ನರಕದ ಬಾಗಿಲು ತೆರೆದಿದೆ, ಧೈರ್ಯವಿದ್ದರೆ ಒಳಗೆ ಬನ್ನಿ! ಅಮೆರಿಕದ ಭೂಸೇನೆಗೆ ಇರಾನ್ ಇರಾನ್ ವಿದೇಶಾಂಗ ಸಚಿವ ಓಪನ್ ಚಾಲೆಂಜ್ | Abbas Araghchi

ಈ ಬಗ್ಗೆ ಅಲ್ ಜಜೀರಾ ವಾಹಿನಿಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ ಅರಾಘ್ಚಿ, ಅಮೆರಿಕದ ಭೂಸೇನೆ ನಮ್ಮ ದೇಶದೊಳಗೆ ಕಾಲಿಡಲು ಧೈರ್ಯ ಮಾಡುತ್ತದೆ ಎಂದು ನಾವು ನಂಬುವುದಿಲ್ಲ. ಒಂದು ವೇಳೆ ಅವರು ಅಂತಹ ಸಾಹಸಕ್ಕೆ ಕೈಹಾಕಿದರೆ, ನಾವು ಅವರಿಗಾಗಿ ಕಾಯುತ್ತಿದ್ದೇವೆ ಎಂದು ಗುಡುಗಿದ್ದಾರೆ.

ಪ್ರಬಲ ಪ್ರತಿರೋಧ: ಇರಾನ್‌ನ ಸೈನ್ಯವು ಕೇವಲ ಕ್ಷಿಪಣಿ ದಾಳಿಗೆ ಸೀಮಿತವಾಗಿಲ್ಲ, ಭೂಮಿಯ ಮೇಲಿನ ನೇರ ಯುದ್ಧದಲ್ಲಿ ಅಮೆರಿಕವನ್ನು ಮಣ್ಣುಮುಕ್ಕಿಸಲು ನಮ್ಮ ಪಡೆಗಳು ಹೆಚ್ಚು ಸಮರ್ಥವಾಗಿವೆ ಎಂದು ಅರಾಘ್ಚಿ ಪ್ರತಿಪಾದಿಸಿದ್ದಾರೆ.

ದೂತಾವಾಸದ ಸಂಪರ್ಕ: ಉದ್ವಿಗ್ನತೆಯ ನಡುವೆಯೂ ಟ್ರಂಪ್ ಅವರ ವಿಶೇಷ ಪ್ರತಿನಿಧಿ ಸ್ಟೀವ್ ವಿಟ್ಕಾಫ್ ಅವರೊಂದಿಗೆ ಸಂಪರ್ಕ ಇರುವುದನ್ನು ಅವರು ದೃಢಪಡಿಸಿದ್ದಾರೆ. ಆದರೆ, ಸದ್ಯಕ್ಕೆ ಯಾವುದೇ ಅಧಿಕೃತ ಮಾತುಕತೆ ಅಥವಾ ಸಂಧಾನದ ಸಾಧ್ಯತೆಯನ್ನು ಅಬ್ಬಾಸ್ ತಳ್ಳಿಹಾಕಿದ್ದಾರೆ.

ಜಗತ್ತಿನ ತೈಲ ಪೂರೈಕೆಯ ಶೇ. 20ರಷ್ಟು ಭಾಗ ಸಾಗುವ ಹಾರ್ಮುಜ್ ಜಲಸಂಧಿಯ ಭವಿಷ್ಯದ ಬಗ್ಗೆ ಅರಾಘ್ಚಿ ಸ್ಪಷ್ಟಪಡಿಸಿದ್ದಾರೆ.

ಶತ್ರುಗಳಿಗೆ ದಿಗ್ಬಂಧನ: ನಮ್ಮೊಂದಿಗೆ ಯುದ್ಧ ಮಾಡುತ್ತಿರುವ ದೇಶಗಳ ಹಡಗುಗಳಿಗೆ ಮಾತ್ರ ಈ ಜಲಸಂಧಿಯನ್ನು ಮುಚ್ಚಲಾಗಿದೆ. ಶತ್ರು ರಾಷ್ಟ್ರಗಳ ಹಡಗುಗಳು ನಮ್ಮ ಜಲಪ್ರದೇಶವನ್ನು ಬಳಸಲು ಬಿಡುವುದಿಲ್ಲ ಎಂದು ಇರಾನ್​ ವಿದೇಶಾಂಗ ಸಚಿವ ಹೇಳಿದ್ದಾರೆ.

