ಟ್ರಂಪ್ ಹೊಸ ಬಾಂಬ್: ವೆನೆಜುವೆಲಾ ಮೇಲಿನ ದಾಳಿಯಲ್ಲಿ ಡಿಸ್ಕಾಂಬೊಬ್ಯುಲೇಟರ್ ಎಂಬ ರಹಸ್ಯ ಆಯುಧ ಬಳಕೆ | Discombobulator

ಈ ಬಗ್ಗೆ ಶ್ವೇತಭವನದಲ್ಲಿ ನಡೆದ ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡಿದ ಟ್ರಂಪ್, ಈ ಆಯುಧದ ಬಗ್ಗೆ ಅತ್ಯಂತ ಅಸ್ಪಷ್ಟ ಆದರೆ ಭಯಾನಕ ವಿವರಗಳನ್ನು ನೀಡಿದ್ದಾರೆ. ನಮ್ಮ ಬಳಿ ಜಗತ್ತು ಇದುವರೆಗೆ ಕಂಡಿರದ ಮತ್ತು ಊಹಿಸಲೂ ಸಾಧ್ಯವಾಗದ ಅದ್ಭುತ ತಂತ್ರಜ್ಞಾನವಿದೆ. ವೆನೆಜುವೆಲಾದಲ್ಲಿ ನಾವು ಈ ಡಿಸ್ಕಾಂಬೊಬ್ಯುಲೇಟರ್ ಅನ್ನು ಬಳಸಿದ್ದೇವೆ. ಇದು ಶತ್ರು ಪಾಳಯವನ್ನು ಸಂಪೂರ್ಣವಾಗಿ ದಿಕ್ಕುತಪ್ಪಿಸುತ್ತದೆ ಮತ್ತು ಅವರ ರಕ್ಷಣಾ ವ್ಯವಸ್ಥೆಯನ್ನು ಕ್ಷಣಾರ್ಧದಲ್ಲಿ ಧ್ವಂಸಗೊಳಿಸುತ್ತದೆ ಎಂದು ಪ್ರತಿಪಾದಿಸಿದ್ದಾರೆ.

ನಮ್ಮ ವಿಜ್ಞಾನಿಗಳು ಮತ್ತು ಮಿಲಿಟರಿ ತಜ್ಞರು ಅದ್ಭುತ ಕೆಲಸ ಮಾಡಿದ್ದಾರೆ. ಇದು ಕೇವಲ ಮಿಸೈಲ್ ಅಥವಾ ಬಾಂಬ್ ಅಲ್ಲ, ಇದು ಅದಕ್ಕೂ ಮಿಗಿಲಾದದ್ದು. ಚೀನಾ ಅಥವಾ ರಷ್ಯಾ ಬಳಿ ಇಂತಹ ತಂತ್ರಜ್ಞಾನ ಇಲ್ಲ. ಅವರು ನಮ್ಮನ್ನು ನೋಡಿ ಅಸೂಯೆ ಪಡುತ್ತಿದ್ದಾರೆ. ನಾವು ಇದನ್ನು ಪರೀಕ್ಷಿಸಿದ್ದೇವೆ ಮತ್ತು ಇದು ಶೇ.100ರಷ್ಟು ಯಶಸ್ವಿಯಾಗಿದೆ ಎಂದು ಟ್ರಂಪ್ ಹೇಳಿದ್ದಾರೆ.

ವೆನೆಜುವೆಲಾದಲ್ಲಿ ಪ್ರಜಾಪ್ರಭುತ್ವದ ಮರುಸ್ಥಾಪನೆ ನಮಗೆ ಮುಖ್ಯವಾಗಿದೆ. ಅಲ್ಲಿನ ಸರ್ವಾಧಿಕಾರಿ ಆಡಳಿತವು ನಮ್ಮ ಎಚ್ಚರಿಕೆಯನ್ನು ನಿರ್ಲಕ್ಷಿಸಿತ್ತು. ಈಗ ಅವರಿಗೆ ಅಮೇರಿಕಾದ ಶಕ್ತಿ ಏನೆಂದು ಅರ್ಥವಾಗಿದೆ. ನಾವು ಶಾಂತಿಯನ್ನು ಬಯಸುತ್ತೇವೆ, ಆದರೆ ನಮ್ಮ ಶಕ್ತಿಯನ್ನು ಪ್ರದರ್ಶಿಸಲು ನಾವು ಹಿಂಜರಿಯುವುದಿಲ್ಲ ಎಂದು ಟ್ರಂಪ್​ ಈ ಸಂದರ್ಭದಲ್ಲಿ ತಿಳಿಸಿದ್ದಾರೆ.

