Restaurant: ಸಾಮಾನ್ಯವಾಗಿ ನಾವು ಯಾವುದಾದರೂ ರೆಸ್ಟೋರೆಂಟ್/ ಹೋಟೆಲ್ಗೆ ಹೋದರೆ, ಅಲ್ಲಿನ ವಾತಾವರಣ, ಊಟ ಹಾಗೂ ಉಣಬಡಿಸುವ ಶೈಲಿ ಮತ್ತು ಆತಿಥ್ಯ ನಮ್ಮ ಗಮನವನ್ನು ಸೆಳೆಯುತ್ತವೆ. ಕೆಲವೆಡೆ ವಿಶೇಷ ಬಗೆಯ ವಸ್ತುಗಳು ಗ್ರಾಹಕರನ್ನು ಆಕರ್ಷಿಸಲೆಂದೇ ಇಡಲಾಗಿರುತ್ತವೆ. ಇವು ಇನ್ನೊಮ್ಮೆ ಅಲ್ಲಿಗೆ ಹೋಗಬೇಕು ಎಂಬ ಭಾವನೆಯನ್ನು ಮೂಡಿಸುತ್ತದೆ. ಇಲ್ಲವೇ, ನಮ್ಮ ಆತ್ಮೀಯರು, ಸಂಬಂಧಿಕರಿಗೆ ಇಂತದ್ದೊಂದು ಹೋಟೆಲ್ ಇದೆ, ನೀವೂ ಹೋಗಿ ಬನ್ನಿ ಎಂದು ಸಲಹೆ ನೀಡುವಂತೆ ಮಾಡುತ್ತವೆ. ಆದ್ರೆ, ಇಲ್ಲೊಂದು ರೆಸ್ಟೋರೆಂಟ್ಗೆ ಹೋಗಿ ಊಟ ಮಾಡಿದ್ರೆ, ಅಲ್ಲಿನ ತಟ್ಟೆಯು ನಿಮ್ಮ ಮನೆಗೆ ಬರಲಿದೆ.
ತಿಂಡಿ ಅಥವಾ ಊಟ ಮಾಡಿದ ಮೇಲೆ, ತಮ್ಮ ತಟ್ಟೆಗಳನ್ನು ಅಲ್ಲಿಯೇ ಬಿಟ್ಟು ಜನ ಕೈತೊಳೆದುಕೊಳ್ಳುತ್ತಾರೆ. ನಂತರ ಕೈಗೆ ಬರುವ ಬಿಲ್ ಅನ್ನು ಕೊಟ್ಟು ತಮ್ಮ ಪ್ರಯಾಣವನ್ನು ಮುಂದುವರೆಸುತ್ತಾರೆ. ಆದರೆ, ಇಲ್ಲಿ ಮಾತ್ರ ನೀವು ಊಟ ಮಾಡಿದ ತಟ್ಟೆಯನ್ನು ಉಡುಗೊರೆಯಾಗಿ ನೀಡುತ್ತಾರೆ. ವಿಶೇಷವಾಗಿ ತಮ್ಮ ಕೈಯಿಂದಲೇ ತಯಾರಿಸುವ ಈ ಪ್ಲೇಟ್ಗಳನ್ನು ಕೊಡುವುದು ಅವರ ಬಹುವರ್ಷಗಳ ಸಂಪ್ರದಾಯ ಎನ್ನಲಾಗಿದೆ.
