ಫ್ರಾನ್ಸ್: ಕೆಲ ದಿನಗಳ ಹಿಂದೆ, ದುಬೈ ನಿಂದ ಟೆಲ್ ಅವೀವ್ಗೆ ಪ್ರಯಾಣ ಬೆಳೆಸಿದ್ದ ವಿಮಾನದಲ್ಲಿ ಸಹ-ಪೈಲಟ್ವೊಬ್ಬ, ಕ್ಯಾಪ್ಟನ್ ಮೇಲೆ ಹಲ್ಲೆ ನಡೆಸಿ, ವಿಮಾನವನ್ನು ಹೈಜಾಕ್ ಮಾಡಲು ಯತ್ನಿಸಿದ ವಿಫಲ ಪ್ರಯತ್ನ ವಿಶ್ವದಾದ್ಯಂತ ಭಾರೀ ಚರ್ಚೆಗೆ ಕಾರಣವಾಗಿತ್ತು. ಫ್ಲೈದುಬೈ ವಿಮಾನದ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಮೇಲೆ ಓಮನ್ ಮೂಲದ ಹಮಾಮ್ ಅಲ್- ಹಮ್ಮಾಮಿ ಎಂಬಾತ ದಾಳಿ ನಡೆಸಿದ್ದು, ಮಚ್ಚಾರ್ ಅವರ ಅಪ್ರತಿಮ ಸಾಹಸದ ಫಲವಾಗಿ ಯಾವುದೇ ದುರ್ಘಟನೆ ನಡೆದಿರಲಿಲ್ಲ.
ಈ ಘಟನೆ ನಡೆದ ಬೆನ್ನಲ್ಲೆ, ಏರ್ ಫ್ರಾನ್ಸ್ ಇಸ್ರೇಲ್ಗೆ ಹಾರಾಟ ನಡೆಸುವ ವಿಮಾನಗಳಲ್ಲಿ ಹೊಸ ನಿಯಮಾವಳಿಗಳನ್ನು ಜಾರಿಗೆ ತಂದಿದ್ದು, ಮುಂದಿನ ದಿನಗಳಲ್ಲಿ ಇಸ್ರೇಲ್ಗೆ ಪ್ರಯಾಣ ಬೆಳೆಸುವ ವಿಮಾನಗಳಲ್ಲಿ ದ್ವಿಪೌರತ್ವ ಹೊಂದಿರುವ, ಇಸ್ರೇಲ್ ಜತೆ ಉತ್ತಮ ಸಂಬಂಧ ಹೊಂದಿರದ ಹಾಗೂ ಪಾಕಿಸ್ತಾನ ಮೂಲದ ವ್ಯಕ್ತಿಗಳನ್ನು ಕ್ಯಾಬಿನ್ ಕ್ರೂವ್ಗಳಾಗಿ ಹಾಗೂ ಪೈಲಟ್ಗಳಾಗಿ ನೇಮಕ ಮಾಡಿಕೊಳ್ಳುವುದಿಲ್ಲ ಎಂದು ತಿಳಿಸಿದೆ. ಈ ಹೊಸ ನಿಯಮಾವಳಿಯಿಂದ ಸುಮಾರು 31 ದೇಶಗಳ ಮೇಲೆ ಪರಿಣಾಮ ಬೀರಲಿದೆ ಎನ್ನಲಾಗುತ್ತಿದೆ.
ಏರ್ ಫ್ರಾನ್ಸ್ ಜಾರಿಗೆ ತರಲು ಮುಂದಾಗಿರುವ ಈ ಹೊಸ ನೀತಿ ನಿರೂಪಣೆಯನ್ನು ಇಸ್ಲಾಂ ಅನ್ನು ಪಾಲಿಸುವ ದೇಶಗಳು ವಿರೋಧ ವ್ಯಕ್ತಪಡಿಸುತ್ತಿವೆ. ಏರ್ ಫ್ರಾನ್ಸ್ ಜಾರಿಗೆ ತರಲು ಮುಂದಾಗಿರುವ ಈ ನಿಯಮಗಳು ಮುಸಲ್ಮಾನರನ್ನು ಗುರಿಯಾಗಿಸಿಕೊಂಡಿದೆ ಎಂದು ಆರೋಪಿಸಲಾಗುತ್ತಿದೆ. ಇದೊಂದು ಇಸ್ಲಾಮೋಫೋಬಿಕ್ ನಿರ್ಧಾರವಾಗಿದ್ದು, ಈ ನಿಯಮಾವಳಿಯನ್ನು ಜಾರಿಗೆ ಬರದಂತೆ ತಡೆಯಬೇಕೆಂದು ಅರಬ್ ದೇಶಗಳಿಂದ ಒತ್ತಡ ಕೇಳಿ ಬರುತ್ತಿದೆ.
