ಪಟ್ಟಾಯ (ಥೈಲ್ಯಾಂಡ್): ವಿಶ್ವಪ್ರಸಿದ್ಧ ಆನ್ಲೈನ್ ಫ್ಯಾಷನ್ ಬ್ರ್ಯಾಂಡ್ 'ASOS' ನ ಸಹ-ಸ್ಥಾಪಕ ಕ್ವೆಂಟಿನ್ ಗ್ರಿಫಿತ್ಸ್ ಅವರು ಥೈಲ್ಯಾಂಡ್ನ ಪಟ್ಟಾಯದಲ್ಲಿರುವ ತಮ್ಮ ಐಷಾರಾಮಿ ಕಾಂಡೋಮಿನಿಯಂನ 17ನೇ ಮಹಡಿಯಿಂದ ಬಿದ್ದು ಸಾವನ್ನಪ್ಪಿದ್ದಾರೆ. ಈ ಸಾವು ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ.
ಪೊಲೀಸರು ಮತ್ತು ಪ್ಯಾರಾಮೆಡಿಕ್ಸ್ ತಂಡವು ಪಟ್ಟಾಯದ ಅಪಾರ್ಟ್ಮೆಂಟ್ ಕೆಳಗೆ ಗ್ರಿಫಿತ್ಸ್ ಅವರ ಶವವನ್ನು ಪತ್ತೆ ಮಾಡಿದೆ. ಪ್ರಾಥಮಿಕ ತನಿಖೆಯಲ್ಲಿ ಅವರ ಮನೆಯೊಳಗೆ ಯಾವುದೇ ಬಲಾತ್ಕಾರದ ಪ್ರವೇಶ ಅಥವಾ ಗಲಾಟೆಯ ಕುರುಹುಗಳು ಕಂಡುಬಂದಿಲ್ಲ. ಆದಾಗ್ಯೂ, ಮರಣೋತ್ತರ ಪರೀಕ್ಷೆಯ ವರದಿ ಬರುವವರೆಗೆ ಪೊಲೀಸರು 'ಹತ್ಯೆ'ಯ ಸಾಧ್ಯತೆಯನ್ನು ತಳ್ಳಿಹಾಕಿಲ್ಲ.
ಗ್ರಿಫಿತ್ಸ್ ಅವರ ಸಾವು ನಿಗೂಢ ಎನಿಸಲು ಅವರ ವೈಯಕ್ತಿಕ ಜೀವನದ ವಿವಾದಗಳೇ ಕಾರಣ ಎಂದು ಹೇಳಲಾಗುತ್ತಿದೆ
ಹಣಕಾಸಿನ ವಿವಾದ: ಗ್ರಿಫಿತ್ಸ್ ಮತ್ತು ಅವರ ಥಾಯ್ ಮೂಲದ ಮಾಜಿ ಪತ್ನಿ ನಡುವೆ ದೀರ್ಘಕಾಲದ ಕಾನೂನು ಸಮರ ನಡೆಯುತ್ತಿತ್ತು. ಜಂಟಿ ಕಂಪನಿಯಿಂದ ಸುಮಾರು 6.1 ಕೋಟಿ ರೂಪಾಯಿ (£500,000) ಹಣವನ್ನು ಪತ್ನಿ ಕದ್ದಿದ್ದಾರೆ ಎಂಬ ಆರೋಪವಿತ್ತು.
ದಾಖಲೆಗಳ ನಕಲು ಆರೋಪ: ತನ್ನ ಗಮನಕ್ಕೆ ತರದೆ ವ್ಯವಹಾರದ ಷೇರುಗಳು ಮತ್ತು ಭೂಮಿಯನ್ನು ಮಾರಾಟ ಮಾಡಲು ಗ್ರಿಫಿತ್ಸ್ ದಾಖಲೆಗಳನ್ನು ನಕಲು ಮಾಡಿದ್ದಾರೆ ಎಂದು ಆಕೆಯೂ ಪ್ರತಿಯಾಗಿ ಆರೋಪಿಸಿದ್ದರು. ಈ ಸಂಬಂಧ ತನಿಖೆ ನಡೆಯುತ್ತಿರುವಾಗಲೇ ಅವರು ಸಾವನ್ನಪ್ಪಿದ್ದಾರೆ.
ಇವರು 2000ನೇ ಇಸವಿಯಲ್ಲಿ ಲಂಡನ್ ಮೂಲದ ASOS ಕಂಪನಿಯನ್ನು ನಿಕ್ ರಾಬರ್ಟ್ಸನ್ ಮತ್ತು ಆಂಡ್ರ್ಯೂ ರೇಗನ್ ಅವರೊಂದಿಗೆ ಸೇರಿ ಸ್ಥಾಪಿಸಿದರು.
ಈ ಕಂಪನಿಯು ಅಲ್ಪಾವಧಿಯಲ್ಲೇ ಬಿಲಿಯನ್ ಡಾಲರ್ ಉದ್ಯಮವಾಗಿ ಬೆಳೆಯಿತು. ಅಮೆರಿಕದ ಮಾಜಿ ಪ್ರಥಮ ಮಹಿಳೆ ಮಿಚೆಲ್ ಒಬಾಮಾ ಮತ್ತು ಬ್ರಿಟನ್ನ ರಾಜಕುಮಾರಿ ಕೇಟ್ ಮಿಡ್ಲ್ಟನ್ ಅವರಂತಹ ಗಣ್ಯರು ಈ ಬ್ರ್ಯಾಂಡ್ನ ಗ್ರಾಹಕರಾಗಿದ್ದಾರೆ.
2007ರಲ್ಲಿ ಥೈಲ್ಯಾಂಡ್ಗೆ ಸ್ಥಳಾಂತರಗೊಂಡಿದ್ದ ಇವರಿಗೆ ಮೂವರು ಮಕ್ಕಳಿದ್ದಾರೆ.
ಬ್ರಿಟಿಷ್ ವಿದೇಶಾಂಗ ಇಲಾಖೆಯು ಮೃತರ ಕುಟುಂಬಕ್ಕೆ ಬೆಂಬಲ ನೀಡುತ್ತಿದ್ದು, ಸ್ಥಳೀಯ ಥಾಯ್ ಪೊಲೀಸರೊಂದಿಗೆ ಸಂಪರ್ಕದಲ್ಲಿದೆ. ಮರಣೋತ್ತರ ಪರೀಕ್ಷೆಯ ವರದಿ ಬರಲು ಕೆಲವು ತಿಂಗಳುಗಳು ಬೇಕಾಗಬಹುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ,(ಏಜೆನ್ಸೀಸ್).