ಆಗಸದಿಂದ ಜಿಗಿಯುವಾಗ ವಿಮಾನದ ಬಾಲಕ್ಕೆ ಪ್ಯಾರಾಚೂಟ್​ ಸಿಲುಕಿ ನೇತಾಡಿದ ಸ್ಕೈ ಡೈವರ್​! ಮುಂದೇನಾಯ್ತು? Skydiver

ಸಿಡ್ನಿ: ಭೂಮಿಯಿಂದ ಸಾವಿರಾರು ಮೀಟರ್ ಎತ್ತರದಲ್ಲಿ ವಿಮಾನದಿಂದ ಕೆಳಗೆ ಜಿಗಿಯುವಾಗ ( Skydiver ) ಬೆನ್ನಿಗೆ ಕಟ್ಟಿಕೊಂಡ ಪ್ಯಾರಾಚೂಟ್​ ವಿಮಾನದ ಬಾಲಕ್ಕೆ ಸಿಲುಕಿಕೊಂಡರೆ ಪರಿಸ್ಥಿತಿ ಹೇಗಿರುತ್ತದೆ ಅಂತ ಒಮ್ಮೆ ಊಹಿಸಿ. ನೆನೆಸಿಕೊಂಡರೆ ಸಾಕು ಜೀವ ಬಾಯಿಗೆ ಬರುತ್ತದೆ. ಹೀಗಿರುವಾಗ ಇಂಥದ್ದೊಂದು ಸನ್ನಿವೇಶ ಆಸ್ಟ್ರೇಲಿಯಾದಲ್ಲಿ ನಿಜವಾಗಿಯೂ ನಡೆದಿದ್ದು, ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಿಕ್ಕಾಪಟ್ಟೆ ವೈರಲ್​ ಆಗಿದೆ.

ಸ್ಕೈ ಡೈವರ್​ ಒಬ್ಬರು ಸಂಭವನೀಯ ಅಪಘಾತದಿಂದ ಅದೃಷ್ಟವಶಾತ್ ಬಚಾವ್​ ಆಗಿದ್ದಾರೆ. ಈ ಘಟನೆ ಆಸ್ಟ್ರೇಲಿಯಾದ​​ ಕೈರ್ನ್ಸ್ ನಗರದ ದಕ್ಷಿಣ ಭಾಗದಲ್ಲಿ ಕಳೆದ ಸೆಪ್ಟೆಂಬರ್‌ ತಿಂಗಳಿನಲ್ಲೇ ನಡೆದಿದೆ. ಯಾವಾಗ ಸಾರಿಗೆ ಸುರಕ್ಷತಾ ಇಲಾಖೆಯ ಅಧಿಕಾರಿಗಳು ತನಿಖೆ ನಡೆಸಿದರೋ ಆ ಬಳಿಕ ಈ ಘಟನೆ ಬೆಳಕಿಗೆ ಬಂದಿದೆ.

ಘಟನೆಯ ವಿವರಕ್ಕೆ ಬರುವುದಾದರೆ, ಸುಮಾರು 15,000 ಅಡಿ (4,600 ಮೀಟರ್) ಎತ್ತರದಲ್ಲಿ ಪ್ಯಾರಾಚೂಟಿಸ್ಟ್‌ಗಳು 16- ವೇ ಫಾರ್ಮೇಶನ್​ಗೆ ಪ್ಲಾನ್​ ಮಾಡಿದ್ದರು. ಇದನ್ನು ಪ್ಯಾರಾಚೂಟಿಂಗ್ ಕ್ಯಾಮೆರಾ ಆಪರೇಟರ್ ಚಿತ್ರೀಕರಿಸಲು ರೆಡಿಯಾಗಿದ್ದರು. ಈ ವೇಳೆ ಮೊದಲ ಸ್ಪರ್ಧಿ ವಿಮಾನದ ನಿರ್ಗಮನ ದ್ವಾರದ ಬಳಿ ಬಂದು, ಕೆಳಗೆ ಜಿಗಿಯಲು ಮುಂದಾದಾಗ ಇದ್ದಕ್ಕಿದ್ದಂತೆ ಕಿತ್ತಳೆ ಬಣ್ಣದ ಪ್ಯಾರಾಚೂಟ್​ ಓಪನ್​ ಆಯಿತು. ಇದೇ ವೇಳೆ ಪ್ಯಾರಾಚೂಟಿಂಗ್ ಕ್ಯಾಮೆರಾ ಆಪರೇಟರ್ ಒಂದು ತುದಿಯಲ್ಲಿ ಇದ್ದರು. ಓಪನ್​ ಆದ ಪ್ಯಾರಾಚೂಟ್​ ಗಾಳಿಗೆ ತೂರಿ, ಸ್ಕೈ ಡೈವರ್​ ಸಮೇತ ಎಳೆದೊಯ್ಯುವಾಗ​ ಪ್ಯಾರಾಚೂಟಿಂಗ್ ಕ್ಯಾಮೆರಾ ಆಪರೇಟರ್​ಗೆ ಡಿಕ್ಕಿಯಾಯಿತು. ಇದರಿಂದ ಆಪರೇಟರ್​ ಕೆಳಗೆ ಬಿದ್ದರೆ, ಸ್ಕೈ ಡೈವರ್​ ವಿಮಾನದ ಬಾಲದಲ್ಲಿ ಪ್ಯಾರಾಚೂಟ್​ ಸಮೇತ ಸಿಲುಕಿಕೊಂಡು ನೇತಾಡಿದರು. ಇದೇ ವೇಳೆ ಇನ್ನುಳಿದ ಪ್ಯಾರಾಚೂಟಿಸ್ಟ್​ಗಳು ಕೆಳಗೆ ಜಿಗಿದರು.

