2,000 ಕಿ.ಮೀ ಗುರಿಯೂ ಈಗ ಸೇಫ್ ಅಲ್ಲ! ಇರಾನ್‌ನ ಈ ಮಿಸೈಲ್ ಈಗ ಇಸ್ರೇಲ್‌ ಪಾಲಿನ ಹೊಸ ಯಮಧೂತ! Khorramshahr-4

ಸುಮಾರು 1 ಟನ್ ತೂಕದ ವಾರ್‌ಹೆಡ್ ಹೊತ್ತೊಯ್ಯುವ ಸಾಮರ್ಥ್ಯವಿರುವ ಈ ಕ್ಷಿಪಣಿ, 2,000 ಕಿಲೋಮೀಟರ್ ದೂರದ ಗುರಿಯನ್ನು ಧ್ವಂಸಗೊಳಿಸಬಲ್ಲದು. ಈ ಬೆಳವಣಿಗೆಯಿಂದಾಗಿ ಇಡೀ ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಕಿಚ್ಚು ಹಬ್ಬಿದೆ.

ಗುರುವಾರ ಮುಂಜಾನೆ ಇರಾನ್ ನಡೆಸಿದ ಈ ಸರಣಿ ಕ್ಷಿಪಣಿ ದಾಳಿಯಿಂದಾಗಿ ಇಸ್ರೇಲ್‌ನ ಪ್ರಮುಖ ನಗರಗಳಾದ ಟೆಲ್ ಅವಿವ್ ಮತ್ತು ಜೆರುಸಲೇಂನಲ್ಲಿ ವಾಯುಪಡೆಯ ಎಚ್ಚರಿಕೆಯ ಸೈರನ್‌ಗಳು ಮೊಳಗಿವೆ. ಇತ್ತ ಇಸ್ರೇಲ್ ಕೂಡ ಸುಮ್ಮನೆ ಕುಳಿತಿಲ್ಲ, ಲೆಬನಾನ್‌ನಲ್ಲಿರುವ ಇರಾನ್ ಬೆಂಬಲಿತ ಹಿಜ್ಬುಲ್ಲಾ ಉಗ್ರಗಾಮಿ ಗುಂಪುಗಳ ನೆಲೆಗಳ ಮೇಲೆ ಬೀರತ್‌ನಲ್ಲಿ ಭೀಕರ ವೈಮಾನಿಕ ದಾಳಿ ನಡೆಸಿದೆ.

ಯುದ್ಧದ ತೀವ್ರತೆ ಎಷ್ಟಿದೆಯೆಂದರೆ, ಶನಿವಾರ ನಡೆದ ದಾಳಿಯಲ್ಲಿ ಹತ್ಯೆಯಾದ ಇರಾನ್‌ನ ಸುಪ್ರೀಂ ಲೀಡರ್ ಅಲಿ ಖಮೇನಿ ಅವರ ಶೋಕ ಸಭೆಯನ್ನು ಅನಿವಾರ್ಯವಾಗಿ ಮುಂದೂಡಲಾಗಿದೆ ಎಂದು ಇರಾನ್ ಸರ್ಕಾರಿ ದೂರದರ್ಶನ ತಿಳಿಸಿದೆ. 1989ರಲ್ಲಿ ರುಹೊಲ್ಲಾ ಖೊಮೇನಿ ಅವರ ಅಂತ್ಯಕ್ರಿಯೆಗೆ ಸೇರಿದ ಕೋಟ್ಯಂತರ ಜನರ ದಾಖಲೆಯನ್ನು ಈ ಬಾರಿ ಮೀರಿಸುವ ನಿರೀಕ್ಷೆಯಿತ್ತು, ಆದರೆ ಸತತ ಬಾಂಬ್ ದಾಳಿಗಳು ಜನಜೀವನವನ್ನು ಸ್ತಬ್ಧಗೊಳಿಸಿವೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಅಮೆರಿಕ ಪಡೆಗಳ ಕಾರ್ಯಾಚರಣೆಯನ್ನು ಶ್ಲಾಘಿಸಿದ್ದು, ಯುದ್ಧ ರಂಗದಲ್ಲಿ ನಮ್ಮ ಸೇನೆ ಅದ್ಭುತವಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ಹೇಳಿದ್ದಾರೆ. ಅತ್ತ ಅಮೆರಿಕದ ಸೆನೆಟ್ ಕೂಡ ಯುದ್ಧ ನಿಲ್ಲಿಸುವ ನಿರ್ಣಯವನ್ನು ತಿರಸ್ಕರಿಸುವ ಮೂಲಕ ಆಡಳಿತಕ್ಕೆ ಸಂಪೂರ್ಣ ಬೆಂಬಲ ನೀಡಿದೆ.

ಇರಾನ್‌ನ ರೆವಲ್ಯೂಷನರಿ ಗಾರ್ಡ್ಸ್, ಪ್ರದೇಶದ ಮಿಲಿಟರಿ ಮತ್ತು ಆರ್ಥಿಕ ಮೂಲಸೌಕರ್ಯಗಳನ್ನು ಸಂಪೂರ್ಣವಾಗಿ ನಾಶಪಡಿಸುವುದಾಗಿ ಎಚ್ಚರಿಕೆ ನೀಡಿದೆ.

