- ಅಮೆರಿಕದ ಕುಖ್ಯಾತ ಲೈಂಗಿಕ ಅಪರಾಧಿ ಮತ್ತು ಉದ್ಯಮಿ ಜೆಫ್ರಿ ಎಪ್ಸ್ಟೀನ್ ಸಂಬಂಧಿತ ಬಿಡುಗಡೆಯಾಗಿದ್ದ ಫೈಲ್ಸ್
- ಶುಕ್ರವಾರ ಬಿಡುಗಡೆಯಾದ ಕಡತಗಳು ಶನಿವಾರ ಕಣ್ಮರೆ
- ಅಮೆರಿಕ ಅಧ್ಯಕ್ಷ ಟ್ರಂಪ್ ಫೋಟೊ ಸೇರಿ 16 ದಾಖಲೆಗಳು ಕಾಣೆ
ಅಮೆರಿಕ : ಶುಕ್ರವಾರ (ಡಿ.19) ಬಿಡುಗಡೆ ಮಾಡಲಾದ ಲೈಂಗಿಕ ಅಪರಾಧಿ ಜೆಫ್ರಿ ಎಪ್ಸ್ಟೀನ್ಗೆ ಸಂಬಂಧಿಸಿದ ಸುಮಾರು 16 ಫೈಲ್ಗಳು ಶನಿವಾರ ಅಮೆರಿಕದ ನ್ಯಾಯ ಇಲಾಖೆಯ ಸಾರ್ವಜನಿಕ ವೆಬ್ಸೈಟ್ನಿಂದ ಕಣ್ಮರೆಯಾಗಿದೆ. ಕಣ್ಮರೆಯಾದ ಫೈಲ್ಗಳಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಕುರಿತಾದ ದಾಖಲೆಗಳಿದ್ದವು ಎಂದು ಹೇಳಲಾಗುತ್ತಿದೆ. ಶುಕ್ರವಾರ ಪೋಸ್ಟ್ ಮಾಡಲಾದ ಮತ್ತು ಶನಿವಾರದ ವೇಳೆಗೆ ಕಾಣೆಯಾದ ದಾಖಲೆಗಳಲ್ಲಿ ನಗ್ನ ಮಹಿಳೆಯರನ್ನು ಚಿತ್ರಿಸುವ ಚಿತ್ರಗಳು ಹಾಗೂ ಎಪ್ಸ್ಟೀನ್, ಮೆಲಾನಿಯಾ ಟ್ರಂಪ್ ಮತ್ತು ಗಿಸ್ಲೇನ್ ಮ್ಯಾಕ್ಸ್ವೆಲ್ ಅವರೊಂದಿಗೆ ಡೊನಾಲ್ಡ್ ಟ್ರಂಪ್ ಇರುವ ಛಾಯಾಚಿತ್ರ ಸೇರಿವೆ.ಈ ಫೈಲ್ಗಳ ತೆಗೆದುಹಾಕುವಿಕೆ ಉದ್ದೇಶಪೂರ್ವಕವಾಗಿದೆಯೇ ಅಥವಾ ಆಕಸ್ಮಿಕವಾಗಿದೆಯೇ ಎಂದು ನ್ಯಾಯ ಇಲಾಖೆ ಇಲ್ಲಿಯವರೆಗೆ ಸ್ಪಷ್ಟ ಪಡಿಸಿಲ್ಲ. ಹೌಸ್ ಓವರ್ಸೈಟ್ ಸಮಿತಿಯಲ್ಲಿರುವ ಡೆಮೋಕ್ರಾಟ್ ಪಕ್ಷದವರು ಈ ಫೈಲ್ ಕಾಣಿಯಾಗುವಿಕೆಗೆ ಅಮೆರಿಕಾದ ಜನರಿಂದ ಇನ್ನೇನು ಮುಚ್ಚಿಡಲಾಗುತ್ತಿದೆ? ಸಾರ್ವಜನಿಕರಿಗೆ ಪಾರದರ್ಶಕತೆ ಬೇಕು ಎಂದು ಪ್ರತಿಕ್ರಿಯಿಸಿದ್ದಾರೆ.
ಬಿಡುಗಡೆಯಾದ ದಾಖಲೆಗಳಲ್ಲಿ ಟ್ರಂಪ್ ಬಗ್ಗೆ ಉಲ್ಲೇಖ
ಸಾವಿರಾರು ಎಪ್ಸ್ಟೀನ್-ಸಂಬಂಧಿತ ದಾಖಲೆಗಳ ಬಿಡುಗಡೆಯು ಮಾಜಿ ಅಧ್ಯಕ್ಷ ಬಿಲ್ ಕ್ಲಿಂಟನ್ರಂತಹ ಹಲವಾರು ಉನ್ನತ ವ್ಯಕ್ತಿಗಳ ಉಲ್ಲೇಖಗಳನ್ನು ಒಳಗೊಂಡಿತ್ತು. ಆದಾಗ್ಯೂ, ಡೊನಾಲ್ಡ್ ಟ್ರಂಪ್ ಅವರ ಹೆಸರು ಲಿಖಿತ ದಾಖಲೆಗಳಲ್ಲಿ ಹೆಚ್ಚಾಗಿ ಇಲ್ಲದದ್ದರೂ, ಟ್ರಂಪ್ಗೆ ಎಪ್ಸ್ಟೀನ್ ಜತೆಗೆ ಸಂಪರ್ಕವಿದ್ದದ್ದು ಸತ್ಯ. ಆದರೆ ಟ್ರಂಪ್ ಎಪ್ಸ್ಟೀನ್ ಅವರ ಅಪರಾಧ ಚಟುವಟಿಕೆಗಳಲ್ಲಿ ಯಾವುದೇ ರೀತಿಯಲ್ಲಿ ಭಾಗಿಯಾಗಿಲ್ಲ ಎಂದು ನಿರಂತರವಾಗಿ ನಿರಾಕರಿಸಿದ್ದಾರೆ.
