ಮೊಹಮ್ಮದ್​​ ನೈನಿ ಕೊಂದ ಇಸ್ರೇಲ್​! ಟ್ರಂಪ್​ಗೆ ಸವಾಲೆಸೆದ ಬೆನ್ನಲ್ಲೇ ಇರಾನ್​ ನಾಯಕರ ಸರಣಿ ಕೊಲೆ | Ali Mohammad Naini

ಟೆಹ್ರಾನ್​: ಇರಾನ್​-ಇಸ್ರೇಲ್​ ನಡುವಿನ ಯುದ್ಧವು ಸದ್ಯ ಯಾವುದೇ ಕಾರಣಕ್ಕೂ ನಿಲ್ಲುವಂತೆ ತೋರುತ್ತಿಲ್ಲ. ಸೇಡು ತೀರಿಸಿಕೊಳ್ಳಲು ಪಣತೊಟ್ಟಿರುವ ಇರಾನ್​ ತಮ್ಮ ಸೇನೆಯ ಮತ್ತೊಬ್ಬ ಅಧಿಕಾರಿಯನ್ನು ಕಳೆದುಕೊಂಡಿದೆ. ಅಮೆರಿಕಕ್ಕೆ ಸವಾಲು ಹಾಕಿದ್ದ ಇರಾನಿನ ನಾಯಕರು, ಇದೀಗ ಮಸಣದ ಹಾದಿ ಹಿಡಿರುವುದು ಸಂಘರ್ಷದ ತೀವ್ರತೆಗೆ ಕಾರಣವಾಗಿದೆ.

ಇಸ್ರೇಲ್​ ಮತ್ತು ಅಮೆರಿಕ ನಡೆಸಿದ ಮತ್ತೊಂದು ಜಂಟಿ ದಾಳಿಯಲ್ಲಿ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್​​ ಕಾರ್ಪ್ಸ್ (IRGC)​​ ಮತ್ತು ಪ್ರಮುಖ ವಕ್ತಾರ ಅಲಿ ಮೊಹಮ್ಮದ್​ ನೈನಿ ಸಾವಿಗೀಡಾಗಿದ್ದಾರೆ ಎಂದು ಅಂತಾರಾಷ್ಟ್ರೀಯ ಸುದ್ದಿ ಸಂಸ್ಥೆಗಳು ವರದಿ ಮಾಡಿವೆ. ಐಆರ್​ಜಿಸಿಯೂ ಈ ಬಗ್ಗೆ ಅಧಿಕೃತ ಮಾಹಿತಿ ಹಂಚಿಕೊಂಡಿದೆ. "ಇರಾನ್​ನ ಕ್ರಾಂತಿಕಾರಿ ವಕ್ತಾರ ಅಲಿ ಮೊಹಮದ್​ ನೈನಿ, ಕೊಲ್ಲಿಯಲ್ಲಿ ನೌಕಾ ಹಕ್ಕುಗಳ ಪ್ರಶ್ನಿಸಿ, ಮಾತನಾಡಿದ್ದರು. ಇದರ ಬೆನ್ನಲ್ಲೇ ಅಮೆರಿಕ​-ಇಸ್ರೇಲ್​ ನಡೆಸಿದ ಹೇಡಿತನದ ದಾಳಿಯಲ್ಲಿ ನಮ್ಮ ಧೀರ ನಾಯಕ ಹುತಾತ್ಮರಾಗಿದ್ದಾರೆ" ಎಂದು ತಿಳಿಸಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಆಡಿದ ಮಾತಿಗೆ ಸಿಟ್ಟಾಗಿದ್ದ ನೈನಿ, "ಟ್ರಂಪ್​ ಇರಾನ್​ ಸಂಪೂರ್ಣ ನೆಲಸಮವಾಗಿದೆ ಎಂದು ಹೇಳಿದ್ದಾರಾ? ಅವರಿಗೆ ಧೈರ್ಯವಿದ್ದರೆ, ತಮ್ಮ ನೌಕಾ ಪಡೆಯನ್ನು ಪರ್ಷಿಯನ್​​ ಕೊಲ್ಲಿಯನ್ನು ಮುಟ್ಟುವಂತಹ ವ್ಯವಸ್ಥೆಯನ್ನು ಮಾಡಿಕೊಳ್ಳಲಿ ಎಂದು ಸವಾಲು ಹಾಕಿದ್ದರು. ಹೀಗೆಂದ ಕೆಲವೇ ದಿನಗಳಲ್ಲಿ ನೈನಿ ಕಥೆಯನ್ನು ಟ್ರಂಪ್​ ಮುಗಿಸಿದ್ದಾರೆ.

ಇರಾನ್​ನ ಸರ್ವೋಚ್ಚ ನಾಯಕ ಅಯೋತಲ್ಲಾ ಅಲಿ ಖಮೇನಿಯವರ ಹತ್ಯೆಯ ಬಳಿಕ ಇರಾನಿನ ನಾಯಕರ ಸರಣಿ ಕೊಲೆ ನಡೆಯುತ್ತಿದೆ. ಸೇನಾ ಪಡೆಯ ಉನ್ನತ ಹುದ್ದೆಯಲ್ಲಿರುವ ವ್ಯಕ್ತಿಗಳೇ ಇಸ್ರೇಲ್​-ಅಮೆರಿಕ ಪಡೆಗಳಿಗೆ ಟಾರ್ಗೆಟ್​. ಇರಾನ್​ನ ಗುಪ್ತಚರ ಸಚಿವ ಎಸ್ಮಾಯಿಲ್​ ಖತಾಮ್​, ಭ​ದ್ರತಾ ಮುಖ್ಯಸ್ಥ ಅಲಿ ಲಾರಿಜಾನಿ, ಬಸಿಜ್ ನಾಯಕ ಫಲಮುಜ್ರಾ ಸುಲೈಮಾನಿ ಉಸಿರು ಚೆಲ್ಲಿದ್ದಾರೆ,(ಏಜೆನ್ಸೀಸ್).