10 ವರ್ಷ, 6 ಪ್ರಧಾನಿ! 23 ತಿಂಗಳಿಗೆ ರಾಜೀನಾಮೆ ಘೋಷಿಸಲು ಸ್ಟಾರ್ಮರ್​ ಮಾಡಿಕೊಂಡ ಆ 4 ಎಡವಟ್ಟೇ ಕಾರಣ?

ಲಂಡನ್​: ಪಿಎಂ ಹುದ್ದೆಗೆ ಮತ್ತು ಲೇಬರ್​ ಪಕ್ಷದ ಸ್ಥಾನಕ್ಕೆ ರಾಜೀನಾಮೆ ನೀಡಿರುವ ಯುಕೆ ಮಾಜಿ ಪ್ರಧಾನಿ ಕೀರ್ ಸ್ಟಾರ್ಮರ್, 2024ರ ಜುಲೈನಲ್ಲಿ ಭರ್ಜರಿ ಬಹುಮತ ಪಡೆದು ಅಧಿಕಾರಕ್ಕೇರಿದ 23 ತಿಂಗಳಲ್ಲೇ ಪಟ್ಟದಿಂದ ಕೆಳಗಿಳಿದಿರುವುದು ಸದ್ಯ ಜಾಗತಿಕ ರಾಜಕೀಯ ವಲಯದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.

ಕೀರ್​ ಅವರ ರಾಜೀನಾಮೆಯಿಂದಾಗಿ ಬ್ರಿಟನ್ ಕಳೆದ 10 ವರ್ಷಗಳಲ್ಲಿ 7ನೇ ಪ್ರಧಾನಿಯನ್ನು ನೋಡುವ ಹೊಸ್ತಿಲಲ್ಲಿದೆ. ಅಸಲಿಗೆ, ಬ್ರಿಟನ್​ ರಾಜಕೀಯದಲ್ಲಿ ಆಂತರಿಕೆ ಸಮಸ್ಯೆಗಳು, ತಮ್ಮ ಮೇಲೆ ತೀವ್ರ ಒತ್ತಡ ಹಾಕಿದ ಕಾರಣಕ್ಕೇ ಅವರು ಈ ನಿರ್ಧಾರ ಕೈಗೊಂಡಿರುವುದು ಮೇಲ್ನೋಟಕ್ಕೆ ಸ್ಪಷ್ಟವಾಗಿದೆ. ಈ ಕುರಿತಾಗಿ ಇಲ್ಲಿಯವರೆಗೆ ಸ್ಟಾರ್ಮರ್​ ಯಾವುದೇ ರೀತಿ ಸ್ಪಷ್ಟನೆ ಅಥವಾ ಬೆರಳು ಮಾಡಿ ಯಾರ ಬಗ್ಗೆಯೂ ಮಾತನಾಡಿಲ್ಲ.  

ಕೀರ್ ಸ್ಟಾರ್ಮರ್ ಅವರ ರಾಜೀನಾಮೆ ದಿಢೀರ್​ ಆಗಿದ್ದಲ್ಲ. ಕಳೆದ ಕೆಲವು ತಿಂಗಳುಗಳಿಂದ ಸ್ವಪಕ್ಷದ (ಲೇಬರ್ ಪಾರ್ಟಿ) ಸಂಸದರಲ್ಲೇ ಅವರ ನಾಯಕತ್ವದ ಬಗ್ಗೆ ಸಾಕಷ್ಟು ಭಿನ್ನಾಭಿಪ್ರಾಯ ಭುಗಿಲೆದ್ದಿತ್ತು. ಇದು ಆಂತರಿಕವಾಗಿ ಪಕ್ಷದ ನಾಯಕರಲ್ಲಿ ವೈಮನಸ್ಸು ಮೂಡುವಂತೆ ಮಾಡಿತ್ತು.  

