- ಅಮೆರಿಕದ ಮುಂದೆ ಮಣಿದ ಇರಾನ್: "ನಾವು ಅಂದುಕೊಂಡಿದ್ದನ್ನು ಸಾಧಿಸಿದ್ದೇವೆ" ಎಂದ ಪೆಂಟಗನ್ ಮುಖ್ಯಸ್ಥ!
- ಆಪರೇಷನ್ ಎಪಿಕ್ ಫ್ಯೂರಿ ಸಕ್ಸಸ್: ಇರಾನ್ ವಾಯುಪಡೆ, ನೌಕಾಪಡೆ ಸಂಪೂರ್ಣ ಧ್ವಂಸ; ಯುದ್ಧ ಅಂತ್ಯಕ್ಕೆ ಅಮೆರಿಕ ಗ್ರೀನ್ ಸಿಗ್ನಲ್.
- ಟ್ರಂಪ್ ಆರ್ಭಟಕ್ಕೆ ತತ್ತರಿಸಿದ ಟೆಹ್ರಾನ್: ಕದನ ವಿರಾಮಕ್ಕೆ 'ಬೇಡಿಕೊಂಡ' ಇರಾನ್; ಅಮೆರಿಕದ ಐತಿಹಾಸಿಕ ವಿಜಯ!
ವಾಷಿಂಗ್ಟನ್: ಅಮೆರಿಕದ 'ಆಪರೇಷನ್ ಎಪಿಕ್ ಫ್ಯೂರಿ' (Operation Epic Fury) ದಾಳಿಗೆ ಬೆಚ್ಚಿಬಿದ್ದ ಇರಾನ್, ಕೊನೆಗೂ ಮೊಣಕಾಲೂರಿ ಕದನ ವಿರಾಮಕ್ಕಾಗಿ(Ceasefire) ಅಮೆರಿಕದ ಮುಂದೆ ಅಂಗಲಾಚಿದೆ ಎಂದು ಅಮೆರಿಕದ ರಕ್ಷಣಾ ಸಚಿವ ಪೀಟ್ ಹೆಗ್ಸೆತ್ (Pete Hegseth) ಬುಧವಾರ ಅಧಿಕೃತ ಹೇಳಿಕೆ ನೀಡಿದ್ದು, ಅಮೆರಿಕವು ಯುದ್ಧಭೂಮಿಯಲ್ಲಿ ಐತಿಹಾಸಿಕ ಮತ್ತು ಅಗಾಧ ವಿಜಯವನ್ನು ಸಾಧಿಸಿದೆ ಎಂದು ಘೋಷಿಸಿದ್ದಾರೆ.
ಇರಾನ್ ನೌಕಾಪಡೆ ಈಗ ಸಮುದ್ರದ ತಳದಲ್ಲಿದೆ!
ಪೆಂಟಗನ್ನಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಇರಾನ್ ಮೇಲೆ ನಡೆಸಿದ ದಾಳಿಯ ಭೀಕರತೆಯನ್ನು ಹೆಗ್ಸೆತ್ ವಿವರಿಸಿದರು. "ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ನೇತೃತ್ವದಲ್ಲಿ ನಾವು ಇರಾನ್ ಅನ್ನು ಸಂಪೂರ್ಣವಾಗಿ ಹಣ್ಣು ಮಾಡಿದ್ದೇವೆ. ಇರಾನ್ನ ನೌಕಾಪಡೆ ಈಗ ಸಮುದ್ರದ ತಳ ಸೇರಿದೆ. ಅವರ ವಾಯುಪಡೆ ಸಂಪೂರ್ಣವಾಗಿ ನಾಶವಾಗಿದೆ. ಇರಾನ್ ಬಳಿ ಈಗ ಯಾವುದೇ ಸಮಗ್ರ ವಾಯು ರಕ್ಷಣಾ ವ್ಯವಸ್ಥೆ (Air Defense System) ಬಾಕಿ ಉಳಿದಿಲ್ಲ" ಎಂದು ಅವರು ತಿಳಿಸಿದ್ದಾರೆ.
ಕ್ಷಿಪಣಿ ತಯಾರಿಸುವ ಶಕ್ತಿಯೂ ಇಲ್ಲ!
