ಗಾಜಾದಲ್ಲಿ ಇಸ್ರೇಲ್ ಬೇಟೆ: ಹಮಾಸ್ ಸಂವಹನ ಜಾಲದ ಕಿಂಗ್‌ಪಿನ್ ಹತ್ಯೆ; ಬೆಚ್ಚಿಬಿದ್ದ ಉಗ್ರ ಸಂಘಟನೆ! IDF Killed Hamas Commander

ಐಡಿಎಫ್ ಮತ್ತು ಇಸ್ರೇಲ್‌ನ ಆಂತರಿಕ ಭದ್ರತಾ ಸಂಸ್ಥೆ ಶಿನ್ ಬೆಟ್ ಜಂಟಿಯಾಗಿ ನಡೆಸಿದ ಈ ಕಾರ್ಯಾಚರಣೆಯಲ್ಲಿ, ಹಮಾಸ್‌ನ ಕಮ್ಯುನಿಕೇಷನ್ ಕಮಾಂಡರ್‌ನನ್ನು ಗುರಿಯಾಗಿಸಲಾಗಿತ್ತು. ಈತ ಗಾಜಾದಾದ್ಯಂತ ಹಮಾಸ್‌ನ ವಿವಿಧ ಘಟಕಗಳ ನಡುವೆ ಸಮನ್ವಯ ಸಾಧಿಸಲು ಮತ್ತು ಗುಪ್ತಚರ ಮಾಹಿತಿಗಳನ್ನು ರವಾನಿಸಲು ಪ್ರಮುಖ ಪಾತ್ರ ವಹಿಸುತ್ತಿದ್ದ. ಈ ಹತ್ಯೆಯ ಮೂಲಕ ಹಮಾಸ್ ತನ್ನ ಮಿಲಿಟರಿ ಸಾಮರ್ಥ್ಯವನ್ನು ಮರುಸಂಘಟಿಸುವ ಪ್ರಯತ್ನಕ್ಕೆ ಇಸ್ರೇಲ್ ಅಡ್ಡಿಪಡಿಸಿದೆ.

ಹಮಾಸ್ ಸಂಘಟನೆಯು ಗಾಜಾ ನಗರದಲ್ಲಿ ತನ್ನ ಮಿಲಿಟರಿ ನೆಲೆಗಳನ್ನು ಮತ್ತೆ ನಿರ್ಮಿಸಲು ಹವಣಿಸುತ್ತಿತ್ತು. ಆದರೆ ಈ ಕಾರ್ಯಾಚರಣೆಯ ಮೂಲಕ ನಾವು ಅವರ ಸಂವಹನ ಜಾಲವನ್ನೇ ಕತ್ತರಿಸಿದ್ದೇವೆ ಎಂದು ಐಡಿಎಫ್ ವಕ್ತಾರರು ತಿಳಿಸಿದ್ದಾರೆ. ಕೇವಲ ಕಮಾಂಡರ್ ಹತ್ಯೆಯಷ್ಟೇ ಅಲ್ಲದೆ, ಹಮಾಸ್‌ನ ಶಸ್ತ್ರಾಸ್ತ್ರ ಸಂಗ್ರಹಾಗಾರಗಳು ಮತ್ತು ಸುರಂಗ ಮಾರ್ಗಗಳ ಮೇಲೆಯೂ ದಾಳಿ ನಡೆಸಲಾಗಿದ್ದು, ಹತ್ತಾರು ಭಯೋತ್ಪಾದಕರನ್ನು ಹತ್ಯೆ ಮಾಡಿರುವುದಾಗಿ ಸೇನೆ ಪ್ರತಿಪಾದಿಸಿದೆ.

ಗಾಜಾ ನಗರದ ಉತ್ತರ ಭಾಗದಲ್ಲಿ ಇಸ್ರೇಲ್ ಪಡೆಗಳು ನೆಲದ ಮೇಲಿನ ಕಾರ್ಯಾಚರಣೆಯನ್ನು ತೀವ್ರಗೊಳಿಸಿವೆ. ಸ್ಥಳೀಯ ಮೂಲಗಳ ಪ್ರಕಾರ, ಜಬಾಲಿಯಾ ಮತ್ತು ಶೆಜೈಯಾ ಪ್ರದೇಶಗಳಲ್ಲಿ ಭೀಕರ ಯುದ್ಧ ನಡೆಯುತ್ತಿದೆ. ಹಮಾಸ್ ತನ್ನ ಸಂವಹನ ವ್ಯವಸ್ಥೆ ಕಳೆದುಕೊಂಡಿರುವುದು ಅದರ ಹೋರಾಟಗಾರರ ನಡುವಿನ ಸಮನ್ವಯತೆಯನ್ನು ಕುಗ್ಗಿಸಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಈ ದಾಳಿಯು ಒಂದು ಕಡೆ ಇಸ್ರೇಲ್‌ಗೆ ಗೆಲುವು ಎನಿಸಿದರೂ, ಗಾಜಾದಲ್ಲಿ ಹೆಚ್ಚುತ್ತಿರುವ ಸಾವುನೋವುಗಳು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಆತಂಕ ಮೂಡಿಸಿವೆ. ಕದನ ವಿರಾಮಕ್ಕಾಗಿ ಒತ್ತಾಯಗಳು ಕೇಳಿಬರುತ್ತಿದ್ದರೂ, ಹಮಾಸ್ ಅನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡುವವರೆಗೆ ದಾಳಿ ನಿಲ್ಲಿಸುವುದಿಲ್ಲ ಎಂದು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಪುನರುಚ್ಚರಿಸಿದ್ದಾರೆ,(ಏಜೆನ್ಸೀಸ್).