ಮೋದಿ-ಪುಟಿನ್ ಭೇಟಿ: 400 ಕೋಟಿ ರೂ. ಮೌಲ್ಯದ ದುಬಾರಿ ಅರಮನೆ; ಹೈದರಾಬಾದ್‌ಗೂ ಇದಕ್ಕೂ ಏನು ಸಂಬಂಧ?

ಸ್ವತಃ ಪಾಲಂ ವಾಯುಪಡೆ ನಿಲ್ದಾಣದಲ್ಲಿ ಪುಟಿನ್ ಅವರಿಗೆ ಭವ್ಯ ಸ್ವಾಗತ ಕೋರಿದ ಪ್ರಧಾನಿ ಮೋದಿ, ಬಹಳ ಆತ್ಮೀಯತೆಯಿಂದ ಮಾತುಕತೆ ನಡೆಸಿದರು. ನಾಲ್ಕು ವರ್ಷಗಳ ಬಳಿಕ ಪುಟಿನ್ ಭಾರತಕ್ಕೆ ಬಂದಿಳಿದಿದ್ದು, ರಷ್ಯಾ-ಯುಕ್ರೇನ್ ಯುದ್ಧ ಶುರುವಾದ ನಂತರ ಭಾರತಕ್ಕೆ ಬಂದಿರುವುದು ಇದೇ ಮೊದಲು. 23ನೇ ವಾರ್ಷಿಕ ಭಾರತ-ರಷ್ಯಾ ಶೃಂಗಸಭೆಯ ಭಾಗವಾಗಿ ಅವರು ಮೋದಿ ಅವರನ್ನು ಭೇಟಿಯಾಗಿದ್ದಾರೆ.

ವ್ಲಾಡಿಮಿರ್ ಪುಟಿನ್ ಭಾರತ ಪ್ರವಾಸ ಸಮಯದಲ್ಲಿ ಅವರನ್ನು ಆತಿಥ್ಯ ವಹಿಸಲು ಕೇಂದ್ರ ಸರ್ಕಾರವು ವಿಶೇಷ ವ್ಯವಸ್ಥೆಗಳನ್ನು ಮಾಡಿಕೊಂಡಿರುವುದು ಗಮನಾರ್ಹ. ಪುಟಿನ್ ಹೈದರಾಬಾದ್‌ನ ಕೊನೆಯ ನಿಜಾಮ್, ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿ ಎಂದು ಕರೆಯಲ್ಪಡುವ ಮೀರ್ ಉಸ್ಮಾನ್ ಅಲಿ ಖಾನ್ ಅವರಿಗೆ ಸೇರಿದ ಹೈದರಾಬಾದ್ ಹೌಸ್‌ನಲ್ಲಿ ತಂಗಲಿದ್ದಾರೆ ಎಂಬ ಸುದ್ದಿ ಹಲವರ ಕುತೂಹಲ ಕೆರಳಿಸಿದೆ.

ಅಶೋಕ್ ರಸ್ತೆಯಲ್ಲಿರುವ ಈ ಐತಿಹಾಸಿಕ ಕಟ್ಟಡವನ್ನು ಪ್ರಸ್ತುತ ಪ್ರಧಾನಿಯವರ ರಾಜ್ಯ ಅತಿಥಿ ಗೃಹವಾಗಿ ಬಳಸಲಾಗುತ್ತದೆ. ಪುಟಿನ್ ಸೇರಿ ವಿಶ್ವ ನಾಯಕರನ್ನು ಆತಿಥ್ಯ ವಹಿಸುವ ಮೂಲಕ ಹೈದರಾಬಾದ್ ಹೌಸ್ ಭಾರತದ ಹೆಮ್ಮೆಯ ಪ್ರತೀಕವಾಗಿದೆ. ಐಕಾನಿಕ್ ಹೈದರಾಬಾದ್ ಹೌಸ್, ಇಂಡಿಯಾ ಗೇಟ್ ಬಳಿಯ ಒಂದು ಹೆಗ್ಗುರುತು ಕಟ್ಟಡವಾಗಿದೆ. ದೆಹಲಿಯಲ್ಲಿ ರಾಜತಾಂತ್ರಿಕ ಭೋಜನ ಕೂಟಗಳಿಗೆ ಭೇಟಿ ನೀಡುವ ರಾಷ್ಟ್ರ ಮತ್ತು ಸರ್ಕಾರದ ಮುಖ್ಯಸ್ಥರಿಗೆ ಸ್ಥಳಾವಕಾಶ ಕಲ್ಪಿಸಲು ಸರ್ಕಾರ ಇದನ್ನು ಬಳಕೆ ಮಾಡಿಕೊಳ್ಳುತ್ತಿದೆ.

