ಯುರೋಪ್: ಅಮೆರಿಕದ ವಿದೇಶಾಂಗ ಮತ್ತು ಹವಾಮಾನ ನೀತಿಯ ವಿರುದ್ಧ ವಿಡಂಬನಾತ್ಮಕ ಪ್ರತಿಭಟನೆಯಾಗಿ ಸ್ಟ್ರಾಸ್‌ಬರ್ಗ್‌ನಲ್ಲಿರುವ ಯುರೋಪಿಯನ್ ಪಾರ್ಲಿಮೆಂಟ್ನಲ್ಲಿ 23 ಕ್ಯಾರೆಟ್ ಚಿನ್ನ ಲೇಪಿತ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪ್ರತಿಮೆಯನ್ನು ಅನಾವರಣಗೊಳಿಸಲಾಗಿದ್ದು, ಪ್ರತಿಮೆಗೆ 'ದಿ ಆರೆಂಜ್ ಪ್ಲೇಗ್' ಎಂದು ಕರೆಯಲಾಗಿದೆ.
ಡ್ಯಾನಿಶ್ ಕಲಾವಿದ ಜೆನ್ಸ್ ಗಾಲ್ಶಿಯೋಟ್ ಅವರು ಈ ಎಂಟು ಅಡಿ ಎತ್ತರದ ಪ್ರತಿಮೆಯನ್ನು ರಚಿಸಿದ್ದು, ಟ್ರಂಪ್ ಒಂದು ಕೈಯಲ್ಲಿ ಗಾಲ್ಫ್ ಕ್ಲಬ್ ಮತ್ತು ವಿಶ್ವ ಆಕಾರದ ಚೆಂಡನ್ನು ಮತ್ತು ಇನ್ನೊಂದು ಕೈಯಲ್ಲಿ ಮಾಪಕಗಳನ್ನು ಹಿಡಿದಿರುವುದನ್ನು ತೋರಿಸುತ್ತದೆ.
ಪ್ರತಿಮೆಯಲ್ಲಿ ಒಬ್ಬ ಚಿಕ್ಕ ವ್ಯಕ್ತಿಯ ಭುಜದ ಮೇಲೆ ಟ್ರಂಪ್ ಕುಳಿತಿದ್ದಾನೆ. ಅದಕ್ಕೆ ಅನ್ಯಾಯದ ರಾಜ ಎಂದು ಲೇಬಲ್ ಮಾಡಲಾಗಿದೆ. ಕೆಳಗೆ ವಿಡಂಬನಾತ್ಮಕವಾಗಿ ಪ್ರತಿಜ್ಞೆಯೊಂದಿದ್ದು, ಅದರಲ್ಲಿ ನಾನು ಒಬ್ಬ ವ್ಯಕ್ತಿಯ ಬೆನ್ನಿನ ಮೇಲೆ ಕುಳಿತಿದ್ದೇನೆ. ಅವನು ನನ್ನ ಹೊರೆಯ ಕೆಳಗೆ ಮುಳುಗುತ್ತಿದ್ದಾನೆ. ನಾನು ಅವನಿಗೆ ಸಹಾಯ ಮಾಡಲು ಏನು ಬೇಕಾದರೂ ಮಾಡುತ್ತೇನೆ. ಅವನ ಬೆನ್ನಿನಿಂದ ಕೆಳಗಿಳಿಯುವುದನ್ನು ಹೊರತುಪಡಿಸಿ ಎಂದು ಬರೆಯಲಾಗಿದೆ.
ರಾಜಕೀಯವಾಗಿ ಪ್ರಭಾವಿತ ಶಿಲ್ಪಕೃತಿಗಳಿಗೆ ಹೆಸರುವಾಸಿಯಾಗಿರುವ ಜೆನ್ಸ್ ಗಾಲ್ಶಿಯೋಟ್, ಟ್ರಂಪ್ ಅವರ ಪರಿಸರ ಮತ್ತು ವಿದೇಶಾಂಗ ನೀತಿಗಳಲ್ಲಿನ ಅಸ್ಥಿರತೆಯ ವಿರುದ್ಧ ತಮ್ಮ ಕೃತಿ ವ್ಯಂಗ್ಯಾತ್ಮಕ ಆಕ್ರೋಶದ ಅಭಿವ್ಯಕ್ತಿ ಎಂದು ಬಣ್ಣಿಸಿದ್ದಾರೆ. ಮತ್ತು ನಿಯಮ-ಆಧಾರಿತ ವಿಶ್ವ ವ್ಯವಸ್ಥೆ, ಪ್ರಜಾಸತ್ತಾತ್ಮಕ ಮೌಲ್ಯಗಳು ಮತ್ತು ಹವಾಮಾನ ಬಿಕ್ಕಟ್ಟನ್ನು ಪರಿಹರಿಸುವ ನಮ್ಮ ಸಾಮೂಹಿಕ ಪ್ರಯತ್ನಗಳಿಗೆ ಟ್ರಂಪ್ ಅತ್ಯಂತ ದೊಡ್ಡ ಬೆದರಿಕೆಗಳಲ್ಲಿ ಒಂದಾಗಿದ್ದಾರೆ ಎಂದಿದ್ದಾರೆ.
ಡ್ಯಾನಿಶ್ ಯುರೋಪಿಯನ್ ಸಂಸತ್ ಸದಸ್ಯ ಪರ್ ಕ್ಲೌಸೆನ್ ಅವರು, ಈ ಪ್ರತಿಮೆಯ ಅನಾವರಣವನ್ನು ಶ್ಲಾಘಿಸುತ್ತಾ, "ಯುರೋಪಿಯನ್ ಸಂಸತ್ತಿನಲ್ಲಿ ಈ ಶಿಲ್ಪವನ್ನು ಪ್ರದರ್ಶಿಸುವುದನ್ನು ಸಹಿಸಿಕೊಳ್ಳಲಾಗದಷ್ಟು ಅಸಹಿಷ್ಣುತೆ ಯಾರಲ್ಲಾದರೂ ಇದ್ದರೆ, ಅವರಿಗೆ ಜಾಗತಿಕ ವೇದಿಕೆಯಲ್ಲಿ ಯಾವುದೇ ಸ್ಥಾನವಿಲ್ಲ ಎಂದು ಹೇಳಿದ್ದಾರೆ.
ದಿ ಇಂಡಿಪೆಂಡೆಂಟ್ ಪ್ರಕಾರ, ಟ್ರಂಪ್ ಪ್ರತಿಮೆ ಗುರುವಾರದವರೆಗೆ ಸ್ಟ್ರಾಸ್‌ಬರ್ಗ್‌ನಲ್ಲಿರಲಿದೆ. ನವೆಂಬರ್‌ನಲ್ಲಿ ಟರ್ಕಿಯಲ್ಲಿ ನಡೆಯಲಿರುವ UN COP31 ಹವಾಮಾನ ಸಮ್ಮೇಳನದಲ್ಲಿ ಇದು ಮತ್ತೆ ಕಾಣಿಸಿಕೊಳ್ಳುವ ಸಾಧ್ಯತೆಯಿದೆ. ಅಲ್ಲಿ ಗಾಲ್ಶಿಯೋಟ್ ಪ್ರತಿನಿಧಿಗಳಿಗೆ 3D-ಮುದ್ರಿತ ಚಿಕಣಿ ಪ್ರತಿಕೃತಿಗಳನ್ನು ವಿತರಿಸಲು ಯೋಜಿಸಿದ್ದಾರೆ ಎನ್ನಲಾಗಿದೆ (ಏಜೆನ್ಸೀಸ್).