ಟೇಕ್-ಆಫ್ ವೇಳೆ ಪತನಗೊಂಡ ಖಾಸಗಿ ಜೆಟ್; 8 ಪ್ರಯಾಣಿಕರ ಸ್ಥಿತಿ ಗಂಭೀರ! | Plane Crash

ಫೆಡರಲ್ ಏವಿಯೇಷನ್ ​​ಅಡ್ಮಿನಿಸ್ಟ್ರೇಷನ್ (FAA) ನೀಡಿರುವ ಮಾಹಿತಿಯ ಪ್ರಕಾರ, 'ಬಾಂಬಾರ್ಡಿಯರ್ ಚಾಲೆಂಜರ್ 600' ಎಂಬ ವಾಣಿಜ್ಯ ಬಳಕೆಯ ಖಾಸಗಿ ಜೆಟ್ ವಿಮಾನವು ಸ್ಥಳೀಯ ಕಾಲಮಾನ ರಾತ್ರಿ 7:45ರ ಸುಮಾರಿಗೆ ಅಪಘಾತಕ್ಕೀಡಾಗಿದೆ. ಟೇಕ್-ಆಫ್ ಆಗುತ್ತಿದ್ದಂತೆಯೇ ವಿಮಾನವು ನಿಯಂತ್ರಣ ತಪ್ಪಿ ನೆಲಕ್ಕೆ ಅಪ್ಪಳಿಸಿದೆ. ವಿಮಾನದಲ್ಲಿದ್ದ ಎಂಟು ಪ್ರಯಾಣಿಕರ ಪ್ರಸ್ತುತ ಸ್ಥಿತಿಯ ಬಗ್ಗೆ ಇನ್ನೂ ಅಧಿಕೃತ ಮಾಹಿತಿ ಲಭ್ಯವಾಗಿಲ್ಲ. ಘಟನೆ ನಡೆದ ಕೂಡಲೇ ವಿಮಾನ ನಿಲ್ದಾಣದ ತುರ್ತು ಸೇವಾ ತಂಡಗಳು ಸ್ಥಳಕ್ಕೆ ಧಾವಿಸಿ ರಕ್ಷಣಾ ಕಾರ್ಯಾಚರಣೆ ಆರಂಭಿಸಿವೆ.

ಪ್ರಸ್ತುತ ನ್ಯೂ ಇಂಗ್ಲೆಂಡ್ ಸೇರಿದಂತೆ ಅಮೆರಿಕದ ಬಹುತೇಕ ಭಾಗಗಳಲ್ಲಿ ಭೀಕರ ಹಿಮಮಾರುತ (Winter Storm) ಅಬ್ಬರಿಸುತ್ತಿದೆ. ಭಾನುವಾರ ಬ್ಯಾಂಗೋರ್ ಪ್ರದೇಶದಲ್ಲಿ ನಿರಂತರವಾಗಿ ಹಿಮಪಾತವಾಗುತ್ತಿತ್ತು. ವಿಪರೀತ ಹಿಮ, ಮಳೆ ಮತ್ತು ಮಂಜಿನಿಂದಾಗಿ ದೃಷ್ಟಿ ಗೋಚರತೆ ಕಡಿಮೆಯಾಗಿದ್ದು, ಇದೇ ಅಪಘಾತಕ್ಕೆ ಪ್ರಮುಖ ಕಾರಣವಿರಬಹುದು ಎಂದು ಶಂಕಿಸಲಾಗಿದೆ. ಈ ಹಿಮಮಾರುತದಿಂದಾಗಿ ಈಗಾಗಲೇ ಅಮೆರಿಕದಾದ್ಯಂತ ಸುಮಾರು 12,000 ವಿಮಾನಗಳನ್ನು ರದ್ದುಗೊಳಿಸಲಾಗಿದ್ದು, 20,000ಕ್ಕೂ ಹೆಚ್ಚು ವಿಮಾನಗಳು ವಿಳಂಬವಾಗಿವೆ.

ಅಪಘಾತದ ಬೆನ್ನಲ್ಲೇ ಬ್ಯಾಂಗೋರ್ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ತಾತ್ಕಾಲಿಕವಾಗಿ ಮುಚ್ಚಲಾಗಿದೆ. ಫೆಡರಲ್ ಏವಿಯೇಷನ್ ​​ಅಡ್ಮಿನಿಸ್ಟ್ರೇಷನ್ ಮತ್ತು ರಾಷ್ಟ್ರೀಯ ಸಾರಿಗೆ ಸುರಕ್ಷತಾ ಮಂಡಳಿಯು ಜಂಟಿಯಾಗಿ ತನಿಖೆಯನ್ನು ಆರಂಭಿಸಿವೆ.

ಬಾಂಬಾರ್ಡಿಯರ್ ಚಾಲೆಂಜರ್ 600 ವಿಮಾನವು 9 ರಿಂದ 11 ಪ್ರಯಾಣಿಕರನ್ನು ಹೊತ್ತೊಯ್ಯುವ ಸಾಮರ್ಥ್ಯ ಹೊಂದಿರುವ ಅತ್ಯಾಧುನಿಕ 'ವೈಡ್-ಬಾಡಿ' ಬಿಸಿನೆಸ್ ಜೆಟ್ ಆಗಿದೆ. ಆದರೆ, ಈ ಭೀಕರ ಹಿಮದ ವಾತಾವರಣದಲ್ಲಿ ಇಂತಹ ಪ್ರೀಮಿಯಂ ವಿಮಾನವೂ ಅಪಘಾತಕ್ಕೀಡಾಗಿರುವುದು ವಾಯುಯಾನ ಸುರಕ್ಷತೆಯ ಬಗ್ಗೆ ಕಳವಳ ಮೂಡಿಸಿದೆ,(ಏಜೆನ್ಸೀಸ್​).