ಯುದ್ಧ ಮಾಡದೆಯೇ ಗೆದ್ದ ರಷ್ಯಾ! ಮಧ್ಯಪ್ರಾಚ್ಯದ ರಕ್ತಪಾತದಿಂದ ಮಾಸ್ಕೋ ಬೊಕ್ಕಸಕ್ಕೆ ಹರಿದುಬಂತು ಸಾವಿರಾರು ಕೋಟಿ! Russia Profit

ರಾಯಿಟರ್ಸ್ ವರದಿಯ ಪ್ರಕಾರ, ಏಪ್ರಿಲ್ ತಿಂಗಳಿನಲ್ಲಿ ರಷ್ಯಾದ ತೈಲ ಆದಾಯವು ಸುಮಾರು 9 ಬಿಲಿಯನ್ ಡಾಲರ್‌ಗಳಿಗೆ (ಅಂದಾಜು 75,000 ಕೋಟಿ ರೂಪಾಯಿ) ಏರಲಿದೆ. ಮಾರ್ಚ್ ತಿಂಗಳಲ್ಲಿ ಇದು 327 ಬಿಲಿಯನ್ ರೂಬಲ್ಸ್ ಇತ್ತು, ಈಗ ಅದು ಎರಡು ಪಟ್ಟು ಹೆಚ್ಚಾಗುತ್ತಿದೆ.

ಬ್ರೆಂಟ್ ಕ್ರೂಡ್ ದರ: ಹೋರ್ಮುಜ್ ಜಲಸಂಧಿಯ ದಿಗ್ಬಂಧನದಿಂದಾಗಿ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲ ಬೆಲೆ ಪ್ರತಿ ಬ್ಯಾರೆಲ್‌ಗೆ 100 ಡಾಲರ್ ದಾಟಿದೆ.

ರಷ್ಯಾದ ಯುರಲ್ಸ್ ತೈಲ: ಫೆಬ್ರವರಿಯಲ್ಲಿ ಕೇವಲ 44.59 ಡಾಲರ್ ಇದ್ದ ರಷ್ಯಾದ ಯುರಲ್ಸ್ ತೈಲದ ಬೆಲೆ ಮಾರ್ಚ್‌ನಲ್ಲಿ 77 ಡಾಲರ್‌ಗೆ ಜಿಗಿದಿದೆ. ಇದು 2023ರ ಅಕ್ಟೋಬರ್ ನಂತರದ ಗರಿಷ್ಠ ಮಟ್ಟವಾಗಿದೆ. ರಷ್ಯಾ ತನ್ನ ಬಜೆಟ್‌ನಲ್ಲಿ 59 ಡಾಲರ್ ಬೆಲೆಯನ್ನು ನಿರೀಕ್ಷಿಸಿತ್ತು, ಆದರೆ ಈಗ ಅದಕ್ಕಿಂತಲೂ ಹೆಚ್ಚಿನ ಆದಾಯ ಹರಿದುಬರುತ್ತಿದೆ.

ಜಾಗತಿಕ ತೈಲ ಮಾರುಕಟ್ಟೆಯ ಅಡಿಪಾಯವೇ ಅಲುಗಾಡುತ್ತಿರುವ ಈ ಸಮಯದಲ್ಲಿ, ಪ್ರಪಂಚದ ನಾನಾ ದೇಶಗಳಿಂದ ರಷ್ಯಾದ ತೈಲಕ್ಕೆ ಭಾರಿ ಬೇಡಿಕೆ ಬರುತ್ತಿದೆ ಎಂದು ಕ್ರೆಮ್ಲಿನ್ ಖಚಿತಪಡಿಸಿದೆ. ಪಶ್ಚಿಮ ರಾಷ್ಟ್ರಗಳ ನಿರ್ಬಂಧದ ನಡುವೆಯೂ, ಇಂಧನ ಬಿಕ್ಕಟ್ಟಿನಿಂದ ಪಾರಾಗಲು ಹಲವು ರಾಷ್ಟ್ರಗಳು ಈಗ ರಷ್ಯಾದತ್ತ ಮುಖ ಮಾಡಿವೆ. ಅಮೆರಿಕ ಮತ್ತು ಇಸ್ರೇಲ್ ನೀಡುತ್ತಿರುವ ನೋವು ರಷ್ಯಾಕ್ಕೆ ಲಾಭದ ಹಾದಿಯನ್ನು ಸುಗಮಗೊಳಿಸಿದೆ.