ಮಿತ್ರ ರಾಷ್ಟ್ರಗಳಿಗೆ ಮುಕ್ತ: ಪ್ರಸ್ತುತ ಉದ್ವಿಗ್ನತೆಯ ನಡುವೆಯೂ ಭಾರತ, ಪಾಕಿಸ್ತಾನ, ಟರ್ಕಿ ಮತ್ತು ಚೀನಾ ದೇಶಗಳ ಹಡಗುಗಳು ಇರಾನ್‌ನ ಸಹಕಾರದೊಂದಿಗೆ ಈ ಮಾರ್ಗದಲ್ಲಿ ಸಂಚರಿಸುತ್ತಿವೆ ಎಂದು ಅಬ್ಬಾಸ್ ತಿಳಿಸಿದ್ದಾರೆ.

ಒಮಾನ್ ಜೊತೆ ನಿರ್ಧಾರ: ಯುದ್ಧ ಮುಗಿದ ನಂತರ ಈ ಜಲಸಂಧಿಯ ಭವಿಷ್ಯದ ಬಗ್ಗೆ ಇರಾನ್ ಮತ್ತು ಒಮಾನ್ ರಾಷ್ಟ್ರಗಳು ಜಂಟಿಯಾಗಿ ನಿರ್ಧಾರ ತೆಗೆದುಕೊಳ್ಳಲಿವೆ ಎಂದು ಅವರು ಹೇಳಿದ್ದಾರೆ.

ಇನ್ನೊಂದೆಡೆ, ಅಮೆರಿಕವು ಗಲ್ಫ್ ಪ್ರದೇಶದಲ್ಲಿ ತನ್ನ ಸೈನಿಕರ ಸಂಖ್ಯೆಯನ್ನು ಗಣನೀಯವಾಗಿ ಹೆಚ್ಚಿಸುತ್ತಿದೆ. ನೌಕಾಪಡೆ ಮತ್ತು ವೈಮಾನಿಕ ದಾಳಿಯ ಆಚೆಗೆ, ಇರಾನ್‌ನ ಯುರೇನಿಯಂ ದಾಸ್ತಾನುಗಳನ್ನು ವಶಪಡಿಸಿಕೊಳ್ಳಲು ಭೂಸೇನಾ ಕಾರ್ಯಾಚರಣೆಯ ಬಗ್ಗೆ ವಾಷಿಂಗ್ಟನ್‌ನಲ್ಲಿ ಗಂಭೀರ ಚರ್ಚೆಗಳು ನಡೆಯುತ್ತಿವೆ. ಇದು ಈ ಭಾಗದಲ್ಲಿ ಅಂದರೆ ಅತ್ಯಂತ ಕೆಟ್ಟ ಪರಿಸ್ಥಿತಿಗೆ ನಾಂದಿ ಹಾಡಬಹುದು ಎಂಬ ಭೀತಿ ಮೂಡಿಸಿದೆ.

ಇರಾನ್ ಕೇವಲ ತನ್ನ ಸ್ವಂತ ಬಲವನ್ನು ನಂಬಿಲ್ಲ. ರಷ್ಯಾದ ಚೆಚೆನ್ ಫೈಟರ್ಸ್ ಬೆಂಬಲದ ವದಂತಿಗಳು ಮತ್ತು ಪ್ರಾದೇಶಿಕವಾಗಿ ಸಕ್ರಿಯವಾಗಿರುವ ತನ್ನದೇ ಆದ 'ಪ್ರಾಕ್ಸಿ' ಪಡೆಗಳ ಬಲ ಇರಾನ್‌ಗೆ ಇದೆ. ಅಮೆರಿಕದ ವಿರುದ್ಧ ಕಾಲು ಕತ್ತರಿಸುವ ಎಚ್ಚರಿಕೆ ನೀಡಿರುವುದು ಇದೇ ಹಿನ್ನೆಲೆ ಆಗಿದೆ.

ಒಟ್ಟಾರೆಯಾಗಿ, ಏಪ್ರಿಲ್ 1ರ ಇಂದಿನ ಸ್ಥಿತಿಯಂತೆ, ಇರಾನ್ ಮತ್ತು ಅಮೆರಿಕ ನಡುವಿನ ಮಾತುಕತೆಯ ಹಾದಿ ಮುಚ್ಚಿದ್ದು, ರಣಕಹಳೆ ಮೊಳಗುವ ಸಾಧ್ಯತೆ ದಟ್ಟವಾಗಿದೆ. ಭೂಸೇನಾ ಯುದ್ಧ ಆರಂಭವಾದರೆ ಅದು ಆಧುನಿಕ ಇತಿಹಾಸದ ಅತ್ಯಂತ ಭೀಕರ ಸಂಘರ್ಷವಾಗಲಿದೆ,(ಏಜೆನ್ಸೀಸ್).