ಇರಾನ್ ವಿರುದ್ಧ ಹಲವು ಪ್ರಮುಖ ಉದ್ದೇಶಗಳನ್ನು ಇರಿಸಿಕೊಂಡು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಯುದ್ಧ ಆರಂಭಿಸಿದ್ದರು. ಯುದ್ಧ ಇನ್ನೂ ಮುಂದುವರಿಯುತ್ತದೋ, ಕದನವಿರಾಮ ಏರ್ಪಡಲಿದೆಯೋ ಎಂಬುದರ ಬಗ್ಗೆ ಸ್ಪಷ್ಟತೆ ಇಲ್ಲ. ಆದರೆ, ಟ್ರಂಪ್ ತಮ್ಮ ಉದ್ದೇಶಗಳಲ್ಲಿ ಸಫಲರಾಗಿದ್ದಾರೆಯೇ ಎಂದು ಅವಲೋಕಿಸಿದರೆ ಮಿಶ್ರ ಫಲಿತಾಂಶವೇ ಕಂಡುಬರುತ್ತದೆ. ಇರಾನ್ನ ಸವೋಚ್ಚ ನಾಯಕ ಅಲಿ ಖಮೇನಿ ಅವರನ್ನು ಯುದ್ಧದ ಮೊದಲ ದಿನವೇ ಹೊಡೆದುರುಳಿಸಿದ್ದು, ಅಮೆರಿಕ ತನ್ನ ಸಾಧನೆ ಎಂದು ಬಣ್ಣಿಸಿಕೊಂಡಿದೆ. ಆದರೆ, ಇರಾನ್ನಲ್ಲಿ ಆಡಳಿತ ಬದಲಾವಣೆ ಮಾಡಬೇಕು ಎಂಬ ಪ್ರಮುಖ ಉದ್ದೇಶ ಈಡೇರಿಲ್ಲ. ಇರಾನ್ ಕ್ಷಿಪಣಿ ಕೈಗಾರಿಕೆಯನ್ನು ನಾಶಪಡಿಸುವ ಅಮೆರಿಕ ಉದ್ದೇಶ ಬಹುತೇಕ ಈಡೇರಿದ್ದು, ನೌಕಾಪಡೆಗೂ ಬಲವಾದ ಹಾನಿಯಾಗಿದೆ. ಆದರೆ, ಅಣ್ವಸ್ತ್ರಗಳ ಅಪಾಯ ಮಾತ್ರ ಕಾಡುತ್ತಲೇ ಇದ್ದು, ಟ್ರಂಪ್ ಮುಂದಿನ ಹೆಜ್ಜೆ ಏನಾಗಿರಲಿದೆ?
ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಫೆಬ್ರವರಿ 28ರಂದು ಇರಾನ್ ಮೇಲೆ ದಾಳಿ ನಡೆಸಿದವು. ಇದರ ಬೆನ್ನಲ್ಲೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಎಂಟು ನಿಮಿಷಗಳ ವಿಡಿಯೋ ಬಿಡುಗಡೆ ಮಾಡಿ ಯುದ್ಧದ ಗುರಿ (ಟಾರ್ಗೆಟ್)ಗಳನ್ನು ವಿವರಿಸಿದ್ದರು. ಅಮೆರಿಕದ ಜನರ ರಕ್ಷಣೆ ಮತ್ತು ಇರಾನ್ನಿಂದ ಎದುರಾಗುವ ಬೆದರಿಕೆಗಳನ್ನು ಅಂತ್ಯಗೊಳಿಸುವುದೇ ತಮ್ಮ ಉದ್ದೇಶ ಎಂದು ಅವರು ಹೇಳಿದ್ದರು. ಆದರೆ, ಟ್ರಂಪ್ ಉದ್ದೇಶ ಈಡೇರಿಕೆಯಲ್ಲಿ ಶೇಕಡ 50ರಷ್ಟು ಮಾತ್ರ ಯಶಸ್ವಿಯಾಗಿದ್ದು, ಈಗ ಯುದ್ಧವನ್ನು ಮುಂದುವರಿಸಲೂ ಆಗದೆ, ಮುಗಿಸಲೂ ಆಗದೆ ಸಂದಿಗ್ಧ ಸ್ಥಿತಿಯಲ್ಲಿ ಸಿಲುಕಿದ್ದಾರೆ. ಕದನವಿರಾಮ ಘೋಷಿಸಲು ಟ್ರಂಪ್ ಒಲವು ತೋರುತ್ತಿದ್ದರೂ, ಇಸ್ರೇಲ್ ಒಪು್ಪತ್ತಿಲ್ಲ. ಟ್ರಂಪ್ ಇರಾನ್ ಅನ್ನು ಆರ್ಥಿಕವಾಗಿ ಹೈರಾಣಾಗಿಸುವಲ್ಲಿ ಯಶಸ್ವಿಯಾದರೂ, ಆ ದೇಶದ ಆಡಳಿತವನ್ನು ಬದಲಿಸುವಲ್ಲಿ ಅಥವಾ ಅವರನ್ನು ಸಂಪೂರ್ಣವಾಗಿ ಶರಣಾಗಿಸುವಲ್ಲಿ ಯಶಸ್ವಿಯಾಗಿಲ್ಲ.