ರಷ್ಯಾಕ್ಕೆ ಹಣ ಹರಿದುಬರುತ್ತಿದ್ದರೂ, ಪರಿಸ್ಥಿತಿ ಅಂದುಕೊಂಡಷ್ಟು ಸುಲಭವಿಲ್ಲ.

ಬಜೆಟ್ ಕೊರತೆ: 2026ರ ಮೊದಲ ತ್ರೈಮಾಸಿಕದಲ್ಲಿ ರಷ್ಯಾ 4.58 ಟ್ರಿಲಿಯನ್ ರೂಬಲ್ಸ್‌ನಷ್ಟು ಬಜೆಟ್ ಕೊರತೆಯನ್ನು ಎದುರಿಸುತ್ತಿದೆ 

ಯುಕ್ರೇನ್ ದಾಳಿ: ಯುಕ್ರೇನ್ ಸೈನ್ಯವು ರಷ್ಯಾದ ಇಂಧನ ಮೂಲಸೌಕರ್ಯಗಳ ಮೇಲೆ ನಿರಂತರ ದಾಳಿ ಮಾಡುತ್ತಿರುವುದು ತೈಲ ಉತ್ಪಾದನೆಗೆ ಅಡ್ಡಿಯಾಗುತ್ತಿದೆ.

ಕದನ ವಿರಾಮದ ಭೀತಿ: ಒಂದು ವೇಳೆ ಅಮೆರಿಕ ಮತ್ತು ಇರಾನ್ ನಡುವೆ ಶಾಶ್ವತ ಕದನ ವಿರಾಮ ಏರ್ಪಟ್ಟು, ಹೋರ್ಮುಜ್ ಜಲಸಂಧಿ ತೆರೆದರೆ ತೈಲ ಬೆಲೆ 80 ಡಾಲರ್‌ಗಿಂತ ಕೆಳಕ್ಕೆ ಇಳಿಯಲಿದೆ. ಆಗ ರಷ್ಯಾದ ಈ ವಿಂಡ್‌ಫಾಲ್ ಲಾಭವು ಕ್ಷಣಾರ್ಧದಲ್ಲಿ ಕರಗಿ ಹೋಗಲಿದೆ.

ಸದ್ಯದ ಸ್ಥಿತಿಯ ಪ್ರಕಾರ, ಈ ದಶಕದ ಅತ್ಯಂತ ಭೀಕರ ಇಂಧನ ಬಿಕ್ಕಟ್ಟಿನ ಲಾಭ ಪಡೆಯುತ್ತಿರುವ ಏಕೈಕ ದೇಶ ರಷ್ಯಾ. ನಾಲ್ಕು ವರ್ಷಗಳಿಂದ ಪಾಶ್ಚಿಮಾತ್ಯ ದೇಶಗಳ ತಾಳ್ಮೆಯನ್ನು ಪರೀಕ್ಷಿಸುತ್ತಿದ್ದ ರಷ್ಯಾಕ್ಕೆ ಈಗ ಬೇರೆಯವರು ಕೊಡುತ್ತಿರುವ ನೋವೇ ಲಾಭವಾಗಿ ಪರಿಣಮಿಸಿದೆ. ಇಸ್ರೇಲ್ ಮತ್ತು ಅಮೆರಿಕ ದಾಳಿ ಮಾಡುತ್ತಿದ್ದರೆ, ರಷ್ಯಾ ಮಾತ್ರ ಪ್ರಪಂಚಕ್ಕೆ ಇನ್‌ವಾಯ್ಸ್ ಕಳುಹಿಸಿ ಹಣ ವಸೂಲಿ ಮಾಡುತ್ತಿದೆ,(ಏಜೆನ್ಸೀಸ್).