- ಶೇಖ್ ಹಸೀನಾ ವಿರುದ್ಧದ ತೀರ್ಪು ನ.17ರಂದು ಹೊರಬೀಳಲಿದೆ
- ಬಾಂಗ್ಲಾದಲ್ಲಿ ಭಾನುವಾರ ತಡರಾತ್ರಿ ಸ್ಫೋಟಗಳು ಸಂಭವಿಸಿವೆ
ಬಾಂಗ್ಲಾದೇಶ: ಬಾಂಗ್ಲಾದೇಶದ ಪದಚ್ಯುತ ಪ್ರಧಾನಿ ಶೇಖ್ ಹಸೀನಾ(Sheikh Hasina) ವಿರುದ್ಧ ಅಂತರರಾಷ್ಟ್ರೀಯ ಅಪರಾಧ ನ್ಯಾಯಮಂಡಳಿ (ITC) ತೀರ್ಪು ಹೊರಬೀಳುವ ಮುನ್ನ ಇದೀಗ ಬಾಂಗ್ಲಾದಲ್ಲಿ ಭಾನುವಾರ ತಡರಾತ್ರಿ ಸ್ಫೋಟಗಳು ಸಂಭವಿಸಿವೆ.
ತೀರ್ಪು ಹೊರಬೀಳುವ ಮುನ್ನ ದೇಶದಲ್ಲಿ ಅಶಾಂತಿ ಮತ್ತು ಹೆಚ್ಚುತ್ತಿರುವ ಉದ್ವಿಗ್ನತೆಯನ್ನು ನಿಯಂತ್ರಿಸಲು ಅಧಿಕಾರಿಗಳು ಹರಸಾಹಸ ಪಡುತ್ತಿದ್ದಾರೆ. ಕಳೆದ ವರ್ಷ ವಿದ್ಯಾರ್ಥಿ ನೇತೃತ್ವದ ದಂಗೆಯ ಮೇಲೆ ಮಿಲಿಟರಿ ದಮನಕ್ಕೆ ಸಂಬಂಧಿಸಿದಂತೆ ತಪ್ಪಿತಸ್ಥರೆಂದು ಸಾಬೀತಾದರೆ, ಶೇಖ್ ಹಸೀನಾ ಅವರಿಗೆ ಮರಣದಂಡನೆ ವಿಧಿಸುವ ಸಾಧ್ಯತೆಯಿದೆ ಎಂದು ವರದಿ ಉಲ್ಲೇಖಿಸಿದೆ.
ಕಳೆದ ವರ್ಷದಲ್ಲಿ ಜುಲೈ ತಿಂಗಳಲ್ಲಿ ನಡೆದ ದಂಗೆಗೆ ಸಂಬಂಧಿಸಿದ ಮಾನವೀಯತೆಯ ವಿರುದ್ಧದ ಅಪರಾಧಗಳ ಆರೋಪಗಳ ಕುರಿತು ನ್ಯಾಯಮಂಡಳಿ ತನ್ನ ತೀರ್ಪು ಇಂದೇ(ನ.17) ನೀಡಲಿದೆ. ಭಾರತದಲ್ಲಿಯೇ ಉಳಿದಿರುವ ಹಸೀನಾಗೆ ಮರಣದಂಡನೆ ವಿಧಿಸಬೇಕೆಂದು ಪ್ರಾಸಿಕ್ಯೂಟರ್ಗಳು ಕೋರಿದ್ದಾರೆ. ಅವರು ಮತ್ತು ಅವರ ಸಹ-ಆರೋಪಿ, ಮಾಜಿ ಗೃಹ ಸಚಿವ ಅಸದುಜ್ಜಮಾನ್ ಖಾನ್ ಕಮಲ್ ಅವರನ್ನು ಗೈರುಹಾಜರಿಯಲ್ಲಿ ವಿಚಾರಣೆ ನಡೆಸಲಾಯಿತು.