2024ರ ಚುನಾವಣೆಯಲ್ಲಿ ಭರ್ಜರಿ ಜಯ ದಾಖಲಿಸಿದ್ದರೂ, ಅಧಿಕಾರಕ್ಕೆ ಬಂದ ನಂತರ ಲೇಬರ್ ಪಕ್ಷದ ಜನಪ್ರಿಯತೆ ತಲೆಕೆಳಗಾಯಿತು. ಗೆದ್ದಾಗ ಇದ್ದ ಜೋಶ್​, ಅಧಿಕಾರದ ಅವಧಿಯಲ್ಲಿ ದಿನದಿಂದ ದಿನಕ್ಕೆ ಕಣ್ಮರೆಯಾಯಿತು. ಸ್ಟಾರ್ಮರ್ ಅವರ ಆಡಳಿತ ವೈಖರಿಯನ್ನು ಬೆಂಬಲಿಸದ ಪಕ್ಷದ ನಾಯಕರು, ಸಂಸದರು, ನಾಯಕತ್ವ ಬದಲಾವಣೆಗೆ ಒತ್ತಡ ಹೇರಲು ಪ್ರಾರಂಭಿಸಿದರು. ಇದು ಅವರ ರಾಜೀನಾಮೆಗೆ ಒಂದು ಬಲವಾದ ಕಾರಣ. 

ಸ್ಟಾರ್ಮರ್ ಸರ್ಕಾರವು ದೇಶದ ಆರ್ಥಿಕ ಬೆಳವಣಿಗೆಯನ್ನು ಹೆಚ್ಚಿಸುವಲ್ಲಿ ಮತ್ತು ನಾಗರಿಕರ ಜೀವನ ವೆಚ್ಚದ ಬಿಕ್ಕಟ್ಟನ್ನು ನಿಯಂತ್ರಿಸುವಲ್ಲಿ ಸಂಪೂರ್ಣವಾಗಿ ವಿಫಲವಾಯಿತು. ಜನರ ಜೀವನಮಟ್ಟ ಸುಧಾರಿಸದ ಹಿನ್ನೆಲೆಯಲ್ಲಿ ಸಾರ್ವಜನಿಕರಲ್ಲಿ ಸರ್ಕಾರದ ವಿರುದ್ಧ ತೀವ್ರ ಅಸಮಾಧಾನ ಕೇಳಿಬಂದಿತು. ಇದನ್ನೇ ವಿರೋಧ ಪಕ್ಷಗಳು ಬಂಡವಾಳ ಮಾಡಿಕೊಂಡಿತು. 

ಸ್ಟಾರ್ಮರ್ ಅವರ ಇಮೇಜ್‌ಗೆ ದೊಡ್ಡ ಹೊಡೆತ ನೀಡಿದ್ದೇ ಮಾಜಿ ಸಂಸದ ಪೀಟರ್ ಮ್ಯಾಂಡೆಲ್ಸನ್ ಅವರನ್ನು ಅಮೆರಿಕದ ಬ್ರಿಟನ್ ರಾಯಭಾರಿಯನ್ನಾಗಿ ನೇಮಕ ಮಾಡಿದ ನಿರ್ಧಾರ. ಕುಖ್ಯಾತ ಅಪರಾಧಿ ಜೆಫ್ರಿ ಎಪ್ಸ್ಟಿನ್​ ಜೊತೆ ಮ್ಯಾಂಡೆಲ್ಸನ್ ನಂಟು ಹೊಂದಿದ್ದ ವಿಷಯ ಬಹಿರಂಗಗೊಂಡ ಕೂಡಲೇ ಅವರನ್ನು ಹುದ್ದೆಯಿಂದ ವಜಾ ಮಾಡಲಾಯಿತು. ಆದರೆ, ಅಷ್ಟರೊಳಗೆ ಸ್ಟಾರ್ಮರ್ ಸರ್ಕಾರದ ಹೆಸರಿಗೆ ಭಾರಿ ಕಳಂಕ ಅಂಟಿಕೊಂಡಿತ್ತು.

ದೇಶೀಯವಾಗಿ ಸಾಕಷ್ಟು ಟೀಕೆ ಮತ್ತು ವಿವಾದಗಳನ್ನು ಎದುರಿಸಿದರೂ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕೀರ್​ ಸ್ಟಾರ್ಮರ್ ತೆಗೆದುಕೊಂಡ ಕೆಲವು ಮಹತ್ವದ ನಿರ್ಧಾರಗಳು ಜನರ ಗಮನ ಸೆಳೆದಿವೆ.