ಬಹ್ರೇನ್ ಮತ್ತು ಕುವೈತ್: ಇರಾನ್ ಈ ದೇಶಗಳ ಮೇಲೂ ಕ್ಷಿಪಣಿ ದಾಳಿ ನಡೆಸಿದೆ.

ಟರ್ಕಿ: ಇರಾನ್‌ನಿಂದ ಉಡಾಯಿಸಲಾದ ಬ್ಯಾಲಿಸ್ಟಿಕ್ ಕ್ಷಿಪಣಿಯನ್ನು ಟರ್ಕಿಯ ಗಡಿಯೊಳಗೆ ಪ್ರವೇಶಿಸುವ ಮೊದಲೇ ನ್ಯಾಟೋ (NATO) ರಕ್ಷಣಾ ವ್ಯವಸ್ಥೆ ಹೊಡೆದು ಉರುಳಿಸಿದೆ.

ಕತಾರ್: ದೋಹಾದಲ್ಲಿರುವ ಅಮೆರಿಕದ ರಾಯಭಾರ ಕಚೇರಿಯ ಸಮೀಪವಿರುವ ನಿವಾಸಿಗಳನ್ನು ಮುನ್ನೆಚ್ಚರಿಕಾ ಕ್ರಮವಾಗಿ ಸ್ಥಳಾಂತರಿಸಲಾಗುತ್ತಿದೆ.

ದುಬೈ: ಗುರುವಾರ ಮುಂಜಾನೆ ದುಬೈ ಆಕಾಶದಲ್ಲಿ ಯುದ್ಧ ವಿಮಾನಗಳ ಭೀಕರ ಸದ್ದು ಕೇಳಿಬಂದಿದ್ದು, ಜನರಲ್ಲಿ ಆತಂಕ ಮನೆಮಾಡಿದೆ.

ಅಮೆರಿಕದ ಜಲಂತರ್ಗಾಮಿ ನೌಕೆಯು ಹಿಂದೂ ಮಹಾಸಾಗರದಲ್ಲಿ ಇರಾನ್‌ನ ಯುದ್ಧನೌಕೆಯನ್ನು ಟಾರ್ಪಿಡೋ ಬಳಸಿ ಮುಳುಗಿಸಿದ ಘಟನೆ ಅತ್ಯಂತ ಘೋರವಾಗಿದೆ. ಶ್ರೀಲಂಕಾ ನೌಕಾಪಡೆಯು ಇದುವರೆಗೆ ಸಮುದ್ರದಿಂದ 87 ನಾವಿಕರ ಶವಗಳನ್ನು ಹೊರತೆಗೆದಿದೆ. ಕೇವಲ 32 ಮಂದಿ ಮಾತ್ರ ಬದುಕುಳಿದಿದ್ದಾರೆ. ಇದು ಎರಡನೇ ಮಹಾಯುದ್ಧದ ನಂತರ ಅಮೆರಿಕ ನಡೆಸಿದ ಅತಿದೊಡ್ಡ ನೌಕಾ ದಾಳಿ ಎಂದು ಬಣ್ಣಿಸಲಾಗಿದೆ.

ಹಾರ್ಮುಜ್ ಜಲಸಂಧಿ ಮತ್ತು ಓಮನ್ ಕೊಲ್ಲಿಯ ಸಮೀಪ ಇರಾನ್ ಹಡಗುಗಳ ಮೇಲೆ ದಾಳಿ ನಡೆಸುತ್ತಿರುವುದರಿಂದ ಜಾಗತಿಕ ತೈಲ ಬೆಲೆಗಳು ಗಗನಕ್ಕೇರಿವೆ. ಕುವೈತ್ ಕರಾವಳಿಯಲ್ಲಿ ತೈಲ ಟ್ಯಾಂಕರ್ ಮೇಲೆ ಸ್ಫೋಟ ಸಂಭವಿಸಿದ್ದು, ಅಂತಾರಾಷ್ಟ್ರೀಯ ಹಡಗು ಸಂಚಾರಕ್ಕೆ ಭಾರಿ ಅಡಚಣೆಯಾಗಿದೆ. ವಿಶ್ವದ ಒಟ್ಟು ತೈಲ ರಫ್ತಿನ ಐದನೇ ಒಂದು ಭಾಗ ಹರಿಯುವ ಈ ಮಾರ್ಗ ಈಗ ಯುದ್ಧಭೂಮಿಯಾಗಿ ಮಾರ್ಪಟ್ಟಿದೆ.

ಈ ಯುದ್ಧದಲ್ಲಿ ಇದುವರೆಗೆ ಇರಾನ್‌ನಲ್ಲಿ 1,000ಕ್ಕೂ ಹೆಚ್ಚು ಜನರು, ಲೆಬನಾನ್‌ನಲ್ಲಿ 70 ಮತ್ತು ಇಸ್ರೇಲ್‌ನಲ್ಲಿ 12 ಮಂದಿ ಸಾವನ್ನಪ್ಪಿದ್ದಾರೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ. ಲಕ್ಷಾಂತರ ಪ್ರವಾಸಿಗರು ಮಧ್ಯಪ್ರಾಚ್ಯದಲ್ಲಿ ಸಿಲುಕಿಕೊಂಡಿದ್ದು, ವಿಮಾನ ನಿಲ್ದಾಣಗಳು ಅಕ್ಷರಶಃ ಸ್ಮಶಾನದಂತಾಗಿವೆ,(ಏಜೆನ್ಸೀಸ್).