ಇದು ವಿಚಿತ್ರವೆನಿಸಿದರೂ ಸತ್ಯವೇ. 1964ರಿಂದ ಇಟಲಿಯಲ್ಲಿ ಅಸ್ತಿತ್ವದಲ್ಲಿದ್ದ ಸುಂದರವಾದ ಸಂಪ್ರದಾಯ. 1964ರಲ್ಲಿ ಇಟಲಿಯಲ್ಲಿ ಪ್ರಾರಂಭವಾದ 'ಪಿಯೆಟಿ ಡೆಲ್ ಬ್ಯೂನ್ ರಿಕಾರ್ಡೊ' ಅಥವಾ 'ಪ್ಲೇಟ್ಸ್ ಆಫ್ ಗುಡ್ ಮೆಮೊರೀಸ್' ಎಂಬ ವಿಶಿಷ್ಟ ಸಂಪ್ರದಾಯದ ಪ್ರಕಾರ, ಗ್ರಾಹಕರು ತಮಗೆ ನೀಡುವ ಊಟವನ್ನು ಸ್ಮರಣಾರ್ಥವಾಗಿ ಆನಂದಿಸಿದ ಬಳಿಕ, ಖಾಲಿಯಾದ ತಟ್ಟೆಯನ್ನು ಮನೆಗೆ ತೆಗೆದುಕೊಂಡು ಹೋಗಲು ಅನುಮತಿ ನೀಡಲಾಗಿದೆ.
'ಇಟಾಲಿಯನ್ ಟ್ರಾಟೋರಿಯಾ' ರೆಸ್ಟೋರೆಂಟ್ಗಳು, ಜನರ ಸಂಸ್ಕೃತಿ ಮತ್ತು ಸಂಪ್ರದಾಯದ ಸಂಕೇತಗಳಲ್ಲಿ ಒಂದಾಗಿದೆ. ಇದು ಕೇವಲ ರೆಸ್ಟೋರೆಂಟ್ ಮಾತ್ರವಲ್ಲ, ಸಂಪ್ರದಾಯಗಳು ಮತ್ತು ಮರೆಯಲಾಗದ ಅನುಭವಗಳನ್ನು ನೀಡುವ ಸ್ಥಳ ಎಂದು ಕರೆಯಲಾಗಿದೆ. ಅನೇಕರು ಮತ್ತು ಆಹಾರ ಪ್ರೇಮಿಗಳು, ಈ ಇಟಾಲಿಯನ್ ಟ್ರಾಟೋರಿಯಾಸ್‌ನಲ್ಲಿ ಊಟ ಸವಿದಿದ್ದಾರೆ. 'ಪಿಯಾಟ್ಟಿ ಡೆಲ್ ಬ್ಯೂನ್ ರಿಕಾರ್ಡೊ' ಎಂಬ ಈ ಸುಂದರ ಪದ್ಧತಿಯ ಬಗ್ಗೆ ಕೆಲವೇ ಕೆಲವರು ಮಾತ್ರ ತಿಳಿದಿದ್ದಾರೆ.
ಈ ಯೋಜನೆಯನ್ನು 1960ರ ದಶಕದಲ್ಲಿ ರಾಷ್ಟ್ರೀಯ ಮತ್ತು ಜಾಗತಿಕವಾಗಿ ಟ್ರಾಟೋರಿಯಾಗಳನ್ನು ಉತ್ತೇಜಿಸಲು ವಿನ್ಯಾಸಗೊಳಿಸಲಾಗಿದೆ. ಆರಂಭದಲ್ಲಿ, ಕೇವಲ ಒಂದು ಡಜನ್ ರೆಸ್ಟೋರೆಂಟ್ಗಳು ಭಾಗವಹಿಸಿದ್ದವು. ಕಾಲಾನಂತರದಲ್ಲಿ, ಹೋರಾಟಗಳು ಬೆಳೆಯಿತು ಮತ್ತು 130ಕ್ಕೂ ಹೆಚ್ಚು ರೆಸ್ಟೋರೆಂಟ್ಗಳು ಅದರ ಭಾಗವಾಯಿತು. ಇಂದು ಇಟಲಿ ಮೂಲದ 111 ಅನನ್ಯ ಟ್ರಾಟೋರಿಯಾಗಳು ಈ ವಿಶಿಷ್ಟ ವಿಧಾನದ ಮೂಲಕ ಸ್ಥಳೀಯ ಭಕ್ಷ್ಯಗಳನ್ನು ಗ್ರಾಹಕರಿಗೆ ಉಣಬಡಿಸುತ್ತವೆ.