ಸೇನಾ ಮೂಲಸೌಕರ್ಯಗಳ ನಾಶ: ಟ್ರಂಪ್ ಗುರಿಯಂತೆ, ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್ನ ಪ್ರಮುಖ ಕ್ಷಿಪಣಿ ಕೇಂದ್ರಗಳು ಮತ್ತು ಡ್ರೋನ್ ಉತ್ಪಾದನಾ ಘಟಕಗಳನ್ನು ಯಶಸ್ವಿಯಾಗಿ ಧ್ವಂಸಗೊಳಿಸಿವೆ. ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಉಡಾವಣೆ ಮಾಡುವ ಲಾಂಚರ್ಗಳು, ಕ್ಷಿಪಣಿಗಳನ್ನು ತಯಾರಿಸುವ ಕಾರ್ಖಾನೆಗಳು, ಕ್ಷಿಪಣಿಗಳನ್ನು ಸಂಗ್ರಹಿಸಿಡುವ ದಾಸ್ತಾನು ಮಳಿಗೆಗಳು ದಾಳಿಯಲ್ಲಿ ಧ್ವಂಸಗೊಂಡಿರುವುದರಿಂದ ಇರಾನ್ನ ಆಕ್ರಮಣಕಾರಿ ಶಕ್ತಿ ಕುಗ್ಗಿದೆ.
ನೌಕಾಪಡೆಗೆ ಹಾನಿ: ಇರಾನ್ನ ನೌಕಾಪಡೆಯನ್ನು ದುರ್ಬಲಗೊಳಿಸುವುದು ಅಥವಾ ಬಹುತೇಕ ಅಂತ್ಯಗೊಳಿಸುವುದು ಅಮೆರಿಕ ಮತ್ತು ಇಸ್ರೇಲ್ನ ಮುಖ್ಯ ಗುರಿಯಾಗಿತ್ತು. ಸಮುದ್ರ ಮಾರ್ಗದ ಮೂಲಕ ಇರಾನ್ ಯಾವುದೇ ದೊಡ್ಡ ದಾಳಿ ನಡೆಸದಂತೆ ಅಥವಾ ಹಡಗುಗಳ ಸಂಚಾರಕ್ಕೆ ಅಡ್ಡಿಪಡಿಸದಂತೆ ತಡೆಯುವುದು ಇದರ ಉದ್ದೇಶವಾಗಿತ್ತು. ಈ ಹಿನ್ನೆಲೆಯಲ್ಲಿ, ಯುದ್ಧನೌಕೆಗಳು ಮತ್ತು ಜಲಾಂತರ್ಗಾಮಿಗಳು, ನೌಕಾನೆಲೆಗಳು ಮತ್ತು ಬಂದರುಗಳು, ಶಸ್ತ್ರಾಸ್ತ್ರ ಹಾಗೂ ಕ್ಷಿಪಣಿಗಳನ್ನು ಸಾಗಿಸುವ ಹಡಗುಗಳನ್ನು ಗುರಿಯಾಗಿಸಿ ದಾಳಿ ನಡೆಸಲಾಯಿತು. ಮಾರ್ಚ್ ಆರಂಭದಲ್ಲಿ ಅಮೆರಿಕದ ಜಲಾಂತರ್ಗಾಮಿಯೊಂದು ಟಾರ್ಪಿಡೊ ದಾಳಿ ನಡೆಸುವ ಮೂಲಕ ಶ್ರೀಲಂಕಾ ಸಮೀಪವಿದ್ದ ಇರಾನ್ನ ಯುದ್ಧನೌಕೆ ‘ಐಆರ್ಐಎಸ್ ಡೇನಾ’ ಅನ್ನು ಮುಳುಗಿಸಿತು. ಈ ಹಡಗಿನಲ್ಲಿ 180 ಜನರಿದ್ದರು. ವರದಿಗಳ ಪ್ರಕಾರ, ಕನಿಷ್ಠ 80 ಜನರು ಬಲಿಯಾದರು. ಈ ಹಡಗು ದೂರದ ಕಾರ್ಯಾಚರಣೆ ನಡೆಸುವ ಸಾಮರ್ಥ್ಯ ಹೊಂದಿತ್ತು ಮತ್ತು ಇತ್ತೀಚೆಗಷ್ಟೇ ಭಾರತದೊಂದಿಗೆ ನಡೆದ ನೌಕಾ ತಾಲೀಮಿನಲ್ಲೂ ಭಾಗವಹಿಸಿತ್ತು.
ಇರಾನ್ ಬೆಂಬಲಿತ ಗುಂಪುಗಳ ಮೇಲೆ ನಿಯಂತ್ರಣ: ಇರಾನ್ನಿಂದ ಆರ್ಥಿಕ ಮತ್ತು ಶಸ್ತ್ರಾಸ್ತ್ರ ಸಹಾಯ ಪಡೆಯುತ್ತಿದ್ದ ‘ಪ್ರಾಕ್ಸಿ’ ಗುಂಪುಗಳ (ಹಿಜ್ಬುಲ್ಲಾ, ಹೂತಿಗಳು) ಸಂಪರ್ಕ ಜಾಲವನ್ನು ಕಡಿದುಹಾಕುವಲ್ಲಿ ಅಮೆರಿಕ ಭಾಗಶಃ ಯಶಸ್ವಿಯಾಗಿದೆ. ಮಧ್ಯಪ್ರಾಚ್ಯದಲ್ಲಿರುವ ಅಮೆರಿಕದ ನೆಲೆಗಳ ಮೇಲೆ ನಡೆಯುತ್ತಿದ್ದ ಸರಣಿ ದಾಳಿಗಳನ್ನು ತಡೆಯುವ ಮೂಲಕ ಅಮೆರಿಕನ್ ಜನರ ರಕ್ಷಣೆಯ ಉದ್ದೇಶವನ್ನು ಈಡೇರಿಸಿಕೊಳ್ಳಲು ಪ್ರಯತ್ನಿಸಲಾಗಿದೆ.
ಪರಮಾಣು ಕಾರ್ಯಕ್ರಮದ ಅನಿಶ್ಚಿತತೆ: ಇರಾನ್ನ ಸೇನಾ ನೆಲೆಗಳನ್ನು ಹಾನಿಗೊಳಿಸಿದ್ದರೂ, ಅವರ ಪರಮಾಣು ಸಂಶೋಧನಾ ಕೇಂದ್ರಗಳನ್ನು ಸಂಪೂರ್ಣವಾಗಿ ನಿಷ್ಕ್ರಿಯಗೊಳಿಸಲಾಗಿದೆಯೇ ಎಂಬುದು ಪ್ರಶ್ನೆಯಾಗಿಯೇ ಉಳಿದಿದೆ.
ಪ್ರಾದೇಶಿಕ ಅಸ್ಥಿರತೆ: ಇರಾನ್ ವಿರುದ್ಧದ ದಾಳಿಯು ಮಧ್ಯಪ್ರಾಚ್ಯದಲ್ಲಿ ಮತ್ತಷ್ಟು ಅಶಾಂತಿಗೆ ಕಾರಣವಾಗಿದೆ. ಇದು ತೈಲ ಬೆಲೆ ಏರಿಕೆ ಮತ್ತು ಜಾಗತಿಕ ಆರ್ಥಿಕತೆಯ ಮೇಲೆ ಬೀರುವ ಪರಿಣಾಮಗಳನ್ನು ನಿಯಂತ್ರಿಸುವುದು ಅಮೆರಿಕಕ್ಕೆ ದೊಡ್ಡ ಸವಾಲಾಗಿದೆ.
