ಸಂಪಾದಕೀಯ; ಅಮೆರಿಕ ಆತುರದ ಕ್ರಮ

ಫೆಬ್ರವರಿ 28ರಂದು ಇರಾನ್​ ವಿರುದ್ಧ ಅಮೆರಿಕ ಯುದ್ಧ ಆರಂಭಿಸಿತ್ತು ಮತ್ತು ಇದರಲ್ಲಿ ಅಮೆರಿಕಕ್ಕೆ ಅಲ್ಪಾವಧಿಯಲ್ಲೇ ಗೆಲುವು ದೊರೆಯಲಿದೆ ಎಂದು ಟ್ರಂಪ್​ ಭಾವಿಸಿದ್ದರು. ಆದರೆ, ಇರಾನ್​ ತೀವ್ರ ಪ್ರತಿಕ್ರಿಯೆ ನೀಡಿದ್ದರಿಂದ ವಿವಿಧ ರಾಷ್ಟ್ರಗಳಲ್ಲಿನ ಅಮೆರಿಕದ ಸೇನಾನೆಲೆಗಳು ಧ್ವಂಸಗೊಂಡವು. ಹೀಗಾಗಿ, ಹೇಗಾದರೂ ಮಾಡಿ ಯುದ್ಧ ನಿಲ್ಲಿಸಬೇಕು ಎಂದು ಬಯಸಿದ್ದ ಟ್ರಂಪ್​ ಕದನವಿರಾಮ ಒಪ್ಪಂದವಾಗುತ್ತಿದ್ದಂತೆ, "ಸಹಿ ಆಗಿದೆ" ಎಂದು ಭಾವೋದ್ವೇಗದಿಂದ ಹೇಳಿದ್ದರು. ಈಗ ಅದೇ ಟ್ರಂಪ್​, ಇರಾನ್​ ವಿರುದ್ಧದ ದಾಳಿಗಳನ್ನು ತೀವ್ರಗೊಳಿಸುವುದಾಗಿ ಹೇಳಿದ್ದಾರೆ.

ಅಮೆರಿಕ ಮತ್ತು ಇರಾನ್​ ನಡುವಿನ ಯುದ್ಧದಿಂದಾಗಿ ಮೂರು ತಿಂಗಳಿಗೂ ಹೆಚ್ಚು ಕಾಲ ಇಡೀ ಜಗತ್ತು ಆತಂಕದಲ್ಲೇ ದಿನದೂಡಿತ್ತು. ಈ ಅವಧಿಯಲ್ಲಿ ಯುದ್ಧದಿಂದಾಗಿ ಅಮೆರಿಕ 36 ಲಕ್ಷ ಕೋಟಿ ರೂ., ಇರಾನ್​ 25 ಲಕ್ಷ ಕೋಟಿ ರೂ., ಸೌದಿ ಅರೇಬಿಯಾ 4 ಲಕ್ಷ ಕೋಟಿ ರೂ., ಇರಾಕ್​ 1.8 ಲಕ್ಷ ಕೋಟಿ ರೂ., ಯುಎಇ 1.4 ಲಕ್ಷ ಕೋಟಿ ರೂ., ಕತಾರ್​ 1.3 ಲಕ್ಷ ಕೋಟಿ ರೂ., ಕುವೈತ್​ 1.3 ಲಕ್ಷ ಕೋಟಿ ರೂ., ಇಸ್ರೇಲ್​ 1.1 ಲಕ್ಷ ಕೋಟಿ ರೂ. ಆರ್ಥಿಕ ನಷ್ಟವನ್ನು ಅನುಭವಿಸಿವೆ. ಇಡೀ ಸಂಘರ್ಷದಲ್ಲಿ 7000ಕ್ಕೂ ಹೆಚ್ಚು ಜನರು ಪ್ರಾಣ ಕಳೆದುಕೊಂಡಿದ್ದಾರೆ. 40 ಸಾವಿರಕ್ಕೂ ಅಧಿಕ ಜನರು ಗಾಯಗೊಂಡಿದ್ದಾರೆ. ಅಲ್ಲದೆ, ಜೂನ್​ 8ರಿಂದ 11ರ ನಡುವೆ ಒಮನ್​ ಗಲ್ಫ್​ನಲ್ಲಿ ಭಾರತೀಯ ಸಿಬ್ಬಂದಿ ಇದ್ದ 3 ಹಡಗುಗಳ ಮೇಲೆ ಅಮೆರಿಕ ದಾಳಿ ನಡೆಸಿದ್ದು, ಈ ದಾಳಿಯಲ್ಲಿ ಮೂವರು ಭಾರತೀಯ ನಾವಿಕರು ದುರ್ಮರಣ ಹೊಂದಿದರು.

ಯುದ್ಧದ ಅತಿ ದೊಡ್ಡ ಹೊಡೆತವು, ಈಗಾಗಲೇ ಕಡಿಮೆ ಆದಾಯ ಹೊಂದಿರುವ ದೇಶಗಳು ಹಾಗೂ ಇಂತಹ ಆರ್ಥಿಕ ಆಘಾತಗಳನ್ನು ತಡೆದುಕೊಳ್ಳುವ ಶಕ್ತಿ ಇಲ್ಲದ ಜನಸಾಮಾನ್ಯರ ಮೇಲೆ ಬಿದ್ದಿದೆ. ಈ ವಾಸ್ತವಗಳೆಲ್ಲ ಕಣ್ಣೆದುರಿಗೆ ಇದ್ದರೂ, ಮತ್ತೆ ಯುದ್ಧೋನ್ಮಾದಕ್ಕೆ ಮುಂದಾಗಿರುವುದು ಸಮರ್ಥನೀಯವಲ್ಲ. ಅಷ್ಟಕ್ಕೂ, ಇತಿಹಾಸವು ಶಾಂತಿ ಮತ್ತು ಸಹಬಾಳ್ವೆಯನ್ನು ಸ್ಥಾಪಿಸಿದ ನಾಯಕರನ್ನು ಸ್ಮರಿಸಿಕೊಳ್ಳುತ್ತದೆಯೇ ಹೊರತು, ಯುದ್ಧೋನ್ಮಾದದ ನಾಯಕರನ್ನಲ್ಲ ಎಂಬ ಸತ್ಯವನ್ನು ಟ್ರಂಪ್​ ಸೇರಿದಂತೆ ಜಾಗತಿಕ ನಾಯಕರು ಅರ್ಥ ಮಾಡಿಕೊಳ್ಳಬೇಕಿದೆ.