೀಡಿದ್ದಾರೆ.
ಇರಾನಿನ ನಾಯಕರಿಗೆ ಬೆದರಿಕೆ ಹಾಕುವ ಯಾರನ್ನಾದರೂ ಯುದ್ಧನಾಯಕ ಎಂದು ಪರಿಗಣಿಸಲಾಗುತ್ತದೆ ಎಂದು ಮಕರೆಮ್ ತನ್ನ ತೀರ್ಪಿನಲ್ಲಿ ಹೇಳಿದ್ದಾರೆ ಎಂದು ಮೆಹರ್ ನ್ಯೂಸ್ ಏಜೆನ್ಸಿ ವರದಿ ಮಾಡಿದೆ. ಮೊಹರೆಬ್ ಎಂದರೆ ದೇವರ ವಿರುದ್ಧ ಯುದ್ಧ ಮಾಡುವ ವ್ಯಕ್ತಿ. ಇರಾನಿನ ಕಾನೂನಿನ ಪ್ರಕಾರ, ಮೊಹರೆಬ್ ಎಂದು ಗುರುತಿಸಲ್ಪಟ್ಟವರು ಮರಣದಂಡನೆ, ಶಿಲುಬೆಗೇರಿಸುವಿಕೆ, ಅಂಗಚ್ಛೇದನ ಅಥವಾ ಗಡಿಪಾರು ಎದುರಿಸಬೇಕಾಗುತ್ತದೆ ಎಂದು ಫಾಕ್ಸ್ ನ್ಯೂಸ್ ವರದಿ ಮಾಡಿದೆ.
ಆ ಶತ್ರುಗಳಿಗೆ (ಅಮೆರಿಕ ಮತ್ತು ಇಸ್ರೇಲ್) ಮುಸ್ಲಿಮರು ಅಥವಾ ಇಸ್ಲಾಮಿಕ್ ರಾಷ್ಟ್ರಗಳು ನೀಡುವ ಯಾವುದೇ ಸಹಕಾರ ಅಥವಾ ಬೆಂಬಲವನ್ನು ನಿಷೇಧಿಸಬೇಕು. ಪ್ರಪಂಚದಾದ್ಯಂತದ ಎಲ್ಲಾ ಮುಸ್ಲಿಮರು ಈ ಶತ್ರುಗಳು ತಮ್ಮ ಮಾತುಗಳು ಮತ್ತು ತಪ್ಪುಗಳಿಗೆ ವಿಷಾದಿಸುವಂತೆ ಮಾಡುವುದು ಅವಶ್ಯಕ ಎಂದು ಫತ್ವಾದಲ್ಲಿ ಹೇಳಲಾಗಿದೆ. ಅಲ್ಲದೆ, ತನ್ನ ಮುಸ್ಲಿಂ ಧರ್ಮದ ಕರ್ತವ್ಯವನ್ನು ಪಾಲಿಸುವ ಮುಸಲ್ಮಾನ್, ಈ ಅಭಿಯಾನದಲ್ಲಿ ಕಷ್ಟ ಅಥವಾ ನಷ್ಟವನ್ನು ಅನುಭವಿಸಿದರೆ, ದೇವರು ಇಚ್ಛಿಸಿದರೆ, ದೇವರ ಮಾರ್ಗದಲ್ಲಿ ಹೋರಾಟಗಾರನಾಗಿ ಪ್ರತಿಫಲ ಪಡೆಯುತ್ತಾನೆ ಎಂದು ಫತ್ವಾದಲ್ಲಿ ಹೇಳಲಾಗಿದೆ.
