14ನೇ ವಯಸ್ಸಿಗೆ ಸಿಗರೇಟ್​! 121 ವರ್ಷಗಳ ಬದುಕು; ಗಿನ್ನಿಸ್​ ವಿಶ್ವ ದಾಖಲೆ ಪುಟ ಸೇರದ ವ್ಯಕ್ತಿ ನಿಧನ

ದಕ್ಷಿಣ ಆಫ್ರಿಕಾ: ಸಿಗರೇಟ್​ ಸೇದುವ ಚಟ ಇಂದು ಹಲವರದ್ದು. ಕುಡಿತಕ್ಕೆ ಒಂದಷ್ಟು ಜನ ದಾಸರಾದರೆ, ಮತ್ತೊಂದಷ್ಟು ಮಂದಿ ಸ್ಮೋಕಿಂಗ್​ ಚಟಕ್ಕೆ ಒಗ್ಗಿಕೊಂಡಿದ್ದಾರೆ. ಇದು ಜೀವ ಮತ್ತು ಜೀವಕ್ಕೆ ತೀರ ಹಾನಿಕಾರಕ ಎಂದು ಗೊತ್ತಿದ್ದರೂ ಸೇದುವುದನ್ನು ಮಾತ್ರ ಬಿಡುವುದಿಲ್ಲ. ಕೆಲವೇ ಕೆಲವರು ಇಂತಹ ಚಟಗಳಿಂದ ಸುಲಭವಾಗಿ ಹೊರಬರುತ್ತಾರೆ. ಮತ್ತು ಅಂದುಕೊಂಡಂತೆ ಬಿಟ್ಟುಬಿಡುತ್ತಾರೆ. ವೈದ್ಯರ ಎಚ್ಚರಿಕೆಯ ಮೇಲೂ ಹೊಗೆ ಬಿಟ್ಟ ಅನೇಕ ಮಂದಿ ಸಾವಿನ ಹಾಸಿಗೆ ಏರಿದ ನಿದರ್ಶನಗಳು ಹೆಚ್ಚಿವೆ. ಆದರೆ, ಇಲ್ಲೊಬ್ಬ ವ್ಯಕ್ತಿ 14ನೇ ವಯಸ್ಸಿಗೆ ಧೂಮಪಾನ ಶುರುಮಾಡಿ, 121 ವರ್ಷಕ್ಕೆ ಆಸ್ತಮಾ ಖಾಯಿಲೆಯಿಂದ ಸಾವಿಗೀಡಾದ ಘಟನೆ ದಕ್ಷಿಣ ಆಫ್ರಿಕಾದಲ್ಲಿ ವರದಿಯಾಗಿದೆ.    

ಗಿನ್ನೆಸ್ ವಿಶ್ವ ದಾಖಲೆಗಳ ಪ್ರಕಾರ ನೋಡುವುದಾದರೆ, ಜಾನ್​ ವಿಶ್ವದ ಅತ್ಯಂತ ಹಿರಿಯ ವ್ಯಕ್ತಿ ಆಗಬೇಕಿತ್ತು. ಆದರೆ, ವರ್ಲ್​ ಬುಕ್​ ಆಫ್ ರೆಕಾರ್ಡ್​ ಅವರನ್ನು ಗುರುತಿಸದೆ ಇರುವುದೇ ಸದ್ಯ ಹಲವರಲ್ಲಿ ಗೊಂದಲ ಸೃಷ್ಟಿಸಿದೆ. ಪ್ರಸ್ತುತ, ದಾಖಲೆ ಹೊಂದಿರುವವರು 113 ವರ್ಷ ವಯಸ್ಸಿನ ಬ್ರೆಜಿಲಿಯನ್ ಸೂಪರ್-ಸೆಂಟೆನರಿಯನ್ ಜೋವೊ ಮರಿನ್ಹೊ ನೆಟೊ ಎಂಬುವವರು. ಊಮ್ ಜಾನ್ ಅವರು ಡಿಸೆಂಬರ್ 31, 1904ರಂದು ಜನಿಸಿದರು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

"ಧೂಮಪಾನದ ಚಟದ ಹೊರತಾಗಿ ದೇವರ ಮೇಲಿನ ನನ್ನ ನಂಬಿಕೆಯೇ ನನ್ನನ್ನು ಇಷ್ಟು ವರ್ಷಗಳ ಕಾಲ ಜೀವಂತವಾಗಿರಿಸಿದೆ. ಆತನೇ ನನಗೆ ಉಸಿರು, ರಕ್ಷಕ ಎಲ್ಲ. ನಾನು ಕೂಡ ಧೂಮಪಾನ ಮಾಡುತ್ತಿದ್ದೆ. 14ನೇ ವಯಸ್ಸಿನಿಂದಲೇ ಸಿಗರೇಟ್​ ಸೇದುವ ಚಟಕ್ಕೆ ಬಿದ್ದೆ. ಆಗೆಲ್ಲ ನಾನು ಸಿಗರೇಟ್ ಕದಿಯುತ್ತಿದ್ದೆ. ನನ್ನ ಜೀವನದುದ್ದಕ್ಕೂ ಗಿಡಮೂಲಿಕೆ ರಸವನ್ನು ಕುಡಿಯುತ್ತಿದ್ದೆ. ಇದು ನನ್ನನ್ನು ಸಕ್ರಿಯ ಮತ್ತು ಆರೋಗ್ಯವಾಗಿಟ್ಟಿದೆ" ಎಂದು ಹೇಳಿಕೊಂಡಿದ್ದರು. ಅವರಿದ್ದಷ್ಟು ಕಾಲ, ಅಚ್ಚುಕಟ್ಟಾಗಿ ಉಡುಗೆ ತೊಡುವುದು, ಟೋಪಿ ಧರಿಸುವುದು ಮತ್ತು ಕಾರ್ಯಕ್ರಮಗಳಲ್ಲಿ ಡ್ಯಾನ್ಸ್ ಮಾಡುತ್ತಿದ್ದರು ಎಂದು ಕುಟುಂಬಸ್ಥರು ತಿಳಿಸಿದ್ದಾರೆ,(ಏಜೆನ್ಸೀಸ್).