ಈ ವಿಂಟೇಜ್ ಪ್ಲೇಟ್‌ಗಳು ಜಾಗತಿಕವಾಗಿ ಭಾರಿ ಮೆಚ್ಚುಗೆ ಗಳಿಸಿವೆ. ಈ ಸೆರಾಮಿಕ್ ಪ್ಲೇಟ್ಗಳನ್ನು ಹುಡುಕಲು ಇಟಲಿಯಲ್ಲಿನ ಪುರಾತನ ಅಂಗಡಿಗಳು ಮತ್ತು ಪ್ರಸಿದ್ಧ ಮೇಳಗಳನ್ನು ಜನರು ದೇಶ-ವಿದೇಶಗಳಿಂದ ಹುಡುಕಿ ಬರುತ್ತಾರೆ ಎನ್ನಲಾಗಿದೆ. ಒಂದು ಕಾಲದಲ್ಲಿ ಆಹಾರ ಪ್ರಿಯರಿಗೆ ಮಾತ್ರ ಸೀಮಿತವಾಗಿದ್ದ ಈ ಪದ್ಧತಿ, ಸಾಮಾಜಿಕ ಜಾಲತಾಣ ಬಂದ ಮೇಲಂತು ಸಾಕಷ್ಟು ಜನಪ್ರಿಯತೆಯನ್ನು ಗಳಿಸಿದೆ.
ಈ ಸಂಪ್ರದಾಯದ ಹಿಂದಿನ ಪ್ರಮುಖ ವ್ಯಕ್ತಿ ಡಿನೋ ವಿಲ್ಲಾನಿ. ಹೊಸ ಟ್ರೆಂಡ್‌ಗಳನ್ನು ಕಂಡುಹಿಡಿದು ಅವುಗಳನ್ನು ಮಾರ್ಕೆಟಿಂಗ್ ಮಾಡುವ ವಿಶೇಷ ಪ್ರತಿಭೆಯನ್ನು ಹೊಂದಿರುವ ಇವರು ಆರಂಭದಲ್ಲಿ ಉದ್ಯಮಿಯಾಗಿದ್ದರು. 20ನೇ ಶತಮಾನದ ಇಟಲಿಯಲ್ಲಿ '5,000 ಲೈರ್ ಫಾರ್ ಎ ಸ್ಮೈಲ್' ಸ್ಪರ್ಧೆಯಂತಹ ಅನೇಕ ಮರೆಯಲಾಗದ ಸಾಂಸ್ಕೃತಿಕ ಕಾರ್ಯಕ್ರಮಗಳ ರೂವಾರಿಯಾಗಿದ್ದರು.
ವಿಶ್ವ ಸಮರ IIರ ನಂತರ ಸೂಪರ್ಮಾರ್ಕೆಟ್ಗಳು ಗಣನೀಯವಾಗಿ ಹೆಚ್ಚಳವಾದವು ಮತ್ತು ಸಮಾಜದಲ್ಲಿ ರೈತರ ಪ್ರಾಮುಖ್ಯತೆಯು ಕ್ಷೀಣಿಸಿದಾಗ, ವಿಲ್ಲಾನಿ ಈ ಯೋಜನೆಯನ್ನು ಪ್ರಾರಂಭಿಸಿದರು. ಆ ಸಮಯದಲ್ಲಿ, ಯುವ ಇಟಾಲಿಯನ್ನರಲ್ಲಿ ಫ್ರೆಂಚ್-ಪ್ರಭಾವಿತ ಮೆನುಗಳು ಹೆಚ್ಚು ಜನಪ್ರಿಯವಾಗುತ್ತಿದ್ದವು. ಇಟಾಲಿಯನ್ ಪಾಕಪದ್ಧತಿಯನ್ನು ಮುಂಚೂಣಿಯಲ್ಲಿಡಲು ಆಸೆಪಟ್ಟ ವಿಲ್ಲಾನಿಯ ಕಲ್ಪನೆಯು ಬಹಳ ಸರಳವಾಗಿತ್ತು. ಸ್ಥಳೀಯ ವಿಶೇಷತೆಯನ್ನು ಆರ್ಡರ್ ಮಾಡಿ ಮತ್ತು ಆನಂದಿಸಿ. ನಿಮ್ಮ ಊಟದ ನಂತರ ನಮ್ಮ ಕೈಯಿಂದ ಮಾಡಿದ ಸೆರಾಮಿಕ್ ಪ್ಲೇಟ್ ಅನ್ನು ಮನೆಗೆ ತೆಗೆದುಕೊಂಡು ಹೋಗಿ ಎಂಬುದಾಗಿತ್ತು.