ಪ್ರಮುಖ ದಾಖಲೆಗಳು ಕಾಣೆಯಾಗಿವೆ
ಕಾಣೆಯಾದ ಫೈಲ್ಗಳಲ್ಲಿ ಎಪ್ಸ್ಟೀನ್ನಿಂದ ನೊಂದ ವ್ಯಕ್ತಿಗಳ ಎಫ್ಬಿಐ ಸಂದರ್ಶನಗಳು, ಎಪ್ಸ್ಟೀನ್ಗೆ ಲೈಂಗಿಕ ಕಳ್ಳಸಾಗಣೆ ಬದಲು ಸಣ್ಣ ವೇಶ್ಯಾವಾಟಿಕೆ ಅಪರಾಧವನ್ನು ಒಪ್ಪಿಕೊಳ್ಳಲು ಅವಕಾಶ ನೀಡುವ ದಾಖಲೆಗಳು ಹಾಗೂ ಯುನೈಟೆಡ್ ಕಿಂಗ್ಡಮ್ನ ಮಾಜಿ ಪ್ರಿನ್ಸ್ ಆಂಡ್ರ್ಯೂ ಕುರಿತು ಇರುವ ಫೈಲ್ಗಳು ಕಾಣೆಯಾಗಿವೆ.
ಎಪ್ಸ್ಟೀನ್ ಫೈಲ್ಗಳ ಬಗ್ಗೆ
ಜೆಫ್ರಿ ಎಪ್ಸ್ಟೀನ್ಗೆ ಸಂಬಂಧಿಸಿದ ತನಿಖೆಗೆ ಸಂಬಂಧಿಸಿದ 300,000 ಕ್ಕೂ ಹೆಚ್ಚು ದಾಖಲೆಗಳನ್ನು ಯುಎಸ್ ನ್ಯಾಯಾಂಗ ಇಲಾಖೆ ಶುಕ್ರವಾರ ರಾತ್ರಿ ಬಿಡುಗಡೆ ಮಾಡಿತ್ತು. ಅವುಗಳಲ್ಲಿ ಮಾಜಿ ಯುಎಸ್ ಅಧ್ಯಕ್ಷ ಬಿಲ್ ಕ್ಲಿಂಟನ್, ಪಾಪ್ ಗಾಯಕ ಮೈಕೆಲ್ ಜಾಕ್ಸನ್, ಹಾಲಿವುಡ್ ನಟ ಕ್ರಿಸ್ ಟಕರ್ ಮತ್ತು ಬ್ರಿಟನ್ನ ಪ್ರಿನ್ಸ್ ಆಂಡ್ರ್ಯೂ ಅವರಂತಹ ಪ್ರಮುಖ ವ್ಯಕ್ತಿಗಳ ಛಾಯಾಚಿತ್ರಗಳು ಇದ್ದವು. ಕೆಲವು ಫೋಟೋಗಳಲ್ಲಿ, ಕ್ಲಿಂಟನ್ ನಗ್ನರಾದ ಹುಡುಗಿಯರೊಂದಿಗೆ ಪೂಲ್ನಲ್ಲಿ ಈಜುತ್ತಿರುವುದನ್ನು ಮತ್ತು ಪಾರ್ಟಿಗಳಿಗೆ ಹಾಜರಾಗುತ್ತಿರುವುದನ್ನು ಕಾಣಬಹುದು. ಒಟ್ಟಾರೆಯಾಗಿ, 2.5 GB ಗಿಂತ ಹೆಚ್ಚಿನ ಫೋಟೋಗಳು ಮತ್ತು ದಾಖಲೆಗಳನ್ನು ಒಳಗೊಂಡಂತೆ 3,500 ಕ್ಕೂ ಹೆಚ್ಚು ಫೈಲ್ಗಳಿವೆ.
ಯಾರು ಈ ಜೆಫ್ರಿ ಎಪ್ಸ್ಟೀನ್?
ಜೆಫ್ರಿ ಎಡ್ವರ್ಡ್ ಎಪ್ಸ್ಟೀನ್ (1953-2019) ಅಮೆರಿಕದ ಶ್ರೀಮಂತ ಹಣಕಾಸು ಉದ್ಯಮಿ ಮತ್ತು ಲೈಂಗಿಕ ಅಪರಾಧಿ. ಅಪ್ರಾಪ್ತ ಬಾಲಕಿಯರನ್ನು ಲೈಂಗಿಕ ದೌರ್ಜನ್ಯಕ್ಕೆ ಒಳಪಡಿಸಿ, ಕಳ್ಳಸಾಗಾಣೆ ಮಾಡಿದ ಆರೋಪ ಆತನ ಮೇಲಿದೆ. 2008ರಲ್ಲಿ ಶಿಕ್ಷೆಗೆ ಒಳಗಾಗಿದ್ದ ಮತ್ತು 2019ರಲ್ಲಿ ಮತ್ತೆ ಬಂಧನಕ್ಕೊಳಗಾಗಿ ಜೈಲಿನಲ್ಲೇ ಆತ್ಮಹತ್ಯೆ ಮಾಡಿಕೊಂಡನು.(ಏಜನ್ಸೀಸ್).