ಇರಾನ್ ಅಂತಿಮ ಎಚ್ಚರಿಕೆ: ಲೆಬನಾನ್ ಮೇಲೆ ದಾಳಿ ಮುಂದುವರಿದರೆ ಕದನ ವಿರಾಮದಿಂದ ಹೊರಕ್ಕೆ! Iran Warning

ಇರಾನ್‌ನ ಅರೆ-ಅಧಿಕೃತ ಸುದ್ದಿ ಸಂಸ್ಥೆ ತಸ್ನಿಮ್ ವರದಿ ಮಾಡಿರುವಂತೆ, ಇಸ್ರೇಲ್ ನಡೆಸುತ್ತಿರುವ ಸರಣಿ ದಾಳಿಗಳು ಕದನ ವಿರಾಮದ ಸ್ಪಷ್ಟ ಉಲ್ಲಂಘನೆಯಾಗಿವೆ. ಇರಾನ್ ಪ್ರಕಾರ, ಈ ಒಪ್ಪಂದವು ಲೆಬನಾನ್‌ನ ಇಸ್ಲಾಮಿಕ್ ರೆಸಿಸ್ಟೆನ್ಸ್ (ಹಿಜ್ಬುಲ್ಲಾ) ಸೇರಿದಂತೆ ಎಲ್ಲಾ ರಂಗಗಳಲ್ಲಿ ಸಂಘರ್ಷವನ್ನು ನಿಲ್ಲಿಸುವ ಉದ್ದೇಶ ಹೊಂದಿತ್ತು. ಆದರೆ ಇಸ್ರೇಲ್ ಈ ಮಾತುಗಳನ್ನು ಗಾಳಿಗೆ ತೂರಿ ದಾಳಿ ಮುಂದುವರಿಸಿರುವುದು ಇರಾನ್‌ನ ಆಕ್ರೋಶಕ್ಕೆ ಕಾರಣವಾಗಿದೆ. ಒಂದು ವೇಳೆ ದಾಳಿಗಳು ತಕ್ಷಣ ನಿಲ್ಲದಿದ್ದರೆ, ತಾನು ಒಪ್ಪಂದಕ್ಕೆ ಬದ್ಧವಾಗಿರುವುದಿಲ್ಲ ಎಂದು ಇರಾನ್ ಮೂಲಗಳು ತಿಳಿಸಿವೆ.

ಮತ್ತೊಂದೆಡೆ, ಇಸ್ರೇಲ್ ತನ್ನ ಆಕ್ರಮಣದ ತೀವ್ರತೆಯನ್ನು ಮತ್ತಷ್ಟು ಹೆಚ್ಚಿಸಿದೆ. ಕೇವಲ 10 ನಿಮಿಷಗಳ ಅವಧಿಯಲ್ಲಿ ಬೈರೂತ್, ಬೆಕಾ ಕಣಿವೆ ಮತ್ತು ದಕ್ಷಿಣ ಲೆಬನಾನ್‌ನಾದ್ಯಂತ 100ಕ್ಕೂ ಹೆಚ್ಚು ಸ್ಥಳಗಳ ಮೇಲೆ ಇಸ್ರೇಲ್ ವಾಯುಪಡೆ ಬಾಂಬ್ ಮಳೆಗರೆದಿದೆ. ಇದು ಪ್ರಸ್ತುತ ಯುದ್ಧದ ಅತಿದೊಡ್ಡ ಸಂಘಟಿತ ದಾಳಿ ಎಂದು ಇಸ್ರೇಲಿ ರಕ್ಷಣಾ ಪಡೆ ಬಣ್ಣಿಸಿದೆ.

ಮಾರ್ಚ್ 2 ರಂದು ಹಿಜ್ಬುಲ್ಲಾ ನಡೆಸಿದ ಗಡಿಯಾಚೆಗಿನ ದಾಳಿಯ ನಂತರ, ಇಸ್ರೇಲ್ ತನ್ನ ಪೂರ್ಣ ಶಕ್ತಿಯನ್ನು ಲೆಬನಾನ್ ಮೇಲೆ ಪ್ರಯೋಗಿಸುತ್ತಿದೆ. ನವೆಂಬರ್ 2024 ರಿಂದಲೇ ಕದನ ವಿರಾಮ ಜಾರಿಯಲ್ಲಿದ್ದರೂ, ಲೆಬನಾನ್ ಗಡಿಯಲ್ಲಿ ಶಾಂತಿ ನೆಲೆಸಿಲ್ಲ.

ಲೆಬನಾನ್ ಸರ್ಕಾರದ ಅಂಕಿಅಂಶಗಳ ಪ್ರಕಾರ, ಇಸ್ರೇಲ್‌ನ ನಿರಂತರ ದಾಳಿಗಳಿಗೆ ಇದುವರೆಗೆ ಕನಿಷ್ಠ 1,530 ಜನರು ಬಲಿಯಾಗಿದ್ದಾರೆ ಮತ್ತು 4,812 ಕ್ಕೂ ಹೆಚ್ಚು ಮಂದಿ ತೀವ್ರವಾಗಿ ಗಾಯಗೊಂಡಿದ್ದಾರೆ. ಬೈರೂತ್‌ನಂತಹ ಜನವಸತಿ ಪ್ರದೇಶಗಳ ಮೇಲೆಯೂ ಬಾಂಬ್ ದಾಳಿ ನಡೆಯುತ್ತಿರುವುದರಿಂದ ಅಮಾಯಕರ ಸಾವಿನ ಸಂಖ್ಯೆ ದಿನೇ ದಿನೇ ಏರುತ್ತಿದೆ.

ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೇತೃತ್ವದಲ್ಲಿ ನಡೆದ ಈ ಸಂಧಾನವು ಈಗ ವಿಫಲವಾಗುವ ಹಾದಿಯಲ್ಲಿದೆ. ಇಸ್ರೇಲ್ ಪ್ರಧಾನಿ ನೆತನ್ಯಾಹು ಅವರು ಲೆಬನಾನ್ ಅನ್ನು ಕದನ ವಿರಾಮದ ಭಾಗ ಎಂದು ಒಪ್ಪಲು ಸಿದ್ಧರಿಲ್ಲ. ಆದರೆ ಇರಾನ್ ಪಾಲಿಗೆ ಲೆಬನಾನ್ ಮತ್ತು ಹಿಜ್ಬುಲ್ಲಾ ಅಸ್ತಿತ್ವದ ಪ್ರಶ್ನೆಯಾಗಿದೆ. ಈ ರಾಜತಾಂತ್ರಿಕ ಸಂಘರ್ಷವು ಅಂತಿಮವಾಗಿ ಇರಾನ್ ಅನ್ನು ನೇರವಾಗಿ ಯುದ್ಧಕ್ಕೆ ಇಳಿಯುವಂತೆ ಮಾಡಿದರೆ, ಅದರ ಪರಿಣಾಮ ಇಡೀ ವಿಶ್ವದ ಮೇಲೆ ಬೀರಲಿದೆ,(ಏಜೆನ್ಸೀಸ್).