ಸಂಪೂರ್ಣ ಶರಣಾಗತಿ: ಇರಾನ್ನ ನಾಯಕತ್ವವನ್ನು ಸಂಪೂರ್ಣವಾಗಿ ಮಾತುಕತೆಗೆ ಒಪ್ಪಿಸುವುದು ಅಥವಾ ಅವರ ಸಿದ್ಧಾಂತವನ್ನು ಬದಲಿಸುವುದು ಟ್ರಂಪ್ ಮುಖ್ಯ ಗುರಿಯಾಗಿತ್ತು, ಆದರೆ ಇದು ಇನ್ನೂ ಈಡೇರಿಲ್ಲ.
ಹೊಸ ಒಪ್ಪಂದದ ಕೊರತೆ: ಹಳೆಯ ಪರಮಾಣು ಒಪ್ಪಂದದಿಂದ ಹೊರಬಂದ ನಂತರ, ಇರಾನ್ ಅನ್ನು ಮಾತುಕತೆಗೆ ಒಪ್ಪಿಸಿ ಅಮೆರಿಕಕ್ಕೆ ಬೇಕಾದಂತೆ ಹೊಸ ಕಠಿಣ ಒಪ್ಪಂದ ಮಾಡಿಕೊಳ್ಳುವಲ್ಲಿ ಟ್ರಂಪ್ ವಿಫಲರಾದರು.
ಪರಮಾಣು ಚಟುವಟಿಕೆ ಹೆಚ್ಚಳ: ಅಮೆರಿಕ ಒಪ್ಪಂದದಿಂದ ಹೊರಬಂದ ಮೇಲೆ, ಇರಾನ್ ತನ್ನ ಯುರೇನಿಯಂ ಸಂಗ್ರಹದ ಮಟ್ಟವನ್ನು ಮತ್ತೆ ಹೆಚ್ಚಿಸಲು ಆರಂಭಿಸಿತು. ಅಂದರೆ, ಇರಾನ್ ಪರಮಾಣು ಬಾಂಬ್ ತಯಾರಿಕೆಗೆ ಮತ್ತಷ್ಟು ಹತ್ತಿರವಾಗಿದೆ.
ಪ್ರಾಕ್ಸಿ ಯುದ್ಧಗಳು ನಿಂತಿಲ್ಲ: ಇರಾನ್ ಬೆಂಬಲಿತ ಗುಂಪುಗಳು (ಲೆಬನಾನ್ನ ಹಿಜ್ಬುಲ್ಲಾ, ಯಮನ್ನ ಹೂತಿಗಳು) ಇಂದಿಗೂ ಸಕ್ರಿಯವಾಗಿದ್ದು, ಟ್ರಂಪ್ ನಿರ್ಬಂಧಗಳಿಂದ ಈ ಗುಂಪುಗಳ ಹಾವಳಿ ಪೂರ್ಣವಾಗಿ ನಿಂತಿಲ್ಲ.
ಆರ್ಥಿಕ ದಿಗ್ಬಂಧನ: 2015ರ ಪರಮಾಣು ಒಪ್ಪಂದದಿಂದ (ಒಇಕಣಅ) ಹೊರಬಂದ ಡೊನಾಲ್ಡ್ ಟ್ರಂಪ್, ಇರಾನ್ ಮೇಲೆ ಕಠಿಣ ಆರ್ಥಿಕ ನಿರ್ಬಂಧಗಳನ್ನು ಹೇರಿದರು. ಇದರಿಂದ ಇರಾನ್ನ ತೈಲ ರಫ್ತು ಗಣನೀಯವಾಗಿ ಕುಸಿಯಿತು ಮತ್ತು ಅವರ ಆರ್ಥಿಕತೆ ತೀವ್ರ ಸಂಕಷ್ಟಕ್ಕೆ ಸಿಲುಕಿತು.