ಜೂನ್ 13 ರಂದು ಇಸ್ರೇಲ್ ದೇಶ ಇರಾನ್ ಮೇಲೆ ಬಾಂಬ್ ದಾಳಿ ಮಾಡಲು ಪ್ರಾರಂಭಿಸಿತು. ಬಳಿಕ ಇರಾನ್ ಕೂಡ ಪ್ರತಿದಾಳಿ ನಡೆಸಿತು. ಸುಮಾರು 12 ದಿನಗಳ ಕಾಲ ನಡೆದ ಈ ಯುದ್ಧದ ನಂತರ ಈ ಧಾರ್ಮಿಕ ಆದೇಶವನ್ನು ಹೊರಡಿಸಲಾಗಿದೆ. ಇರಾನ್ನಲ್ಲಿನ ಮೂರು ಪರಮಾಣು ಸೌಲಭ್ಯಗಳ ಮೇಲೆ ದಾಳಿ ಮಾಡಿ ನಾಶ ಮಾಡಲಾಗಿದೆ. ಅಲ್ಲದೆ, ಅಲ್ಲಿನ ವಿಜ್ಞಾನಿಗಳು ಹಾಗೂ ಮಿಲಿಟರಿ ಅಧಿಕಾರಿಗಳನ್ನು ದಾಳಿಯಲ್ಲಿ ಕೊಲ್ಲಲಾಗಿದೆ. ನೂರಾರು ನಾಗರಿಕರು ಕೂಡ ಈ ಯುದ್ಧದಲ್ಲಿ ಅಸುನೀಗಿದ್ದಾರೆ. ಈ ಯುದ್ಧದಲ್ಲಿ ಇಸ್ರೇಲ್ ಜೊತೆ ಅಮೆರಿಕ ಕೈ ಜೋಡಿಸಿದ್ದು, ಇರಾನ್ ಮೇಲೆ ತೀವ್ರ ಪರಿಣಾಮ ಬೀರಿತು. ಅಂತಿಮವಾಗಿ ಇಸ್ರೇಲ್ ಮತ್ತು ಇರಾನ್ ಕದನ ವಿರಾಮ ಒಪ್ಪಂದ ಮಾಡಿಕೊಂಡು ಯುದ್ಧಕ್ಕೆ ಅಂತ್ಯವಾಡಿದವು.
ಫತ್ವಾ ಎಂದರೆ ಮಾರ್ಜಾ ಹೊರಡಿಸಿದ ಇಸ್ಲಾಮಿಕ್ ಕಾನೂನಿನ ವ್ಯಾಖ್ಯಾನ. ಅಂದಹಾಗೆ ಈ ಮಾರ್ಜಾ ಅಂದರೆ, ಟ್ವೆಲ್ವರ್ ಶಿಯಾ ಧಾರ್ಮಿಕ ಧರ್ಮಗುರುವಿನ ಅತ್ಯುನ್ನತ ಮಟ್ಟಕ್ಕೆ ನೀಡಲಾಗುವ ಬಿರುದು. ಇಸ್ಲಾಮಿಕ್ ಸರ್ಕಾರಗಳು ಮತ್ತು ವ್ಯಕ್ತಿಗಳು ಸೇರಿದಂತೆ ಎಲ್ಲಾ ಮುಸ್ಲಿಮರು ಆದೇಶ ಜಾರಿಯನ್ನು ಖಚಿತಪಡಿಸಿಕೊಳ್ಳಬೇಕೆಂದು ಫತ್ವಾ ಕರೆ ನೀಡುತ್ತದೆ. ಅಂದಹಾಗೆ, ಇರಾನ್ ಧರ್ಮಗುರುಗಳು ವ್ಯಕ್ತಿಯ ವಿರುದ್ಧ ಹಿಂಸಾಚಾರಕ್ಕೆ ಕರೆ ನೀಡಲು ಫತ್ವಾಗಳನ್ನು ಬಳಸುತ್ತಿರುವುದು ಇದೇ ಮೊದಲಲ್ಲ. ಅತ್ಯಂತ ಕುಖ್ಯಾತ ಫತ್ವಾ ಎಂದರೆ 1989 ರಲ್ಲಿ ಲೇಖಕ ಸಲ್ಮಾನ್ ರಶ್ದಿ ಅವರ "ದಿ ಸಟಾನಿಕ್ ವರ್ಸಸ್" ಕಾದಂಬರಿ ಬಿಡುಗಡೆಯಾದ ನಂತರ ಅವರ ವಿರುದ್ಧ ಹೊರಡಿಸಲಾದ ಫತ್ವಾ. ಇದನ್ನು ಅನೇಕ ಮುಸ್ಲಿಮರು ಅವಮಾನಕರವೆಂದು ಪರಿಗಣಿಸಿದರು. ಆ ಆದೇಶವು ರಶ್ದಿಯವರ ಹತ್ಯೆಗೆ ಕರೆ ನೀಡಿತು. ಇದರಿಂದಾಗಿ ರಶ್ದಿ ಅವರು ತಲೆಮರೆಸಿಕೊಂಡರು. ಅಂದಿನಿಂದ, ರಶ್ದಿಯವರ ಮೇಲೆ ಹಲವಾರು ಹತ್ಯೆ ಪ್ರಯತ್ನಗಳು ನಡೆದಿವೆ. ಅವುಗಳಲ್ಲಿ 2023 ರಲ್ಲಿ ನ್ಯೂಯಾರ್ಕ್ನ ಅಪ್ಸ್ಟೇಟ್ನಲ್ಲಿ ನಡೆದ ಇರಿತದ ದಾಳಿಯಲ್ಲಿ ರಶ್ದಿ ಅವರು ಒಂದು ಕಣ್ಣನ್ನು ಕಳೆದುಕೊಂಡರು. (ಏಜೆನ್ಸೀಸ್)