ಅಮೆರಿಕದ ದಾಳಿಯು ಇರಾನ್ನ ಬೆನ್ನೆಲುಬನ್ನೇ ಮುರಿದಿದೆ. "ನಾವು ಇರಾನ್ನ ರಕ್ಷಣಾ-ಕೈಗಾರಿಕಾ ನೆಲೆಯನ್ನು ಧ್ವಂಸಗೊಳಿಸಿದ್ದೇವೆ. ಇನ್ಮುಂದೆ ಇರಾನ್ ಯಾವುದೇ ಕ್ಷಿಪಣಿ ಅಥವಾ ಅತ್ಯಾಧುನಿಕ ಶಸ್ತ್ರಾಸ್ತ್ರಗಳನ್ನು ತಯಾರಿಸಲು ಸಾಧ್ಯವಿಲ್ಲ. ಅವರ ಕ್ಷಿಪಣಿ ಕಾರ್ಯಕ್ರಮವು ಸಂಪೂರ್ಣವಾಗಿ ನಾಶವಾಗಿದೆ" ಎಂದು ಹೆಗ್ಸೆತ್ ಮಾಹಿತಿ ನೀಡಿದ್ದಾರೆ. ಅಮೆರಿಕದ ಈ ಕಾರ್ಯಾಚರಣೆಯು ಇರಾನ್ನ ಸೇನಾ ಸಾಮರ್ಥ್ಯವನ್ನು ದಶಕಗಳಷ್ಟು ಹಿಂದಕ್ಕೆ ತಳ್ಳಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಹೊಸ ಆಡಳಿತಕ್ಕೆ ಅರಿವಾಗಿದೆ
ಇರಾನ್ನಲ್ಲಿ ಅಧಿಕಾರಕ್ಕೆ ಬಂದಿರುವ ಹೊಸ ಆಡಳಿತವು ಸಂಧಾನವೇ ಲೇಸು ಎಂಬ ನಿರ್ಧಾರಕ್ಕೆ ಬಂದಿದೆ. "ನಮ್ಮ ದಾಳಿಗೆ ಹಿರಿಯ ನಾಯಕರು ಬಲಿಯಾದ ಮೇಲೆ ಹೊಸ ಆಡಳಿತಕ್ಕೆ ಸದ್ಯದ ಪರಿಸ್ಥಿತಿ ಅರ್ಥವಾಗಿದೆ. ಮುಂದೆ ಕಾದಿರುವ ದುಸ್ಥಿತಿಗಿಂತ ಸಂಧಾನ ಮಾಡಿಕೊಳ್ಳುವುದೇ ಉತ್ತಮ ಎಂದು ಅವರು ಕದನ ವಿರಾಮಕ್ಕೆ ಒಪ್ಪಿಕೊಂಡಿದ್ದಾರೆ. ಈ ಒಪ್ಪಂದದ ಪ್ರಕಾರ ಇರಾನ್ ಇನ್ಮುಂದೆ ಎಂದಿಗೂ ಪರಮಾಣು ಶಸ್ತ್ರಾಸ್ತ್ರವನ್ನು ಹೊಂದಲು ಸಾಧ್ಯವಿಲ್ಲ" ಎಂದು ರಕ್ಷಣಾ ಸಚಿವರು ಸ್ಪಷ್ಟಪಡಿಸಿದ್ದಾರೆ.
ಟ್ರಂಪ್ ಅವರ 'ಬೆಸ್ಟ್ ಡೀಲ್'
ಯುದ್ಧದ ಅಬ್ಬರ ಸದ್ಯಕ್ಕೆ ತಣ್ಣಗಾಗಿದ್ದು, ಶಾಂತಿಯ ಮಾತುಕತೆಗಳಿಗೆ ಅವಕಾಶ ಸಿಕ್ಕಿದೆ. "ನಮ್ಮ ಕೆಲಸ ಮುಗಿದಿದೆ. ಈಗ ನಮಗೆ ನಿಜವಾದ ಶಾಂತಿ ಮತ್ತು ನ್ಯಾಯಯುತ ಒಪ್ಪಂದ ಮಾಡಿಕೊಳ್ಳಲು ಅವಕಾಶವಿದೆ. ಎಲ್ಲರಿಗೂ ತಿಳಿದಿರುವಂತೆ ಅಧ್ಯಕ್ಷ ಟ್ರಂಪ್ ಅವರಿಗಿಂತ ಉತ್ತಮವಾಗಿ ಯಾರೂ ಡೀಲ್ ಮಾಡಲಾರರು. ಇರಾನ್ ಒಪ್ಪಂದದ ಪ್ರತಿಯೊಂದು ಷರತ್ತನ್ನು ಪಾಲಿಸುತ್ತಿದೆಯೇ ಎಂಬುದರ ಮೇಲೆ ನಾವು ನಿರಂತರ ನಿಗಾ ಇಟ್ಟಿರುತ್ತೇವೆ" ಎಂದು ಅವರು ಎಚ್ಚರಿಕೆ ನೀಡಿದ್ದಾರೆ,(ಏಜೆನ್ಸೀಸ್).