ಢಾಕಾದಲ್ಲಿ ಸ್ಫೋಟಗಳು
ಕಳೆದ ಮೂರು ದಿನಗಳಿಂದ ಢಾಕಾ ಮತ್ತು ಇತರ ನಗರಗಳಲ್ಲಿ ಕಚ್ಚಾ ಬಾಂಬ್ ಸ್ಫೋಟಗಳು ವರದಿಯಾಗಿವೆ. ಭಾನುವಾರ ತಡರಾತ್ರಿ, ಮಧ್ಯಂತರ ಸರ್ಕಾರಿ ಸಲಹೆಗಾರರಾದ ಸೈದಾ ರಿಜ್ವಾನಾ ಹಸನ್ ಅವರ ನಿವಾಸದ ಹೊರಗೆ ರಾತ್ರಿ 9 ಗಂಟೆ ಸುಮಾರಿಗೆ ಎರಡು ಕಚ್ಚಾ ಬಾಂಬ್ಗಳು ಸ್ಫೋಟಗೊಂಡವು. ಕಾರ್ವಾನ್ ಬಜಾರ್ ಪ್ರದೇಶದಲ್ಲಿ ಮತ್ತೊಂದು ಸ್ಫೋಟ ಸಂಭವಿಸಿದೆ. ಯಾವುದೇ ಸಾವುನೋವುಗಳು ವರದಿಯಾಗಿಲ್ಲ.ಇದು ರಾಜಕೀಯ ಹಿಂಸಾಚಾರದ ಇತಿಹಾಸ ಹೊಂದಿರುವ ದೇಶದಲ್ಲಿ ರಾಜಕೀಯ ಅವ್ಯವಸ್ಥೆ ಮುಂದುವರಿಯಬಹುದು ಎಂಬುದರ ಸೂಚನೆಯಾಗಿದೆ.
ಭಯಪಡಲು ಏನೂ ಇಲ್ಲ. ನಾನು ಜೀವಂತವಾಗಿದ್ದೇನೆ
"ಭಯಪಡಲು ಏನೂ ಇಲ್ಲ. ನಾನು ಜೀವಂತವಾಗಿದ್ದೇನೆ. ನಾನು ಬದುಕುತ್ತೇನೆ. ದೇಶದ ಜನರನ್ನು ಬೆಂಬಲಿಸುತ್ತೇನೆ" ಎಂದು ಅವಾಮಿ ಲೀಗ್ನ ಫೇಸ್ಬುಕ್ ಪುಟಕ್ಕೆ ರಾತ್ರೋರಾತ್ರಿ ಅಪ್ಲೋಡ್ ಮಾಡಲಾದ ಭಾವನಾತ್ಮಕ ಆಡಿಯೋ ಭಾಷಣದಲ್ಲಿ ಶೇಖ್ ಹಸೀನಾ ಮಾತನಾಡಿದರು.
ಸರ್ಕಾರದ ನಿಷೇಧದ ಹೊರತಾಗಿಯೂ ಬೀದಿ ಪ್ರತಿಭಟನೆಗಳನ್ನು ಮುಂದುವರಿಸುವಂತೆ ಪಕ್ಷದ ಬೆಂಬಲಿಗರನ್ನು ಒತ್ತಾಯಿಸಿದರು. ಅಲ್ಲದೆ, ಹಿಂದಿನ ಪ್ರತಿಭಟನೆಗಳಿಗೆ ಬೆಂಬಲಿಗರನ್ನು ಶ್ಲಾಘಿಸಿದರು ಮತ್ತು ಮಧ್ಯಂತರ ಸರ್ಕಾರವನ್ನು ಎದುರಿಸಲು ಅವರನ್ನು ಒತ್ತಾಯಿಸಿದರು. ಮುಹಮ್ಮದ್ ಯೂನಸ್ ನೇತೃತ್ವದ ಮಧ್ಯಂತರ ಸರ್ಕಾರವು ತನ್ನನ್ನು ತೆಗೆದುಹಾಕುವ ಮತ್ತು ಪಕ್ಷದ ಕಾರ್ಯಕರ್ತರನ್ನು ಕಿರುಕುಳ ಮಾಡುತ್ತಿದೆ ಎಂದು ಹಸೀನಾ ಆರೋಪಿಸಿದರು (ಏಜೆನ್ಸೀಸ್).