ತೆರೆಮರೆಯಲ್ಲಿ ಚೀನಾ-ಇರಾನ್ ಸೀಕ್ರೆಟ್ ಡೀಲ್? ಡೊನಾಲ್ಡ್ ಟ್ರಂಪ್ ಆಕ್ರೋಶ: ಅಮೆರಿಕದ ವರದಿಗೆ ಡ್ರ್ಯಾಗನ್ ಗರಂ!
- ಇರಾನ್ಗೆ ಚೀನಾದಿಂದ MANPADs ಕ್ಷಿಪಣಿ ಪೂರೈಕೆ ಸಾಧ್ಯತೆ: ಅಮೆರಿಕ ಗುಪ್ತಚರ ವರದಿ.
- ಆರೋಪ ನಿರಾಕರಿಸಿದ ಚೀನಾ ರಾಯಭಾರ ಕಚೇರಿ.
- ಚೀನಾಕ್ಕೆ ದೊಡ್ಡ ಸಮಸ್ಯೆ ಕಾದಿದೆ" ಎಂದು ಎಚ್ಚರಿಸಿದ ಡೊನಾಲ್ಡ್ ಟ್ರಂಪ್.
- ಇಸ್ಲಾಮಾಬಾದ್ನಲ್ಲಿ ಅತಂತ್ರ ಸ್ಥಿತಿಯಲ್ಲಿ ಅಮೆರಿಕ-ಇರಾನ್ ಶಾಂತಿ ಮಾತುಕತೆ.
- ಲೆಬನಾನ್ನಲ್ಲಿ ಇಸ್ರೇಲ್ ದಾಳಿ ತೀವ್ರ; 2,000ಕ್ಕೂ ಹೆಚ್ಚು ಸಾವು.
ಬೀಜಿಂಗ್: ಪಶ್ಚಿಮ ಏಷ್ಯಾದ ಯುದ್ಧ ಭೂಮಿಯಲ್ಲಿ ಈಗ ಚೀನಾದ ಎಂಟ್ರಿ ಹೊಸ ಸಂಚಲನ ಮೂಡಿಸಿದೆ. ಇರಾನ್ಗೆ ಚೀನಾ(China) ಅತ್ಯಾಧುನಿಕ ವಾಯು ರಕ್ಷಣಾ ವ್ಯವಸ್ಥೆಗಳನ್ನು ಪೂರೈಸಲು ಸಿದ್ಧತೆ ನಡೆಸುತ್ತಿದೆ ಎಂಬ ಅಮೆರಿಕದ ಗುಪ್ತಚರ ವರದಿಯು ಜಗತ್ತನ್ನೇ ಬೆಚ್ಚಿಬೀಳಿಸಿದೆ. ಈ ಬೆನ್ನಲ್ಲೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಚೀನಾಕ್ಕೆ ನೇರ ಎಚ್ಚರಿಕೆ ನೀಡಿದ್ದು, ಚೀನಾ ಅಕಸ್ಮಾತ್ ಇರಾನ್ಗೆ ಆಯುಧ ನೀಡಿದರೆ, ಅವರು ದೊಡ್ಡ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ ಎಂದು ಗುಡುಗಿದ್ದಾರೆ.
ಅಮೆರಿಕದ ಗುಪ್ತಚರ ವರದಿ ಹೇಳುವುದೇನು..?
ಸಿಎನ್ಎನ್ ವರದಿಯ ಪ್ರಕಾರ, ಚೀನಾವು ಹೆಗಲ ಮೇಲೆ ಇಟ್ಟು ಹಾರಿಸಬಹುದಾದ ವಿಮಾನ ವಿರೋಧಿ ಕ್ಷಿಪಣಿಗಳನ್ನು ಇರಾನ್ಗೆ ಕಳುಹಿಸಲು ಯೋಜಿಸುತ್ತಿದೆ. ಈ ಆಯುಧಗಳು ಕಡಿಮೆ ಎತ್ತರದಲ್ಲಿ ಹಾರುವ ಅಮೆರಿಕದ ಯುದ್ಧ ವಿಮಾನಗಳಿಗೆ ಅತ್ಯಂತ ಅಪಾಯಕಾರಿಯಾಗಬಲ್ಲವು. ವಿಶೇಷವೆಂದರೆ, ತನ್ನ ಹೆಸರನ್ನು ಮರೆಮಾಚಲು ಚೀನಾ ಈ ಶಸ್ತ್ರಾಸ್ತ್ರಗಳನ್ನು ಮೂರನೇ ರಾಷ್ಟ್ರಗಳ ಮೂಲಕ ರವಾನಿಸಲು ಸಂಚು ರೂಪಿಸಿದೆ ಎಂದು ಅಮೆರಿಕದ ಗುಪ್ತಚರ ಇಲಾಖೆ ಸಂಶಯ ವ್ಯಕ್ತಪಡಿಸಿದೆ.
