ಚೀನಾ: ಅಪಘಾತದಲ್ಲಿ ಕಳೆದುಹೋದ ಕಿವಿಯನ್ನು ರಕ್ಷಿಸಲು ವೈದ್ಯರು ಆಕೆಯನ್ನು ಕಾಲಿನ ಪಾದಕ್ಕೆ ಜೋಡಿಸಿ ಜೀವಂತವಾಗಿರಿಸಿ, ನಂತರ ಯಶಸ್ವಿಯಾಗಿ ತಲೆಗೆ ಮರುಜೋಡಣೆ ಮಾಡಿದ ಅಪರೂಪದ ಘಟನೆ ಚೀನಾದಲ್ಲಿ ವರದಿಯಾಗಿದೆ.
ವರದಿಗಳ ಪ್ರಕಾರ, ಏಪ್ರಿಲ್ನಲ್ಲಿ ಈ ಘಟನೆ ನಡೆದಿದ್ದು, ಸನ್ ಎಂಬ ಉಪನಾಮದಿಂದ ಮಾತ್ರ ಗುರುತಿಸಲ್ಪಟ್ಟ ಮಹಿಳೆಯೊಬ್ಬರು ಕೆಲಸದ ಸ್ಥಳದಲ್ಲಿ ಭಾರೀ ಯಂತ್ರೋಪಕರಣಗಳನ್ನು ಒಳಗೊಂಡ ಭೀಕರ ಅಪಘಾತಕ್ಕೆ ಒಳಗಾದರು. ಯಂತ್ರೋಪಕರಣಗಳು ಆಕೆಯ ಕಿವಿಯನ್ನು ಸಂಪೂರ್ಣವಾಗಿ ಕತ್ತರಿಸಿದ್ದಲ್ಲದೆ, ಆಕೆಯ ನೆತ್ತಿ, ಕುತ್ತಿಗೆ ಮತ್ತು ಮುಖದಿಂದ ಚರ್ಮದ ದೊಡ್ಡ ಭಾಗಗಳನ್ನು ಹರಿದು ಹಾಕಿದವು, ಇದರಿಂದಾಗಿ ಆಕೆಗೆ ಮಾರಣಾಂತಿಕ ಗಾಯಗಳಾಗಿವೆ.
ಮಹಿಳೆ ಭೀಕರ ಅಪಘಾತದಲ್ಲಿ ತನ್ನ ಕಿವಿಯನ್ನು ಸಂಪೂರ್ಣವಾಗಿ ಕಳೆದುಕೊಂಡಿದ್ದರು. ಕಿವಿಯ ಭಾಗವು ತೀವ್ರವಾಗಿ ಜಜ್ಜಲ್ಪಟ್ಟಿತ್ತು ಮತ್ತು ಅದನ್ನು ನೇರವಾಗಿ ತಲೆಗೆ ಜೋಡಿಸಲು ಬೇಕಾದ ರಕ್ತನಾಳಗಳು ಆ ಭಾಗದಲ್ಲಿ ಸಕ್ರಿಯವಾಗಿರಲಿಲ್ಲ. ತಕ್ಷಣವೇ ಮರುಜೋಡಣೆ ಮಾಡುವುದು ಅಸಾಧ್ಯ ಎಂದು ತಿಳಿದ ವೈದ್ಯರು ವಿಭಿನ್ನ ಹಾದಿಯನ್ನು ಆಯ್ದುಕೊಂಡರು.
ಪಾದದಲ್ಲಿ ಕಿವಿ ಬೆಳೆಸಿದ ವೈದ್ಯರು!
ಚೀನಾದ ವೈದ್ಯಕೀಯ ತಂಡವು ಕಿವಿಯ ಮೃದ್ವಸ್ಥಿಯನ್ನು (Cartilage) ರಕ್ಷಿಸಲು ನಿರ್ಧರಿಸಿತು. ಅದನ್ನು ಮಹಿಳೆಯ ಕಾಲಿನ ಪಾದದ (Foot) ಚರ್ಮದ ಅಡಿಯಲ್ಲಿ ನಾಟಿ(ಜೋಡಣೆ) ಮಾಡಲಾಯಿತು. ಪಾದದ ರಕ್ತನಾಳಗಳ ಮೂಲಕ ಕಿವಿಗೆ ಅಗತ್ಯವಾದ ಪೋಷಣೆ ಮತ್ತು ರಕ್ತ ಸಂಚಾರ ಸಿಗುವಂತೆ ಮಾಡಲಾಯಿತು. ಈ ಮೂಲಕ ಕಿವಿಯನ್ನು ಕೊಳೆಯದಂತೆ ಅಥವಾ ಸಾಯದಂತೆ ತಿಂಗಳುಗಳ ಕಾಲ ಜೀವಂತವಾಗಿರಿಸಲಾಯಿತು.
ಮರುಜೋಡಣೆ ಮತ್ತು ಯಶಸ್ಸು
ಸುಮಾರು ಮೂರು ತಿಂಗಳ ನಂತರ, ಮಹಿಳೆಯ ತಲೆಯ ಭಾಗದ ಗಾಯಗಳು ಗುಣಮುಖವಾದಾಗ ಮತ್ತು ಅಲ್ಲಿ ರಕ್ತ ಸಂಚಾರ ಸುಧಾರಿಸಿದಾಗ, ಪಾದದಲ್ಲಿದ್ದ ಕಿವಿಯನ್ನು ಶಸ್ತ್ರಚಿಕಿತ್ಸೆಯ ಮೂಲಕ ತೆಗೆಯಲಾಯಿತು. ನಂತರ ಮೈಕ್ರೋ ಸರ್ಜರಿಯ ಮೂಲಕ ಅದನ್ನು ಮತ್ತೆ ಆಕೆಯ ತಲೆಗೆ ಜೋಡಿಸಲಾಯಿತು.
ವೈದ್ಯಕೀಯ ಸಾಧನೆ
ಈ ವಿಶಿಷ್ಟ ಚಿಕಿತ್ಸಾ ಕ್ರಮವು ಅಂಗಾಂಗ ಕಸಿ ಮತ್ತು ಪುನರ್ನಿರ್ಮಾಣ ಶಸ್ತ್ರಚಿಕಿತ್ಸೆಯಲ್ಲಿ (Reconstructive Surgery) ಹೊಸ ಮೈಲಿಗಲ್ಲು ಎನ್ನಲಾಗಿದೆ. ಪ್ರಸ್ತುತ ಮಹಿಳೆ ಚೇತರಿಸಿಕೊಳ್ಳುತ್ತಿದ್ದು, ಆಕೆಯ ಕಿವಿ ಮೊದಲಿನಂತೆಯೇ ಕಾರ್ಯನಿರ್ವಹಿಸುತ್ತಿದೆ ಎಂದು ವೈದ್ಯರು ತಿಳಿಸಿದ್ದಾರೆ. ಕಳೆದುಹೋದ ಅಂಗಾಂಗಗಳನ್ನು ಹೇಗೆ ವಿಭಿನ್ನವಾಗಿ ಸಂರಕ್ಷಿಸಬಹುದು ಎಂಬುದಕ್ಕೆ ಇದು ಅತ್ಯುತ್ತಮ ಉದಾಹರಣೆಯಾಗಿದೆ,(ಏಜೆನ್ಸೀಸ್).