ಪ್ರಮುಖ ವ್ಯಕ್ತಿಗಳ ಹತ್ಯೆ: ಯುದ್ಧದ ಮೊದಲ ದಿನವೇ ಇರಾನ್ನ ಪರಮೋಚ್ಚ ನಾಯಕ ಅಯಾತೊಲ್ಲಾ ಅಲಿ ಖಮೇನಿ ಅವರನ್ನು ಹತ್ಯೆಗೈಯ್ಯುವಲ್ಲಿ ಅಮೆರಿಕ ಯಶಸ್ವಿಯಾಯಿತು. ಅಲ್ಲದೆ, ಶಕ್ತಿಶಾಲಿ ಸೇನಾ ಕಮಾಂಡರ್ ಖಾಸಿಂ ಸುಲೈಮಾನಿ ಅವರನ್ನು ಡ್ರೋನ್ ದಾಳಿಯ ಮೂಲಕ ಹತ್ಯೆ ಮಾಡಿದ್ದು ಟ್ರಂಪ್ ಆಡಳಿತದ ಯಶಸ್ಸು ಎಂದು ಪರಿಗಣಿಸಲಾಗಿದೆ. ಇದು ಇರಾನ್ನ ಪ್ರಾದೇಶಿಕ ಪ್ರಭಾವಕ್ಕೆ ದೊಡ್ಡ ಪೆಟ್ಟು ನೀಡಿತು.
ಅಬ್ರಾಹಂ ಒಪ್ಪಂದಗಳು: ಇರಾನ್ ಅನ್ನು ಈ ಪ್ರದೇಶದಲ್ಲಿ ಏಕಾಂಗಿ ಮಾಡಲು ಇಸ್ರೇಲ್ ಮತ್ತು ಇತರ ಅರಬ್ ರಾಷ್ಟ್ರಗಳ (ಯುಎಇ, ಬಹ್ರೇನ್) ನಡುವೆ ಶಾಂತಿ ಒಪ್ಪಂದ ಏರ್ಪಡುವಂತೆ ಮಾಡಿದ್ದು ಟ್ರಂಪ್ ಪ್ರಮುಖ ಸಾಧನೆ.
ಯುದ್ಧ ಆರಂಭವಾಗಿ 35 ದಿನಗಳು ಕಳೆದಿದ್ದರೂ, ಇರಾನ್ ಬಳಿ ಇಂದಿಗೂ ಹೆಚ್ಚಿನ ಸಂಖ್ಯೆಯಲ್ಲಿ ಕ್ಷಿಪಣಿಗಳು ಬಾಕಿ ಇವೆ ಮತ್ತು ಅವುಗಳ ಮೂಲಕ ಅದು ನಿರಂತರವಾಗಿ ದಾಳಿಗಳನ್ನು ನಡೆಸುತ್ತಿದೆ. ಇರಾನ್ ತನ್ನ ಕ್ಷಿಪಣಿಗಳನ್ನು ವಿವಿಧ ರಹಸ್ಯ ಸ್ಥಳಗಳಲ್ಲಿ ಬಚ್ಚಿಟ್ಟಿದೆ. ಅನೇಕ ನೆಲೆಗಳು ಭೂಮಿಯ ಆಳದಲ್ಲಿದ್ದು, ಅವುಗಳನ್ನು ಸಂಪೂರ್ಣವಾಗಿ ನಾಶಪಡಿಸುವುದು ಕಷ್ಟಕರವಾದ ಕೆಲಸವಾಗಿದೆ. ಅಲ್ಲದೆ, ಇರಾನ್ ಬಳಿ ಸ್ಥಳದಿಂದ ಸ್ಥಳಕ್ಕೆ ಬೇಗನೆ ಸಾಗಿಸಬಹುದಾದ ಸಂಚಾರಿ ಲಾಂಚರ್ಗಳಿವೆ. ದಾಳಿ ನಡೆದ ತಕ್ಷಣ ಇವುಗಳ ಜಾಗವನ್ನು ಬದಲಿಸಿ ಬಳಸಬಹುದಾಗಿದೆ. ಮುಖ್ಯವಾಗಿ, ಇರಾನ್ ಈಗ ಕೇವಲ ಕ್ಷಿಪಣಿಗಳ ಮೇಲೆ ಅವಲಂಬಿತವಾಗಿಲ್ಲ. ಅಮೆರಿಕಕ್ಕೆ ತಲೆನೋವು ನೀಡಲು ಅದು ಈಗ ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಡ್ರೋನ್ಗಳನ್ನು ಬಳಸಲು ಆರಂಭಿಸಿದೆ. ಇರಾನ್ ಬಳಿ ಸಣ್ಣ ಗಾತ್ರದ ಆದರೆ ಅತೀ ವೇಗವಾಗಿ ಚಲಿಸುವ ದೋಣಿಗಳಿವೆ, ಇವುಗಳನ್ನು ಬಳಸಿ ಅದು ಇನ್ನೂ ದಾಳಿ ನಡೆಸಬಲ್ಲದು. ಸಮುದ್ರದಲ್ಲಿ ಸ್ಪೋಟಕ ಸುರಂಗಗಳನ್ನು (ಮೈನ್ಗಳನ್ನು) ಹಾಸುವ ತಂತ್ರವನ್ನು ಇರಾನ್ ಅನುಸರಿಸಬಹುದು.