ಚೀನಾ ತೀಕ್ಷ್ಣ ಪ್ರತಿಕ್ರಿಯೆ: ಎಲ್ಲವೂ ಸುಳ್ಳು
ವಾಷಿಂಗ್ಟನ್ನಲ್ಲಿರುವ ಚೀನಾ ರಾಯಭಾರ ಕಚೇರಿಯು ಈ ವರದಿಗಳನ್ನು ಸಂಪೂರ್ಣವಾಗಿ ತಿರಸ್ಕರಿಸಿದೆ. ಚೀನಾ ಯಾವುದೇ ಸಂಘರ್ಷದ ದೇಶಗಳಿಗೆ ಶಸ್ತ್ರಾಸ್ತ್ರಗಳನ್ನು ಪೂರೈಸಿಲ್ಲ. ಅಮೆರಿಕವು ಸುಳ್ಳು ಆರೋಪಗಳನ್ನು ಮಾಡುವುದನ್ನು ನಿಲ್ಲಿಸಬೇಕು ಮತ್ತು ಅನಗತ್ಯವಾಗಿ ಪ್ರಚೋದನೆ ನೀಡಬಾರದು. ನಾವು ಜವಾಬ್ದಾರಿಯುತ ರಾಷ್ಟ್ರವಾಗಿ ಅಂತಾರಾಷ್ಟ್ರೀಯ ನಿಯಮಗಳನ್ನು ಪಾಲಿಸುತ್ತಿದ್ದೇವೆ ಎಂದು ಬೀಜಿಂಗ್ ತಿರುಗೇಟು ನೀಡಿದೆ.
ಇಸ್ಲಾಮಾಬಾದ್ನಲ್ಲಿ ಅತಂತ್ರ ಶಾಂತಿ ಸಂಧಾನ
ಒಂದೆಡೆ ಶಸ್ತ್ರಾಸ್ತ್ರಗಳ ಪೂರೈಕೆಯ ಆರೋಪ ಕೇಳಿಬರುತ್ತಿದ್ದರೆ, ಮತ್ತೊಂದೆಡೆ ಪಾಕಿಸ್ತಾನದ ಇಸ್ಲಾಮಾಬಾದ್ನಲ್ಲಿ ಅಮೆರಿಕ ಮತ್ತು ಇರಾನ್ ನಡುವೆ ಮೂರನೇ ಸುತ್ತಿನ ಐತಿಹಾಸಿಕ ಮುಖಾಮುಖಿ ಮಾತುಕತೆಗಳು ಮುಕ್ತಾಯಗೊಂಡಿವೆ. ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಮತ್ತು ಇರಾನ್ ಸ್ಪೀಕರ್ ಮೊಹಮ್ಮದ್ ಬಾಘರ್ ಗಾಲಿಬಾಫ್ ನಡುವೆ ಸುದೀರ್ಘ ಚರ್ಚೆ ನಡೆದಿದ್ದರೂ, ಕದನ ವಿರಾಮದ ಭವಿಷ್ಯ ಇನ್ನೂ ಅತಂತ್ರವಾಗಿದೆ.
ಸದ್ಯದ ಪರಿಸ್ಥಿತಿ
ಯುದ್ಧದ ತೀವ್ರತೆ: ಏಳನೇ ವಾರಕ್ಕೆ ಕಾಲಿಟ್ಟಿರುವ ಈ ಯುದ್ಧದಲ್ಲಿ ಸಾವಿರಾರು ಜನರು ಮೃತಪಟ್ಟಿದ್ದಾರೆ.
