33 ಕೋಟಿಯ ಮಿಸೈಲ್ ವರ್ಸಸ್ 15 ಲಕ್ಷದ ಡ್ರೋನ್! ರೇಡಾರ್ ಕಣ್ಣಿಗೂ ಬೀಳದ ಇರಾನ್‌ನ ಈ ಅಗ್ಗದ ಡ್ರೋನ್ ರಹಸ್ಯವೇನು..? Shahed Drone

ತನ್ನ ವಿಚಿತ್ರವಾದ ಸದ್ದಿನಿಂದಾಗಿ 'ಆಕಾಶದ ಲಾನ್‌ಮೋವರ್ ಎಂದೇ ಕರೆಯಲ್ಪಡುವ ಶಾಹೆದ್-136 ಒಂದು 'ಕಾಮಿಕಾಜೆ' ಅಥವಾ ಆತ್ಮಹತ್ಯಾ ಡ್ರೋನ್ ಆಗಿದೆ.

ವಿನ್ಯಾಸ: 3.5 ಮೀಟರ್ ಉದ್ದವಿರುವ ಈ ಡ್ರೋನ್ ಕೇವಲ 200 ಕೆಜಿ ತೂಕ ಹೊಂದಿದೆ.

ತಂತ್ರಜ್ಞಾನ: ಇದರಲ್ಲಿ ಬಳಸಲಾಗಿರುವುದು ಸಾಮಾನ್ಯ ನಾಗರಿಕ ಮಾರುಕಟ್ಟೆಯಲ್ಲಿ ಸಿಗುವ ಇಲೆಕ್ಟ್ರಾನಿಕ್ಸ್ ಮತ್ತು ಜರ್ಮನ್ ಇಂಜಿನ್‌ನ ರಿವರ್ಸ್-ಇಂಜಿನಿಯರಿಂಗ್ ಆವೃತ್ತಿಯಾಗಿದೆ.

ವೆಚ್ಚ: ಇದರ ಒಂದು ಯುನಿಟ್ ಬೆಲೆ ಕೇವಲ $20,000 ರಿಂದ $50,000 (ಅಂದಾಜು 15 ರಿಂದ 40 ಲಕ್ಷ ರೂಪಾಯಿ).

ಅಮೆರಿಕ ಮತ್ತು ಅದರ ಮಿತ್ರರಾಷ್ಟ್ರಗಳು ಒಂದು ಶಾಹೆದ್ ಡ್ರೋನ್ ಅನ್ನು ಹೊಡೆದುರುಳಿಸಲು $4 ಮಿಲಿಯನ್ ಬೆಲೆಯ 'ಪೇಟ್ರಿಯಾಟ್' ಕ್ಷಿಪಣಿಗಳನ್ನು ಬಳಸುತ್ತಿವೆ. ಕೆಲವು ಕಡೆಗಳಲ್ಲಿ $12 ಮಿಲಿಯನ್ ಬೆಲೆಯ ತದ್​ ಇಂಟರ್ಸೆಪ್ಟರ್‌ಗಳನ್ನು ಬಳಸಲಾಗುತ್ತಿದೆ.

ಇರಾನ್ ತಿಂಗಳಿಗೆ ಸುಮಾರು 10,000 ಡ್ರೋನ್‌ಗಳನ್ನು ತಯಾರಿಸುವ ಸಾಮರ್ಥ್ಯ ಹೊಂದಿದೆ. ಅತ್ತ ಅಮೆರಿಕದ ಕ್ಷಿಪಣಿಗಳ ಸಂಗ್ರಹವು ಯುಕ್ರೇನ್ ಮತ್ತು ಕೆಂಪು ಸಮುದ್ರದ ಯುದ್ಧಗಳಿಂದಾಗಿ ಈಗಾಗಲೇ ತಳ ಮುಟ್ಟಿದೆ. ಜೂನ್ 2025 ರ ಕೇವಲ 12 ದಿನಗಳ ಯುದ್ಧದಲ್ಲಿ ಇಸ್ರೇಲ್ ಮತ್ತು ಅಮೆರಿಕ ತಮ್ಮ ಬಳಿಯಿದ್ದ ತದ್​ ಕ್ಷಿಪಣಿಗಳ ನಾಲ್ಕನೇ ಒಂದು ಭಾಗವನ್ನು ಖಾಲಿ ಮಾಡಿವೆ.