ಇದಾದ ನಂತರ ವಿಮಾನದ ಬಾಲದಲ್ಲಿ ಸಿಲುಕಿಕೊಂಡಿದ್ದ ಸ್ಕೈ ಡೈವರ್​ ಹರಿತವಾದ ಆಯುಧದಿಂದ ಮೀಸಲು ಪ್ಯಾರಾಚೂಟ್​ನ ಹಗ್ಗಗಳನ್ನು ಕತ್ತರಿಸಿ, ಮುಖ್ಯವಾದ ಪ್ಯಾರಾಚೂಟ್​ ಓಪನ್​ ಮಾಡಿ ಸುರಕ್ಷಿತವಾಗಿ ನೆಲದ ಮೇಲೆ ಲ್ಯಾಂಡ್​ ಆದರು. ಸಂಭವನೀಯ ಭಾರಿ ದುರಂತದಿಂದ ಸ್ಕೈ ಡೈವರ್​ ಅಚ್ಚರಿಯ ರೀತಿಯಲ್ಲಿ ಬದುಕುಳಿದರು.

ಅಂದಹಾಗೆ, ಸ್ಕೈ ಡೈವಿಂಗ್​ ವೇಳೆ ಕೊಕ್ಕೆ ಚಾಕುವನ್ನು ಹೊತ್ತೊಯ್ಯುವುದು ಕಡ್ಡಾಯವಲ್ಲದಿದ್ದರೂ ಈ ರೀತಿ ಅಕಾಲಿಕವಾಗಿ ಮೀಸಲು ಪ್ಯಾರಾಚೂಟ್ ಓಪನ್​ ಆದಂತಹ ಸಂದರ್ಭದಲ್ಲಿ ಅದೇ ಚಾಕು ಜೀವ ಉಳಿಸುವ ಸಾಧನವಾಗಬಹುದು ಎಂದು ಆಸ್ಟ್ರೇಲಿಯಾದ ಸಾರಿಗೆ ಸುರಕ್ಷತಾ ಇಲಾಖೆಯ ಮುಖ್ಯ ಆಯುಕ್ತ ಆಂಗಸ್ ಮಿಚೆಲ್ ಹೇಳಿದ್ದಾರೆ.

ಇನ್ನು ಈ ಘಟನೆಯಿಂದ ವಿಮಾನದ ಬಾಲಕ್ಕೆ ತುಂಬಾ ಹಾನಿಯಾಯಿತು. ಆದರೂ ಪೈಲಟ್‌, ವಿಮಾನದ ಮೇಲಿನ ನಿಯಂತ್ರಣವನ್ನು ಕಳೆದುಕೊಳ್ಳದೆ ಮೇಡೇ ವಿಪತ್ತು ಕರೆ ನೀಡಿ, ವಿಮಾನವನ್ನು ಸುರಕ್ಷಿತವಾಗಿ ನೆಲದ ಮೇಲೆ ಲ್ಯಾಂಡ್​ ಮಾಡುವಲ್ಲಿ ಯಶಸ್ವಿಯಾದರು, (ಏಜೆನ್ಸೀಸ್​).