ಇಸ್ರೇಲ್ ದಾಳಿ: ಲೆಬನಾನ್ನಲ್ಲಿರುವ ಇರಾನ್ ಬೆಂಬಲಿತ ಹೆಜ್ಬೊಲ್ಲಾ ಮೇಲೆ ಇಸ್ರೇಲ್ ದಾಳಿ ಮುಂದುವರಿಸಿದ್ದು, ಅಲ್ಲಿ ಸಾವಿನ ಸಂಖ್ಯೆ 2,000 ದಾಟಿದೆ.
ಜಾಗತಿಕ ಮಾರುಕಟ್ಟೆ: ಈ ಬಿಕ್ಕಟ್ಟಿನಿಂದಾಗಿ ಜಾಗತಿಕ ತೈಲ ಮತ್ತು ಷೇರು ಮಾರುಕಟ್ಟೆಗಳು ತೀವ್ರವಾಗಿ ಕುಸಿದಿವೆ.
ಟ್ರಂಪ್ ದೊಡ್ಡ ಸಂಕಷ್ಟ'ದ ಎಚ್ಚರಿಕೆ ಯಾರಿಗೆ..?
ಶನಿವಾರ ಮಾಧ್ಯಮಗಳೊಂದಿಗೆ ಮಾತನಾಡಿದ ಟ್ರಂಪ್, ಚೀನಾ ಅಧ್ಯಕ್ಷ ಶೀ ಜಿನ್ಪಿಂಗ್ ಅವರೊಂದಿಗೆ ಈ ಬಗ್ಗೆ ಮಾತನಾಡಿದ್ದೀರಾ ಎಂಬ ಪ್ರಶ್ನೆಗೆ ನೇರ ಉತ್ತರ ನೀಡದಿದ್ದರೂ, ಚೀನಾ ಇರಾನ್ ಬೆನ್ನಿಗೆ ನಿಂತರೆ ಅದರ ಆರ್ಥಿಕ ಮತ್ತು ರಾಜತಾಂತ್ರಿಕ ಪರಿಣಾಮ ಭೀಕರವಾಗಿರುತ್ತದೆ ಎಂದು ಸೂಚ್ಯವಾಗಿ ಹೇಳಿದ್ದಾರೆ. ಚೀನಾ ಹಾಗೆ ಮಾಡಿದರೆ, ಅವರಿಗೆ ದೊಡ್ಡ ತೊಂದರೆಯಾಗಲಿದೆ, ಓಕೆ? ಎಂಬ ಅವರ ಮಾತು ಈಗ ಬೀಜಿಂಗ್ನಲ್ಲಿ ನಡುಕ ಹುಟ್ಟಿಸಿದೆ.
ಯುದ್ಧದ ದಿಕ್ಕು ಬದಲಾಗಲಿದೆಯೇ..?
ಚೀನಾ ಶಸ್ತ್ರಾಸ್ತ್ರಗಳನ್ನು ನೀಡಿದರೆ ಇರಾನ್ನ ಮಿಲಿಟರಿ ಶಕ್ತಿ ಹೆಚ್ಚಾಗಲಿದೆ. ಇದು ಇಸ್ರೇಲ್ ಮತ್ತು ಅಮೆರಿಕದ ವಾಯುಪಡೆಗೆ ದೊಡ್ಡ ಸವಾಲಾಗಲಿದೆ. ಒಂದೆಡೆ ಇಸ್ಲಾಮಾಬಾದ್ನಲ್ಲಿ ಶಾಂತಿ ಮಾತುಕತೆ ನಡೆಯುತ್ತಿದ್ದರೆ, ಇನ್ನೊಂದೆಡೆ ತೆರೆಮರೆಯಲ್ಲಿ ಶಸ್ತ್ರಾಸ್ತ್ರಗಳ ಆಟ ನಡೆಯುತ್ತಿರುವುದು ಪಶ್ಚಿಮ ಏಷ್ಯಾದ ಯುದ್ಧ ಮತ್ತಷ್ಟು ವಿಸ್ತರಿಸುವ ಮುನ್ಸೂಚನೆ ನೀಡುತ್ತಿದೆ,(ಏಜೆನ್ಸೀಸ್).