ಹೈದರಾಬಾದ್‌ನ 7ನೇ ನಿಜಾಮ ಮೀರ್ ಉಸ್ಮಾನ್ ಅಲಿ ಖಾನ್ 8.2 ಎಕರೆ ಭೂಮಿಯನ್ನು ಖರೀದಿಸಿ 1926ರಲ್ಲಿ ಹೈದರಾಬಾದ್ ಹೌಸ್ ನಿರ್ಮಾಣವನ್ನು ಪ್ರಾರಂಭಿಸಿದರು. ಬ್ರಿಟಿಷರು ಸಭೆಗೆ ಕರೆದಾಗಲೆಲ್ಲಾ ಅವರು ಎಲ್ಲೋ ತಂಗಬೇಕಿತ್ತು. ಈ ಪ್ರದೇಶದ ಇತರ ರಾಜ ನಿವಾಸಗಳಲ್ಲಿ ಬಿಕಾನೆರ್ ಹೌಸ್, ಬರೋಡಾ ಹೌಸ್ ಮತ್ತು ಪಟಿಯಾಲ ಹೌಸ್ ಕೂಡ ಸೇರಿವೆ. ಬ್ರಿಟಿಷ್ ಆಳ್ವಿಕೆಯಲ್ಲಿ ನಿಜಾಮನ ಅಪಾರ ಸಂಪತ್ತು ಮತ್ತು ಉನ್ನತ ಸ್ಥಾನಮಾನದ ಸಂಕೇತವಾಗಿ ನಿರ್ಮಿಸಲಾದ ಈ ಭವ್ಯವಾದ ರಚನೆಯು ಈಗ ಭಾರತದ ವಿದೇಶಿ ಸಂಬಂಧಗಳ ಪ್ರಮುಖ ಕೇಂದ್ರವಾಗಿದೆ.

ಬ್ರಿಟಿಷ್ ಆಡಳಿತಗಾರರು ತಮ್ಮ ರಾಜಧಾನಿಯನ್ನು ದೆಹಲಿಗೆ ಬದಲಿಸಿಕೊಂಡಾಗ, ಕಡೆಯ ನಿಜಾಮ ಮೀರ್ ಉಸ್ಮಾನ್ ಅಲಿ ಖಾನ್ ತನ್ನ ವೈಭವಕ್ಕೆ ಅರ್ಹವಾದ ಸ್ಥಳವನ್ನು ಬಯಸಿದ್ದರು. ವೈಸ್‌ರಾಯ್ ಹೌಸ್‌ಗೆ ಸಮೀಪವಿರುವ ಸ್ಥಳ ಲಭ್ಯವಿಲ್ಲದಿದ್ದರೂ, ಕಿಂಗ್ಸ್ ವೇ (ಇಂದಿನ ರಾಜ್‌ಪಥ್) ಕೊನೆಯಲ್ಲಿರುವ ಪ್ರಿನ್ಸೆಸ್ ಪಾರ್ಕ್‌ನಲ್ಲಿ ಹೈದರಾಬಾದ್, ಬರೋಡಾ, ಪಟಿಯಾಲ, ಜೈಪುರ ಮತ್ತು ಬಿಕಾನೆರ್‌ನ ಐದು ಪ್ರಮುಖ ರಾಜಪ್ರಭುತ್ವದ ರಾಜ್ಯಗಳಿಗೆ ಭೂಮಿಯನ್ನು ಹಂಚಲಾಯಿತು. ಆದಾಗ್ಯೂ, ನಿಜಾಮನ ಕೋರಿಕೆಯ ಮೇರೆಗೆ, ಪ್ರಸಿದ್ಧ ವಾಸ್ತುಶಿಲ್ಪಿ ಎಡ್ವಿನ್ ಲುಟ್ಯೆನ್ಸ್ ಹೈದರಾಬಾದ್ ಹೌಸ್ ಪ್ಯಾಲೇಸ್ ಅನ್ನು ವೈಸ್ರಾಯ್ ಹೌಸ್​ಗಿಂತ ಯಾವುದೇ ರೀತಿಯಲ್ಲೂ ಕಡಿಮೆಯಿಲ್ಲದಂತೆ ಡಿಸೈನ್​ ಮಾಡಲಾಗಿದೆ.

ಈ ಕಟ್ಟಡವನ್ನು ನಿರ್ಮಿಸಲು ಸುಮಾರು 50 ಲಕ್ಷ ರೂ. ವೆಚ್ಚವಾಗಿದೆ ಎಂದು ವರದಿಯಾಗಿದೆ. ಇದು ಸ್ವಾತಂತ್ರ್ಯಕ್ಕೂ ಮೊದಲು ಎಂಬುದು ಇಲ್ಲಿ ಗಮನಾರ್ಹ. ಆದಾಗ್ಯೂ, 1926ರಲ್ಲಿ ಖರ್ಚು ಮಾಡಿದ 50 ಲಕ್ಷ ರೂ. ನಿಖರವಾದ ಮೌಲ್ಯವನ್ನು ಲೆಕ್ಕಾಚಾರ ಮಾಡುವುದು ಕಷ್ಟ. ಕಾರಣ, ಆ ಅವಧಿಯಿಂದ ಸ್ಥಿರವಾದ ಹಣದುಬ್ಬರ ದತ್ತಾಂಶ ಲಭ್ಯವಿಲ್ಲ. ಕಳೆದ ಶತಮಾನದಲ್ಲಿ ಸುಮಾರು ಶೇ.7ರಷ್ಟು ಊಹಿಸಲಾದ ಸರಾಸರಿ ಹಣದುಬ್ಬರ ದರವನ್ನು ಬಳಸಿಕೊಂಡು, ವೆಚ್ಚವು ಇಂದು 378 ಕೋಟಿ ರೂ.ಗೆ ಸಮನಾಗಿರುತ್ತದೆ ಎಂದು ಅಂದಾಜಿಸಬಹುದು.