ಏರ್ ಫ್ರಾನ್ಸ್ ಜಾರಿಗೆ ತರಲು ಹೊರಟಿರುವ ಈ ನಿರ್ಧಾರಗಳಿಂದ ಮುಸ್ಲಿಮರನ್ನು ಬಹುಸಂಖ್ಯಾತರನ್ನಾಗಿ ಹೊಂದಿರುವ ದೇಶಗಳಿಗೆ ಹೆಚ್ಚಿನ ಹೊಡೆತ ಬೀಳಲಿದೆ. ವರದಿಗಳ ಪ್ರಕಾರ, ಅಲ್ಜೀರಿಯಾ, ಟುನೀಶಿಯಾ, ಇರಾನ್, ಓಮನ್, ಸೌದಿ ಅರೇಬಿಯಾ, ಪಾಕಿಸ್ತಾನ ಮತ್ತು ನೈಜರ್ ದೇಶದ ವಿಮಾನಯಾನ ಸಿಬ್ಬಂದಿಗಳನ್ನು ಏರ್ ಫ್ರಾನ್ಸ್ ನಿರ್ಭಂದಿಸಿದೆ. ಇತ್ತೀಚೆಗೆ ಫ್ಲೈದುಬೈ ವಿಮಾನದಲ್ಲಿ ನಡೆದ ಘಟನೆ ಕಾರಣದಿಂದಲೇ ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ ಎಂದು ಏರ್ ಫ್ರಾನ್ಸ್ ತಿಳಿಸಿದೆ.
ಸೆಪ್ಟೆಂಬರ್ 30 ರಂದು ದುಬೈನಿಂದ ಇಸ್ರೇಲ್ನ ಟೆಲ್ ಅವೀವ್ಗೆ ಹಾರಾಟ ನಡೆಸಿದ್ದ ವಿಮಾನದ ಕ್ಯಾಪ್ಟನ್ ಆಗಿ ಸ್ಮಿತ್ ಮಚ್ಚಾರ್ ಕಾರ್ಯ ನಿರ್ವಹಿಸುತ್ತಿದ್ದರು. ಓಮನ್ ಮೂಲದ ಸಹ-ಪೈಲಟ್ ಹಮಾಮ್ ಅಲ್-ಹಮ್ಮಾಮಿ ಎಂಬಾತ, ಒಮ್ಮೆಲೆ ಕ್ಯಾಪ್ಟನ್ ಮೇಲೆ ದಾಳಿ ನಡೆಸಿದ ಪರಿಣಾಮ ವಿಮಾನ ಸುಮಾರು 14,000 ಅಡಿ ಕುಸಿತ ಕಂಡಿತು.
ಹಮ್ಮಾಮಿ, ಸ್ಮಿತ್ ಮೇಲೆ ಕೊಡಲಿ ಮೂಲಕ ದಾಳಿ ನಡೆಸಿ, ವಿಮಾನವನ್ನು ತನ್ನ ವಶಕ್ಕೆ ತೆಗೆದುಕೊಂಡು, 9/11 ಮಾದರಿಯಲ್ಲಿ ವಿಮಾನ ಪತನ ಮಾಡುವ ಯೋಜನೆ ಹೊಂದಿದ್ದನು. ಆದರೆ, ಸ್ಮಿತ್ ಮಚ್ಚಾರ್, ಕಷ್ಟಪಟ್ಟು ಕಾಕ್ಪಿಟ್ ದ್ವಾರವನ್ನು ತೆರೆಯುವಲ್ಲಿ ಯಶಸ್ವಿಯಾಗು, ಪ್ರಯಾಣಿಕರು ಸಹಾಯಕ್ಕೆ ಬಂದ ಕಾರಣ ಭಾರೀ ದುರ್ಘಟನೆಯೊಂದು ನಡೆಯುವುದು ತಪ್ಪಿತು.
ನಂತರ, ವಿಮಾನದಲ್ಲಿದ್ದ, ಸಹಾಯಕ ಪೈಲಟ್ಗಳು ವಿಮಾನವನ್ನು ಸೌದಿ ಅರೇಬಿಯಾದಲ್ಲಿ ತುರ್ತು ಭೂಸ್ಪರ್ಶ ಮಾಡಿದ್ದರು. ಈ ಘಟನೆ ಬಳಿಕ ತೀವ್ರ ಧಾರ್ಮಿಕ ಭಾವನೆ ಬೆಳೆಸಿಕೊಂಡವರನ್ನು ವಿಮಾನ ಚಾಲನೆಯಂತಹ ಕೆಲಸಕ್ಕೆ ಸೇರಿಸಿಕೊಳ್ಳಬೇಕೆ? ಅಥವಾ ನಿರ್ಭಂದಿಸಬೇಕೆ? ಎಂಬ ಚರ್ಚೆಗಳು ಜಾಗತಿಕ ಮಟ್ಟದಲ್ಲಿ ಬಹಳ ಜೋರಾಗಿ ನಡೆಯುತ್ತಿದ್ದವು. ಆದರೆ ಈಗ ಏರ್ ಫ್ರಾನ್ಸ್ ತೆಗೆದುಕೊಂಡಿರುವ ಈ ನಿರ್ಧಾರ ವಿಮಾನಯಾನದ ಜಗತ್ತಿನಲ್ಲಿ ಕೋಲಾಹಲವನ್ನಂತು ಸೃಷ್ಟಿಸುವುದು ನಿಜವಾಗಿದೆ, (ಏಜೆನ್ಸೀಸ್).