ಸುಂಕ ಸಮರ: ಚೀನಾ ಜೊತೆಗಿನ ಒಪ್ಪಂದಕ್ಕೆ ಕೆನಡಾ ಮುಂದಾದರೆ ಶೇ.100ರಷ್ಟು ಸುಂಕ ಹೇರುವುದಾಗಿ ಟ್ರಂಪ್ ಗುಡುಗು | Donald Trump

ಈ ಟ್ರುತ್ ಸೋಶಿಯಲ್​ನಲ್ಲಿ ಪೋಸ್ಟ್ ಮಾಡಿರುವ ಟ್ರಂಪ್, ಕೆನಡಾದ ಪ್ರಧಾನಿ ಮಾರ್ಕ್ ಕಾರ್ನಿಯ ಹೆಸರನ್ನು ನೇರವಾಗಿ ಉಲ್ಲೇಖಿಸಿ ಟೀಕಿಸಿದ್ದಾರೆ.

ಗವರ್ನರ್ ಕಾರ್ನಿ ಕೆನಡಾವನ್ನು ಚೀನಾದ ಸರಕುಗಳು ಅಮೆರಿಕಕ್ಕೆ ಪ್ರವೇಶಿಸಲು ಒಂದು ಡ್ರಾಪ್-ಆಫ್ ಪೋರ್ಟ್ ಮಾಡಲು ಹೊರಟಿದ್ದರೆ ಅದು ಅವರ ದೊಡ್ಡ ತಪ್ಪು. ಚೀನಾ ಇಡೀ ಕೆನಡಾವನ್ನು ನುಂಗಿ ಹಾಕಲಿದೆ. ಅಲ್ಲಿನ ಉದ್ಯಮಗಳು ಮತ್ತು ಸಾಮಾಜಿಕ ವ್ಯವಸ್ಥೆಯನ್ನು ನಾಶಪಡಿಸಲಿದೆ. ಒಂದು ವೇಳೆ ಕೆನಡಾ ಚೀನಾದೊಂದಿಗೆ ಒಪ್ಪಂದ ಮಾಡಿಕೊಂಡರೆ, ತಕ್ಷಣವೇ ಕೆನಡಾದ ಎಲ್ಲಾ ಉತ್ಪನ್ನಗಳ ಮೇಲೆ ಶೇ.100ರಷ್ಟು ಸುಂಕ ಹೇರಲಾಗುವುದು ಎಂದು ಟ್ರಂಪ್ ಎಚ್ಚರಿಸಿದ್ದಾರೆ.

ಇತ್ತೀಚೆಗೆ ಕೆನಡಾ ಪ್ರಧಾನಿ ಮಾರ್ಕ್ ಕಾರ್ನಿ ಅವರು ಚೀನಾ ಪ್ರವಾಸ ಕೈಗೊಂಡು, ಕೆನಡಾದ ಕೃಷಿ ಉತ್ಪನ್ನಗಳ ಮೇಲಿನ ಸುಂಕ ಕಡಿತಕ್ಕೆ ಬದಲಾಗಿ ಚೀನಾದ ಎಲೆಕ್ಟ್ರಿಕ್ ವಾಹನಗಳಿಗೆ (EV) ಕೆನಡಾ ಮಾರುಕಟ್ಟೆಯಲ್ಲಿ ಅವಕಾಶ ನೀಡುವ ಕುರಿತು ಒಪ್ಪಂದ ಮಾಡಿಕೊಂಡಿದ್ದರು. ಈ ಕ್ರಮವು ಅಮೆರಿಕದ ಹಿತಾಸಕ್ತಿಗೆ ವಿರುದ್ಧವಾಗಿದೆ ಎಂಬುದು ಟ್ರಂಪ್ ಅವರ ವಾದ.

ವಾಹನ ಉದ್ಯಮಕ್ಕೆ ಹೊಡೆತ: ಅಮೆರಿಕ ಮತ್ತು ಕೆನಡಾ ನಡುವಿನ ವಾಹನ ಬಿಡಿಭಾಗಗಳ ಸರಬರಾಜು ಸಂಪೂರ್ಣವಾಗಿ ಸ್ಥಗಿತಗೊಳ್ಳಬಹುದು.

ಇಂಧನ ಬೆಲೆ ಏರಿಕೆ: ಅಮೆರಿಕಕ್ಕೆ ಕಚ್ಚಾ ತೈಲ ಮತ್ತು ವಿದ್ಯುತ್ ಪೂರೈಸುವ ಅತಿದೊಡ್ಡ ದೇಶ ಕೆನಡಾ. ಸುಂಕ ಹೆಚ್ಚಾದರೆ ಅಮೆರಿಕದಲ್ಲಿ ಇಂಧನ ಬೆಲೆ ಗಗನಕ್ಕೇರಲಿದೆ.

ದೈನಂದಿನ ವಸ್ತುಗಳ ಅಭಾವ: ಗೋಧಿ, ಮರಮುಟ್ಟು ಮತ್ತು ಡೈರಿ ಉತ್ಪನ್ನಗಳ ಬೆಲೆ ಎರಡೂ ದೇಶಗಳಲ್ಲಿ ಏರಿಕೆಯಾಗಲಿದೆ.

ಅಮೆರಿಕ, ಮೆಕ್ಸಿಕೋ ಮತ್ತು ಕೆನಡಾ ನಡುವಿನ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ (USMCA) ಈ ಬೆಳವಣಿಗೆಯಿಂದ ದೊಡ್ಡ ಅಪಾಯ ಎದುರಾಗಿದೆ. ಟ್ರಂಪ್ ಅವರ ಈ ನಿಲುವು ಕೇವಲ ವ್ಯಾಪಾರಕ್ಕೆ ಸೀಮಿತವಾಗಿಲ್ಲ, ಬದಲಾಗಿ ಕೆನಡಾ ಅಮೆರಿಕದ ಪರವಾಗಿರುತ್ತದೆಯೇ ಅಥವಾ ಚೀನಾದ ಪರವಾಗಿರುತ್ತದೆಯೇ ಎಂದು ಆರಿಸಿಕೊಳ್ಳಲು ನೀಡಿದ ಅಂತಿಮ ಗಡುವು ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ಓಟಾವಾ (ಕೆನಡಾ ಸರ್ಕಾರ) ಇನ್ನು ಈ ಬಗ್ಗೆ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲವಾದರೂ, ಕೆನಡಾದ ಆರ್ಥಿಕ ಸ್ವಾತಂತ್ರ್ಯದ ವಿಷಯದಲ್ಲಿ ತಾವು ರಾಜಿ ಮಾಡಿಕೊಳ್ಳುವುದಿಲ್ಲ ಎಂಬ ಸಂಕೇತವನ್ನು ಮಾರ್ಕ್ ಕಾರ್ನಿ ಆಡಳಿತ ನೀಡಿದೆ,(ಏಜೆನ್ಸೀಸ್).