ಈ ಸುಂದರವಾದ ಪ್ಲೇಟ್ಗಳ ಹಿಂದೆ ಅಮಾಲ್ಫಿ ಕರಾವಳಿಯ ವಿಯೆಟ್ರಿ ಸುಲ್ ಮೇರ್ ಮೂಲದ ಸೆರಾಮಿಚೆ ಆರ್ಟಿಸ್ಟಿಚೆ ಸೊಲಿಮೆನಾ ಕುಶಲಕರ್ಮಿಗಳ ಕೈಗಳಿವೆ. ಒಗ್ಲಿಯಾರಾ ಕ್ವಾರಿಗಳಿಂದ ಕಚ್ಚಾ ಜೇಡಿಮಣ್ಣಿನಿಂದ ತಯಾರಿಸಲಾಗುತ್ತದೆ. ಈ ಪ್ಲೇಟ್ಗಳನ್ನು ಸಂಪೂರ್ಣವಾಗಿ ಕೈಯಿಂದಲೇ ಚಿತ್ರಿಸಲಾಗಿದೆ ಎಂದು ಹೇಳಿದ್ದಾರೆ.
ಇಂದು ಊಟದ ಮೇಜುಗಳಲ್ಲಿ, 'ಬ್ಯುನ್ ರಿಕಾರ್ಡೊ' ಪ್ರಧಾನವಾಗಿಯೇ ಉಳಿದಿದೆ. ಇಬೇ (eBay) ನಂತಹ ಆನ್‌ಲೈನ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಈ ಖಾದ್ಯದ ಪ್ಲೇಟ್‌ಗಾಗಿ ಬಿಡ್ಡಿಂಗ್ ಮೂರು ಯೂರೋಗಳಿಂದ 150 ಯೂರೋಗಳವರೆಗೆ ಇರುತ್ತದೆ. "ನಾವು ಈ ಸಂಪ್ರದಾಯವನ್ನು ಗೌರವಿಸಲು ಬಯಸುತ್ತೇವೆ ಮತ್ತು ಅದಕ್ಕೆ ಸಮಕಾಲೀನ ಸ್ಪರ್ಶವನ್ನು ನೀಡುತ್ತೇವೆ. ಇದಕ್ಕಾಗಿ ನಾವು 12 ವಿಭಿನ್ನ ಕಲಾವಿದರನ್ನು ನಿಯೋಜಿಸಿದ್ದೇವೆ ಮತ್ತು ಅವರು ನಮಗಾಗಿ 39 ವಿಶಿಷ್ಟ ಡಿಸೈನ್ಗಳನ್ನು ರಚಿಸಿದ್ದಾರೆ" ಎಂದು ಪೀಡ್‌ಮಾಂಟೆಸ್ ಮೂಲದ ರಾಬರ್ಟಾ ಸೆರೆಟೊ ಹೇಳಿದ್ದಾರೆ,(ಏಜೆನ್ಸೀಸ್).