ಇರಾನ್ ಷರತ್ತುಗಳಿಗೆ ಇಸ್ರೇಲ್ ಡೋಂಟ್ ಕೇರ್: ಲೆಬನಾನ್​ ಮೇಲೆ ಭೀಕರ ವಾಯುದಾಳಿ; 250 ಸಾವು 800 ಮಂದಿ ಗಾಯ..Israel Attack Lebanon

ಲೆಬನಾನ್​: ಮಧ್ಯಪ್ರಾಚ್ಯದಲ್ಲಿ ಕಳೆದೊಂದು ತಿಂಗಳಿನಿಂದ ನಡೆಯುತ್ತಿದ್ದ ಸಂಘರ್ಷಕ್ಕೆ ಅಮೆರಿಕ ತಾತ್ಕಾಲಿಕ ತಡೆ ಎಂಬಂತೆ ಎರಡು ವಾರಗಳ ಕದನವಿರಾಮವನ್ನು ಘೋಷಿಸಿದೆ. ಆದರೆ ಈ ಸೀಸ್​ಫೈರ್​ನ್ನು ಗಾಳಿಗೆ ತೂರಿರುವ ಇಸ್ರೇಲ್​, ಲೆಬನಾನ್​ ಮೇಲೆ ದಾಳಿ (Israel Attack Lebanon) ಮುಂದುವರೆಸಿದೆ.

ಕದನ ವಿರಾಮ ಘೋಷಣೆಯಾದ ಕೆಲವೇ ಗಂಟೆಗಳಲ್ಲಿ ಇಸ್ರೇಲ್​, ದಕ್ಷಿಣ ಲೆಬನಾನ್​ನ ಬೈರುತ್ ಮತ್ತು ಬೆಕಾ ಕಣಿವೆ ಪ್ರದೇಶದ ಮೇಲೆ ಕೇವಲ 10 ನಿಮಿಷಗಳಲ್ಲಿ ಸುಮಾರು 100 ಸ್ಥಳಗಳನ್ನು ಗುರಿಯಾಗಿಸಿ ದಾಳಿ ನಡೆಸಿದೆ ಎಂದು ವರದಿಯಾಗಿದೆ. ಈ ಭೀಕರ ದಾಳಿಯಲ್ಲಿ ಅಂದಾಜು 254 ಜನ ಮೃತಪಟ್ಟಿದ್ದು, 837 ಜನ ತೀವ್ರವಾಗಿ ಗಾಯಗೊಂಡಿದ್ದಾರೆಂದು ಹೇಳಲಾಗುತ್ತಿದೆ. ಲೆಬನಾನ್‌ನ ನಾಗರಿಕ ರಕ್ಷಣಾ ಸಂಸ್ಥೆಯ ಪ್ರಕಾರ, ಕದನ ವಿರಾಮದ ನಂತರ ಇಸ್ರೇಲ್​ ನಡೆಸಿದ ಅತ್ಯಂತ ಭಯಾನಕ ದಾಳಿ ಇದಾಗಿದೆ ಎಂದು ಬಣ್ಣಿಸಲಾಗಿದೆ.

ಅಮೆರಿಕ ಕದನ ವಿರಾಮ ಘೋಷಿಸಿದ ನಂತರ ಇರಾನ್​ ತನ್ನ 10 ಷರತ್ತುಗಳನ್ನು ಅಮೆರಿಕ ಮತ್ತು ಇಸ್ರೇಲ್​ನ ಮುಂದಿಟ್ಟಿದ್ದು, ಈ ಷರತ್ತುಗಳನ್ನು ಉಭಯ ದೇಶಗಳು ಒಪ್ಪಿಕೊಂಡರೆ ಮಾತ್ರ ಶಾಂತಿಯನ್ನು ಸ್ಥಾಪಿಸಬಹುದು ಎಂದು ಇರಾನ್​ ಸ್ಪಷ್ಟ ಪಡಿಸಿದೆ.

ಹಾಗೆಯೇ, ಇರಾನ್​ ವಿಧಿಸಿರುವ ಷರತ್ತುಗಳಲ್ಲಿ ಲೆಬನಾನ್​ ಮೇಲೆ ದಾಳಿ ಮಾಡಬಾರದು ಎಂಬ ಅಂಶವನ್ನು ಸಹ ಸೇರಿಸಿದೆ. ಲೆಬನಾನ್​ ಮೇಲೆ ದಾಳಿ ಮುಂದುವರೆದರೆ ಹೊರ್ಮುಜ್​ ಜಲಸಂಧಿಯಲ್ಲಿ ಹಡಗುಗಳ ಓಡಾಟಕ್ಕೆ ನಿರ್ಬಂಧ ವಿಧಿಸುವುದಾಗಿ ಇರಾನ್​ ಎಚ್ಚರಿಕೆ ನೀಡಿದ್ದು, ಈ ದಾಳಿಯ ಬಳಿಕ ಹೊರ್ಮುಜ್​ ಜಲಸಂಧಿ ಮತ್ತೆ ಸ್ಥಗಿತಗೊಳ್ಳಲಿದೆ ಎಂದು ರಾಜಕೀಯ ವಿಶ್ಲೇಷಕರು ಹೇಳುತ್ತಿದ್ದಾರೆ. ಆದರೆ ಕದನ ವಿರಾಮದಲ್ಲಿ ಲೆಬನಾನ್​ನ ಉಲ್ಲೇಖವನ್ನು ಅಮೆರಿಕ ಮತ್ತು ಇಸ್ರೇಲ್​ ಒಪ್ಪಿಕೊಳ್ಳದಿರುವ ಕಾರಣ ಈ ದಾಳಿ ನಡೆದಿದೆ ಎನ್ನುವುದು ಜಾಗತಿಕ ರಾಜಕೀಯ ಪರಿಣಿತರ ಅಭಿಪ್ರಾಯವಾಗಿದೆ.

ಕದನ ವಿರಾಮದ ಕುರಿತು ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡ ಇಸ್ರೇಲ್​ ಪ್ರಧಾನಿ, ಬೆಂಜಾಮಿನ್​ ನೆತನ್ಯಾಹು, ನಾವು ಈ ಕದನ ವಿರಾಮವನ್ನು ಒಪ್ಪಿಕೊಳ್ಳತ್ತೇವೆ, ಆದರೆ ನಾವು ಲೆಬನಾನ್​ ಮತ್ತು ಹೆಜ್ಬೊಲ್ಲಾ ಮೇಲೆ ದಾಳಿಯನ್ನು ಮುಂದುವರೆಸುತ್ತೇವೆಂದು ಸ್ಪಷ್ಟವಾಗಿ ಹೇಳಿದ್ದಾರೆ,(ಏಜನ್ಸೀಸ್​).