ಫೇಕ್ ನ್ಯೂಸ್ ಮಾಧ್ಯಮಗಳು ಈ ಆಯುಧದ ಬಗ್ಗೆ ಪ್ರಶ್ನೆ ಮಾಡುತ್ತಿವೆ. ಅವರಿಗೆ ಇದರ ರಹಸ್ಯ ತಿಳಿಯುವುದಿಲ್ಲ. ಏಕೆಂದರೆ ಇದು ಅತ್ಯಂತ ರಹಸ್ಯವಾದ ಯೋಜನೆಯಾಗಿದೆ. ನಾವು ಅಮೇರಿಕಾವನ್ನು ಮತ್ತೆ ಸುರಕ್ಷಿತವಾಗಿರಿಸುತ್ತಿದ್ದೇವೆ ಎಂದು ಟ್ರಂಪ್ ಸ್ಪಷ್ಟಪಡಿಸಿದ್ದಾರೆ.

ಟ್ರಂಪ್​ರ ಈ ಹೇಳಿಕೆಯು ಪೆಂಟಗನ್ (ಅಮೇರಿಕಾ ರಕ್ಷಣಾ ಇಲಾಖೆ) ಮತ್ತು ಜಾಗತಿಕ ರಕ್ಷಣಾ ತಜ್ಞರನ್ನು ಇಕ್ಕಟ್ಟಿಗೆ ಸಿಲುಕಿಸಿದೆ. ಅಮೇರಿಕಾ ಸೇನೆಯಲ್ಲಿ ಇಂತಹ ಯಾವುದೇ ಹೆಸರಿನ ಆಯುಧ ಇರುವ ಬಗ್ಗೆ ಅಧಿಕೃತ ದಾಖಲೆಗಳಿಲ್ಲ. ತಜ್ಞರ ಪ್ರಕಾರ, ಇದು ಶತ್ರುಗಳ ರಾಡಾರ್ ವ್ಯವಸ್ಥೆಯನ್ನು ಹಾಳುಮಾಡುವ ಸುಧಾರಿತ ಎಲೆಕ್ಟ್ರಾನಿಕ್ ವಾರ್‌ಫೇರ್ ತಂತ್ರಜ್ಞಾನವಿರಬಹುದು ಅಥವಾ ಕೇವಲ ಶತ್ರು ರಾಷ್ಟ್ರಗಳನ್ನು ಹೆದರಿಸಲು ಟ್ರಂಪ್ ಬಳಸಿದ ಮಾನಸಿಕ ತಂತ್ರ ಇರಬಹುದು ಎಂದು ವಿಶ್ಲೇಷಿಸಲಾಗುತ್ತಿದೆ.

ಟ್ರಂಪ್ ಅವರ ಈ ಹೇಳಿಕೆಯನ್ನು ವೆನೆಜುವೆಲಾ ಸರ್ಕಾರವು ತೀವ್ರವಾಗಿ ಖಂಡಿಸಿದ್ದು, ಇದು ಅಂತಾರಾಷ್ಟ್ರೀಯ ನಿಯಮಗಳ ಉಲ್ಲಂಘನೆ ಮತ್ತು ಸಾರ್ವಭೌಮ ರಾಷ್ಟ್ರದ ಮೇಲಿನ ಬೆದರಿಕೆ ಎಂದು ಬಣ್ಣಿಸಿದೆ. ರಷ್ಯಾ ಮತ್ತು ಚೀನಾ ಕೂಡ ಈ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದು, ಅಮೇರಿಕಾ ಬಾಹ್ಯಾಕಾಶ ಅಥವಾ ನಿಷೇಧಿತ ತಂತ್ರಜ್ಞಾನಗಳನ್ನು ಬಳಸುತ್ತಿದೆಯೇ ಎಂಬ ಅನುಮಾನ ವ್ಯಕ್ತಪಡಿಸಿವೆ,(ಏಜೆನ್ಸೀಸ್).