ಇರಾನ್ ಸರ್ಕಾರವನ್ನು ಕಿತ್ತೊಗೆಯಲು ಟ್ರಂಪ್ ಅಲ್ಲಿನ ಜನತೆಗೆ ಕರೆ ನೀಡಿದ್ದರು. ಆದರೆ, ಇದುವರೆಗೆ ಅಲ್ಲಿ ಅಂತಹ ಯಾವುದೇ ದೊಡ್ಡ ಮಟ್ಟದ ಜನಸಾಮಾನ್ಯರ ಆಂದೋಲನ ಅಥವಾ ಕ್ರಾಂತಿ ನಡೆದಿಲ್ಲ. ಇರಾನ್ ಮೇಲೆ ನಡೆದ ದಾಳಿಗಳಲ್ಲಿ ಅಲ್ಲಿನ ಅತ್ಯುನ್ನತ ನಾಯಕ ಅಯಾತೊಲ್ಲಾ ಅಲಿ ಖಮೇನಿ ಮತ್ತು ಅನೇಕ ಪ್ರಭಾವಿ ಅಧಿಕಾರಿಗಳು ಹತರಾಗಿರುವುದರಿಂದ ‘ಆಡಳಿತ ಬದಲಾಗಿದೆ’ ಎಂದು ಟ್ರಂಪ್ ಪ್ರತಿಪಾದಿಸಿದ್ದಾರೆ. ಆದರೆ, ಅಲಿ ಖಮೇನಿ ನಂತರ ಅವರ ಪುತ್ರ ಮುಜ್ತಬಾ ಖಮೇನಿ ಇರಾನ್ನ ಹೊಸ ಸವೋಚ್ಚ ನಾಯಕರಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ. ಮುಜ್ತಬಾ ಖಮೇನಿ ಇರಾನ್ ಸೇನೆಯ ಶಕ್ತಿಶಾಲಿ ವಿಭಾಗಗಳೊಂದಿಗೆ ನಿಕಟ ಸಂಬಂಧ ಹೊಂದಿದ್ದಾರೆ. ಅಲ್ಲದೆ, ಇರಾನ್ನ ಸರ್ಕಾರ ಇಂದಿಗೂ ಧಾರ್ವಿುಕ ನಿಯಂತ್ರಣವನ್ನೇ ಹೊಂದಿದೆ. ಅಮೆರಿಕದ ವಿರುದ್ಧ ಆ ದೇಶ ಹೊಂದಿರುವ ಆಕ್ರೋಶ ಮತ್ತು ಕಠಿಣ ನಿಲುವುಗಳಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ. ಹಳೆಯ ನಾಯಕತ್ವ ಹೋದರೂ, ಇರಾನ್ನ ಆಡಳಿತ ವ್ಯವಸ್ಥೆಯ ಮೂಲ ಸ್ವರೂಪ ಮೊದಲಿಗಿಂತಲೂ ಹೆಚ್ಚು ಕಠಿಣವಾಗಿದೆ.