ವೀಸಾ ನಿಮಯಗಳಲ್ಲಿ ಮಹತ್ವದ ಬದಲಾವಣೆ
- ಅಮೆರಿಕ ವೀಸಾ ನಿಯಮಗಳಲ್ಲಿ ಮಹತ್ವದ ಬದಲಾವಣೆ
- ವಿದ್ಯಾರ್ಥಿಗಳ ವೀಸಾಗಳಿಗೆ 4 ವರ್ಷಗಳ ಅವಧಿ ಮಿತಿ
- ಭಾರತ ಸೇರಿ ಇತರೆ ರಾಷ್ಟ್ರಗಳಿಂದ ಬರುವ ವಿದ್ಯಾರ್ಥಿಗಳಲ್ಲಿ ಕಾಡಿದ ಆತಂಕ
USA Visa Rules: ಉನ್ನತ ಶಿಕ್ಷಣಕ್ಕಾಗಿ ಅಮೆರಿಕಕ್ಕೆ ಹೋಗಬೇಕು ಎಂಬ ಕನಸು ಕಟ್ಟಿಕೊಂಡಿದ್ದ ಅದೆಷ್ಟೋ ವಿದ್ಯಾರ್ಥಿಗಳಿಗೆ, ವಿದೇಶಿ ಪತ್ರಕರ್ತರಿಗೆ ವಿಶೇಷವಾಗಿ ಭಾರತೀಯರಿಗೆ ವೀಸಾ ನಿಯಮಗಳಲ್ಲಿ ಮಹತ್ವದ ಬದಲಾವಣೆ ತರುವ ಮೂಲಕ ಡೊನಾಲ್ಡ್ ಟ್ರಂಪ್ ಸರ್ಕಾರ ಬಿಗ್ ಶಾಕ್ ನೀಡಿದೆ.
ದಶಕಗಳಿಂದ ಜಾರಿಯಲ್ಲಿರುವ ಪ್ರಮುಖ ವಲಸೆ ನಿಯಮವನ್ನು ಬದಲಾಯಿಸಲು ಅಮೆರಿಕ ಗೃಹ ಭದ್ರತಾ ಇಲಾಖೆ (ಡಿಎಚ್ಎಸ್) ಹೊಸ ನಿಯಮವನ್ನು ಮುನ್ನೆಲೆಗೆ ತಂದಿದೆ. ವೀಸಾ ವ್ಯವಸ್ಥೆಯ ಮೇಲ್ವಿಚಾರಣೆಯನ್ನು ಹೆಚ್ಚಿಸುವ ಮತ್ತು ರಾಷ್ಟ್ರೀಯ ಭದ್ರತೆಯನ್ನು ಬಲಪಡಿಸುವ ಉದ್ದೇಶದಿಂದ ಟ್ರಂಪ್ ಆಡಳಿತವು ಈ ಕಠಿಣ ನಿರ್ಧಾರದತ್ತ ದಾಪುಗಾಲಿಟ್ಟಿದೆ.
4 ವರ್ಷಗಳಲ್ಲಿ ಕೋರ್ಸ್ ಮುಗಿಯದಿದ್ದರೆ ಕಷ್ಟಕರ
ಈಗಿನ ನಿಯಮಗಳ ಪ್ರಕಾರ, ಎಫ್-1 ವೀಸಾಗಳಲ್ಲಿರುವ ವಿದ್ಯಾರ್ಥಿಗಳು ತಮ್ಮ ಕೋರ್ಸ್ ಪೂರ್ಣಗೊಳ್ಳುವವರೆಗೆ ಕಾನೂನುಬದ್ಧವಾಗಿ ಅಮೆರಿಕದಲ್ಲಿ ಉಳಿಯಲು ಅವಕಾಶ ಮಾಡಿಕೊಡಲಾಗಿದೆ. ಆದರೆ, ಹೊಸ ಪ್ರಸ್ತಾವನೆಯಲ್ಲಿ, ವಿದ್ಯಾರ್ಥಿಗಳು ಈಗ ಗರಿಷ್ಠ ನಾಲ್ಕು ವರ್ಷಗಳವರೆಗೆ ಮಾತ್ರ ಯುಎಸ್ನಲ್ಲಿ ಇರಲು ಸಾಧ್ಯ ಎನ್ನಲಾಗಿದೆ. ಈ ಅವಧಿಯೊಳಗೆ ಅವರು ತಮ್ಮ ತಮ್ಮ ಕೋರ್ಸ್ಗಳನ್ನು ಮುಗಿಸಿಕೊಳ್ಳಬೇಕು. ಇಲ್ಲದಿದ್ದರೆ, ಹೆಚ್ಚುವರಿ ಅವಧಿಗೆ ಪ್ರತ್ಯೇಕ ಅರ್ಜಿ ಸಲ್ಲಿಸಬೇಕಾಗುತ್ತದೆ.
