ಇರಾನ್‌ನಿಂದ ಕದನ ವಿರಾಮದ ಪ್ರಸ್ತಾವನೆ? ಟ್ರಂಪ್ ಹಾಕಿದ ಆ ಒಂದು ಕಂಡೀಷನ್ ಏನು? Donald Trump

ಈ ಬಗ್ಗೆ ತಮ್ಮ ಟ್ರುತ್ ಸೋಷಿಯಲ್​ನಲ್ಲಿ ಪೋಸ್ಟ್​ ಮಾಡಿರುವ ಟ್ರಂಪ್, ಇರಾನ್‌ನ ಹೊಸ ಆಡಳಿತದ ಅಧ್ಯಕ್ಷರು ಹಿಂದಿನವರಿಗಿಂತ ಹೆಚ್ಚು ಬುದ್ಧಿವಂತರು ಮತ್ತು ಕಡಿಮೆ ತೀವ್ರಗಾಮಿಯಾಗಿದೆ. ಅವರು ಅಮೆರಿಕಕ್ಕೆ ಕದನ ವಿರಾಮಕ್ಕಾಗಿ ಮನವಿ ಮಾಡಿದ್ದಾರೆ.

ಕಠಿಣ ಷರತ್ತು: ಹಾರ್ಮುಜ್ ಜಲಸಂಧಿಯು ಸಂಪೂರ್ಣವಾಗಿ ಮುಕ್ತವಾಗಿ, ಹಡಗುಗಳ ಸಂಚಾರಕ್ಕೆ ಯಾವುದೇ ಅಡೆತಡೆಯಿಲ್ಲದಂತಾದಾಗ ಮಾತ್ರ ನಾವು ಕದನ ವಿರಾಮದ ಬಗ್ಗೆ ಯೋಚಿಸುತ್ತೇವೆ ಎಂದು ಟ್ರಂಪ್ ಸ್ಪಷ್ಟಪಡಿಸಿದ್ದಾರೆ.

ಟ್ರಂಪ್ ಅವರು ಇರಾನ್‌ನ ಯಾವ ನಾಯಕನನ್ನು ಉದ್ದೇಶಿಸಿ ಈ ಮಾತು ಹೇಳಿದ್ದಾರೆ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

ಮಹಮ್ಮದ್ ಬಾಘರ್ ಘಾಲಿಬಾಫ್: ಕಳೆದ ವಾರವಷ್ಟೇ ಟ್ರಂಪ್ ಅವರು ಇರಾನ್ ಸಂಸತ್ತಿನ ಸ್ಪೀಕರ್ ಘಾಲಿಬಾಫ್ ಅವರೊಂದಿಗೆ ಮಾತುಕತೆ ನಡೆಸುತ್ತಿರುವುದನ್ನು ದೃಢಪಡಿಸಿದ್ದರು. ಆದರೆ ಅವರು ಅಧ್ಯಕ್ಷರಲ್ಲ.

ಮಸೂದ್ ಪೆಜೆಶ್ಕಿಯನ್: ಇರಾನ್‌ನ ಅಧಿಕೃತ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯನ್ ಅವರು ಬುಧವಾರವಷ್ಟೇ ನಮಗೆ ಭದ್ರತೆಯ ಭರವಸೆ ನೀಡಿದರೆ ನಾವು ಕದನ ವಿರಾಮಕ್ಕೆ ಸಿದ್ಧ ಎಂದು ಹೇಳಿಕೆ ನೀಡಿದ್ದರು. ಇವರನ್ನೇ ಟ್ರಂಪ್ ಉದ್ದೇಶಿಸಿರಬಹುದು ಎಂಬ ವಿಶ್ಲೇಷಣೆ ನಡೆಯುತ್ತಿದೆ.

ಹಾರ್ಮುಜ್ ಜಲಸಂಧಿಯ ವಿಚಾರದಲ್ಲಿ ಟ್ರಂಪ್ ಅವರ ನಿಲುವು ಪದೇ ಪದೇ ಬದಲಾಗುತ್ತಿರುವುದು ಮಿತ್ರ ರಾಷ್ಟ್ರಗಳಲ್ಲಿ ಆತಂಕ ಮೂಡಿಸಿದೆ.

ಕಳೆದ ವಾರ: ಹಡಗುಗಳಿಗೆ ದಾರಿ ಬಿಡದಿದ್ದರೆ ಇರಾನ್‌ನ ಇಂಧನ ಕೇಂದ್ರಗಳನ್ನು ಬಾಂಬ್ ಹಾಕಿ ಉಡಾಯಿಸುವುದಾಗಿ ಬೆದರಿಕೆ ಹಾಕಿದ್ದರು.

ನಿನ್ನೆ: ಹಾರ್ಮುಜ್ ಸಮಸ್ಯೆ ಬಗೆಹರಿಯದಿದ್ದರೂ ನಾವು ಯುದ್ಧ ನಿಲ್ಲಿಸಲು ಸಿದ್ಧ. ಇದು ನಮಗಿಂತ ಇತರ ದೇಶಗಳಿಗೆ ಹೆಚ್ಚು ತೊಂದರೆ ನೀಡುತ್ತಿದೆ, ಹಾಗಾಗಿ ಅವರೇ ಇದನ್ನು ಬಗೆಹರಿಸಿಕೊಳ್ಳಲಿ ಎಂಬ ಜಾರಿಕೆಯ ಹೇಳಿಕೆ ನೀಡಿದ್ದರು.

ಇಂದು: ಮತ್ತೆ ಹಾರ್ಮುಜ್ ಮುಕ್ತವಾಗದಿದ್ದರೆ ಕದನ ವಿರಾಮವಿಲ್ಲ ಎಂಬ ಪಟ್ಟು ಹಿಡಿದಿದ್ದಾರೆ.

ಮಧ್ಯಪ್ರಾಚ್ಯದ ಸಂಘರ್ಷವು ಎರಡನೇ ತಿಂಗಳಿಗೆ ಕಾಲಿಟ್ಟಿದ್ದು, ತೈಲ ಮಾರುಕಟ್ಟೆಯಲ್ಲಿ ತಲ್ಲಣ ಮುಂದುವರಿದಿದೆ. ಟ್ರಂಪ್ ಅವರ ಈ ಕದನವಿರಾಮದ ಹೇಳಿಕೆಯು ಯುದ್ಧ ಕೊನೆಗೊಳ್ಳುವ ಆಸೆಯನ್ನು ಚಿಗುರಿಸಿದೆಯಾದರೂ, ಅವರು ವಿಧಿಸಿರುವ ಹಾರ್ಮುಜ್ ಮುಕ್ತ ಷರತ್ತಿಗೆ ಇರಾನ್ ಒಪ್ಪುತ್ತದೆಯೇ ಎಂಬುದು ಈಗಿರುವ ಮಿಲಿಯನ್ ಡಾಲರ್ ಪ್ರಶ್ನೆಯಾಗಿದೆ,(ಏಜೆನ್ಸೀಸ್).