ಈ ಡ್ರೋನ್‌ಗಳ ಮೂಲಕ ಇರಾನ್ ಈಗಾಗಲೇ ಹಾರ್ಮುಜ್ ಜಲಸಂಧಿಯನ್ನು ನಿಯಂತ್ರಣಕ್ಕೆ ತೆಗೆದುಕೊಂಡಿದೆ. ಕೇವಲ ಆರು ಹಡಗುಗಳ ಮೇಲೆ ದಾಳಿ ನಡೆಸುವ ಮೂಲಕ ಇಡೀ ಜಾಗತಿಕ ಹಡಗು ಸಂಚಾರ ಸ್ಥಗಿತಗೊಳ್ಳುವಂತೆ ಮಾಡಿದೆ. ಇದರಿಂದಾಗಿ ಬ್ರೆಂಟ್ ಕಚ್ಚಾ ತೈಲ ಬೆಲೆ ಶೇ.12 ರಷ್ಟು ಮತ್ತು ಯುರೋಪಿಯನ್ ನೈಸರ್ಗಿಕ ಅನಿಲ ಬೆಲೆ ಶೇ.50 ರಷ್ಟು ಒಂದೇ ವಾರದಲ್ಲಿ ಏರಿಕೆಯಾಗಿದೆ.

ಯುಕ್ರೇನ್‌ನಲ್ಲಿ ರಷ್ಯಾದ ಶಾಹೆದ್ ದಾಳಿಗಳನ್ನು ತಡೆಯಲು ಅಗ್ಗದ ರಕ್ಷಣಾ ವ್ಯವಸ್ಥೆಗಳಿವೆ. ಆದರೆ ದುಬೈ, ಸೌದಿ ಅರೇಬಿಯಾ ಮತ್ತು ಯುಎಇ ರಾಷ್ಟ್ರಗಳು ಇನ್ನೂ ದುಬಾರಿ ರಕ್ಷಣಾ ವ್ಯವಸ್ಥೆಗಳನ್ನೇ ಅವಲಂಬಿಸಿವೆ. ಪರಿಣಾಮವಾಗಿ ಇರಾನ್ ಡ್ರೋನ್‌ಗಳು ಅಮೆಜಾನ್ ಡೇಟಾ ಸೆಂಟರ್‌ಗಳು, ದುಬೈ ಏರ್‌ಪೋರ್ಟ್ ಮತ್ತು ರಸ್ ತನುರಾ ತೈಲ ಸಂಸ್ಕರಣಾಗಾರಗಳ ಮೇಲೆ ಯಶಸ್ವಿ ದಾಳಿ ನಡೆಸಿವೆ.

ಈ ಬಿಕ್ಕಟ್ಟನ್ನು ಎದುರಿಸಲು ಅಮೆರಿಕವು ಶಾಹೆದ್ ಡ್ರೋನ್‌ನಂತೆಯೇ ಇರುವ 'ಲೂಕಸ್​' ಎಂಬ ಅಗ್ಗದ ಡ್ರೋನ್‌ಗಳನ್ನು ಅಭಿವೃದ್ಧಿಪಡಿಸಿ ಇರಾನ್ ಮೇಲೆ ಉಡಾಯಿಸುತ್ತಿದೆ. ಇದನ್ನು ಆಪರೇಷನ್ ಎಪಿಕ್ ಫ್ಯೂರಿ' ಎಂದು ಕರೆಯಲಾಗಿದೆ. ಆದರೂ, ಸೆನೆಟರ್ ಮಾರ್ಕ್ ಕೆಲ್ಲಿ ಸೇರಿದಂತೆ ಹಲವು ನಾಯಕರು ಇದು ಕೇವಲ ಗಣಿತದ ಬಿಕ್ಕಟ್ಟಲ್ಲ, ಇದು ಅಮೆರಿಕದ ರಕ್ಷಣಾ ಸಾಮರ್ಥ್ಯದ ಪರೀಕ್ಷೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ,(ಏಜೆನ್ಸೀಸ್).