ಯುಎಸ್-ಇರಾನ್ ಮಧ್ಯ ಒಪ್ಪಂದವಾದ್ರೂ ಲೆಬನಾನ್, ಸಿರಿಯಾ, ಗಾಜಾದಿಂದ ನಾವು ಸೈನ್ಯ ಹಿಂತೆಗೆದುಕೊಳ್ಳಲ್ಲ ಎಂದ ಇಸ್ರೇಲ್ | Israel

ಜೆರುಸಲೆಮ್: ಲೆಬನಾನ್ ಸೇರಿದಂತೆ ಮಧ್ಯಪ್ರಾಚ್ಯದಲ್ಲಿನ ಯುದ್ಧವನ್ನು ಕೊನೆಗೊಳಿಸಲು ಅಮೆರಿಕ ಮತ್ತು ಇರಾನ್ ನಡುವೆ ಶಾಂತಿ ಒಪ್ಪಂದವಾದ್ರೂ ಲೆಬನಾನ್, ಸಿರಿಯಾ, ಗಾಜಾದಿಂದ ನಾವು ಸೇನೆಯನ್ನು ಹಿಂತೆಗೆದುಕೊಳ್ಳಲ್ಲ ಎಂದು ಸೋಮವಾರ(ಜೂ. 15) ಇಸ್ರೇಲ್(Israel) ರಕ್ಷಣಾ ಸಚಿವರು ಹೇಳಿದ್ದಾರೆ.

ಈ ಕುರಿತು ಹೇಳಿಕೆ ಬಿಡುಗಡೆ ಮಾಡಿರುವ ಇಸ್ರೇಲ್ ರಕ್ಷಣಾ ಸಚಿವ ಇಸ್ರೇಲ್​ ಕಾಟ್ಜ್, ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಮತ್ತು ನಾನು ಸ್ಪಷ್ಟ ನೀತಿಯನ್ನು ಅನುಸರಿಸುತ್ತಿದ್ದೇವೆ. ಅದರ ಅಡಿಯಲ್ಲಿ ಐಡಿಎಫ್ ಲೆಬನಾನ್, ಸಿರಿಯಾ ಮತ್ತು ಗಾಜಾದಲ್ಲಿ ಅನಿಯಮಿತ ಅವಧಿಯವರೆಗೆ ಇರುತ್ತದೆ. ಇದು ಗಡಿ ಮತ್ತು ಇಸ್ರೇಲಿ ಸಮುದಾಯಗಳನ್ನು ಜಿಹಾದಿಗಳಿಂದ ರಕ್ಷಿಸುತ್ತದೆ ಎಂದು ತಿಳಿಸಿದ್ದಾರೆ.

ಈ ಪ್ರದೇಶವನ್ನು ಸ್ಥಳೀಯ ನಿವಾಸಿಗಳಿಂದ ತೆರವುಗೊಳಿಸಲಾಗುವುದು. ಮತ್ತು ಭಯೋತ್ಪಾದಕ ಹೊರಠಾಣೆಗಳಾಗಿ ಮುಂಚೂಣಿಯಲ್ಲಿದ್ದ ಹಳ್ಳಿಗಳಲ್ಲಿನ ಮನೆಗಳು ಸೇರಿದಂತೆ ನೆಲದ ಮೇಲೆ ಮತ್ತು ಕೆಳಗಿನ ಎಲ್ಲಾ ಭಯೋತ್ಪಾದಕ ಮೂಲಸೌಕರ್ಯಗಳನ್ನು ನಾಶಪಡಿಸಲಾಗುವುದು ಎಂದಿದ್ದಾರೆ.

ಅಸ್ತಿತ್ವದಲ್ಲಿರುವ ಮತ್ತು ಮುಂಬರುವ ಎಲ್ಲಾ ಒತ್ತಡಗಳ ಹೊರತಾಗಿಯೂ ಲೆಬನಾನ್‌ನಿಂದ ಐಡಿಎಫ್ ಹಿಂತೆಗೆದುಕೊಳ್ಳುವಿಕೆಯನ್ನು ನಾವು ವಿರೋಧಿಸುತ್ತೇವೆ. ನೆತನ್ಯಾಹು ಈ ಬಗ್ಗೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ಗೆ ತಿಳಿಸಿದ್ದಾರೆ ಎಂದು ಪ್ರತಿಪಾದಿಸಿದ್ದಾರೆ.

ಲೆಬನಾನ್‌ನಲ್ಲಿ ತನ್ನ ಕಾರ್ಯಾಚರಣೆಗೆ ಪ್ರತಿಕ್ರಿಯೆಯಾಗಿ ಇಸ್ಲಾಮಿಕ್ ಗಣರಾಜ್ಯವು ಇಸ್ರೇಲ್ ಮೇಲೆ ದಾಳಿ ಮಾಡಿದರೆ, ಇಸ್ರೇಲ್ ಪೂರ್ಣ ಬಲದಿಂದ ಪ್ರತೀಕಾರ ತೀರಿಸಿಕೊಳ್ಳುತ್ತದೆ. ನಾವು ಇಸ್ರೇಲ್‌ನ ಪ್ರಮುಖ ಭದ್ರತಾ ಹಿತಾಸಕ್ತಿ ಮತ್ತು ನಮ್ಮ ನಾಗರಿಕರ ರಕ್ಷಣೆಯ ವಿಷಯದಲ್ಲಿ ರಾಜಿ ಮಾಡಿಕೊಳ್ಳುವುದಿಲ್ಲ ಮತ್ತು ಭದ್ರತಾ ವಲಯಗಳಿಂದ ಹಿಂದೆ ಸರಿಯುವುದಿಲ್ಲ ಎಂದು ಹೇಳಿದ್ದಾರೆ.

ಲೆಬನಾನ್‌ನಲ್ಲಿ ನಡೆದ ಘಟನೆಗಳ ಆಧಾರದ ಮೇಲೆ ಇರಾನ್ ಇಸ್ರೇಲ್ ಮೇಲೆ ದಾಳಿ ಮಾಡಿದರೆ, ನಾವು ಅದರ ಮೇಲೆ ಪೂರ್ಣ ಬಲದಿಂದ ದಾಳಿ ಮಾಡುತ್ತೇವೆ ಮತ್ತು ನಮ್ಮ ಸಾಮರ್ಥ್ಯಗಳಲ್ಲಿನ ಅಸಮಾನತೆಯನ್ನು ಸ್ಪಷ್ಟವಾಗಿ ಪ್ರದರ್ಶಿಸುತ್ತೇವೆ ಎಂದು ತಿಳಿಸಿದ್ದಾರೆ (ಏಜೆನ್ಸೀಸ್).