ಈ ಬದಲಾವಣೆಯು ಎಫ್-1 ವಿದ್ಯಾರ್ಥಿಗಳ ಮೇಲೆ, ಹಾಗೆಯೇ ಜೆ-1 ವಿನಿಮಯ ಸಂದರ್ಶಕರು ಮತ್ತು 'I' ವೀಸಾಗಳಲ್ಲಿ ವಿದೇಶಿ ಮಾಧ್ಯಮ ಪ್ರತಿನಿಧಿಗಳ ಮೇಲೆ ಗಂಭೀರ ಪರಿಣಾಮ ಬೀರಲಿದೆ. ಈ ನಿರ್ಬಂಧವು ವಿಶೇಷವಾಗಿ ಸಂಶೋಧನೆ, ಪಿಎಚ್ಡಿ ಮತ್ತು ವೈದ್ಯಕೀಯ ಕೋರ್ಸ್ಗಳನ್ನು ಆಯ್ಕೆ ಮಾಡಿಕೊಳ್ಳುವ ವಿದ್ಯಾರ್ಥಿಗಳಿಗೆ ಸಮಸ್ಯೆಯಾಗಿ ಕಾಡುವುದು ಹೌದು.
ಭಾರತೀಯ ವಿದ್ಯಾರ್ಥಿಗಳಲ್ಲಿ ಹೆಚ್ಚಿದ ಕಳವಳ
ಭಾರತೀಯರು ಪ್ರಸ್ತುತ ಅಮೆರಿಕದಲ್ಲಿ ಅತಿದೊಡ್ಡ ವಿದ್ಯಾರ್ಥಿ ಗುಂಪಾಗಿದ್ದು, ಸುಮಾರು 3.31 ಲಕ್ಷ ವಿದ್ಯಾರ್ಥಿಗಳು ಟ್ರಂಪ್ ರಾಷ್ಟ್ರದಲ್ಲಿದ್ದಾರೆ. ಹೊಸ ನಿಯಮ ಜಾರಿಗೆ ಬಂದರೆ, ವಿಸ್ತರಣಾ ಅರ್ಜಿಗಳ ಪ್ರಕ್ರಿಯೆಯಲ್ಲಿನ ಆಡಳಿತಾತ್ಮಕ ವಿಳಂಬದಿಂದಾಗಿ ಭಾರತೀಯ ವಿದ್ಯಾರ್ಥಿಗಳ ವಿದ್ಯಾಭ್ಯಾಸಕ್ಕೆ ತೊಡಕು ಉಂಟಾಗಬಹುದು ಎಂದು ತಜ್ಞರು ಅಭಿಪ್ರಾಯಿಸಿದ್ದಾರೆ.
ಆದಾಗ್ಯೂ, ಈ ಪ್ರಸ್ತಾವನೆಯನ್ನು ತಕ್ಷಣವೇ ಜಾರಿಗೆ ತರುತ್ತಿಲ್ಲ ಎಂಬ ವಿಷಯವನ್ನು ನಾವಿಲ್ಲಿ ಗಮನಿಸಬೇಕಿದೆ. ಇದನ್ನು ಮೊದಲು ಅಮೇರಿಕನ್ ಕಾಂಗ್ರೆಸ್ ಪರಿಶೀಲಿಸಿ ಅನುಮೋದಿಸಬೇಕು. ಅಧಿಕೃತ ದಿನಾಂಕವನ್ನು ಹೊರಬೀಳುವವರೆಗೆ ಪ್ರಸ್ತುತ ಹಳೆಯ ನೀತಿ ಮುಂದುವರಿಯಲಿದೆ. ಆದರೂ ಭವಿಷ್ಯದ ಬಗ್ಗೆ ವಿದ್ಯಾರ್ಥಿಗಳಲ್ಲಿ ಹೊಸ ಆತಂಕ ಸೃಷ್ಟಿಯಾಗಿದೆ,(ಏಜೆನ್ಸೀಸ್).