KitKat theft Europe: ಯೂರೋಪ್ನಲ್ಲಿ ಬಹುದೊಡ್ಡ ಪ್ರಮಾಣದಲ್ಲಿ ಕಳ್ಳತನವಾದ ಸುದ್ದಿ ವೈರಲ್ ಆಗಿದ್ದು, ಟ್ರೋಲ್ ಮತ್ತು ಮೀಮ್ಸ್ಗಳಿಗೆ ಕಾರಣವಾಗಿದೆ. ಇಡೀ ರಾಷ್ಟ್ರವೂ ಅಘಾತಕ್ಕೊಳಗಾಗಿದೆ ಏಕೆಂದರೆ, ಖದೀಮರು ಕದ್ದಿದ್ದು ಚಿನ್ನ ಅಥವಾ ವಜ್ರ, ವೈಢೂರ್ಯವಲ್ಲ ಅದರ ಬದಲಾಗಿ ಬರೋಬ್ಬರಿ 4.13 ಲಕ್ಷಕ್ಕೂ ಹೆಚ್ಚು ಕಿಟ್ಕ್ಯಾಟ್ ಚಾಕೊಲೇಟ್ಗಳನ್ನು.
ಸ್ವಿಟ್ಜರ್ಲೆಂಡ್ ಮೂಲದ ಪ್ರಖ್ಯಾತ ಆಹಾರ ಸಂಸ್ಥೆ 'ನೆಸ್ಲೆ'(Nestlé) ಸಂಸ್ಥೆಯು ಕಿಟ್ಕ್ಯಾಟ್ ಬಾರ್ಗಳನ್ನು ಇಟಲಿಯ ಉತ್ಪದನಾ ಕೇಂದ್ರದಿಂದ ಪೋಲೆಂಡ್ಗೆ ಸಾಗುತ್ತಿದ್ದ ಟ್ರಕ್ ಒಂದನ್ನು ಖದೀಮರು ದೋಚಿದ್ದಾರೆ. ಸದ್ಯ ಈ ಸುದ್ದಿಯೂ ಹಾಸ್ಯಮಯ ಮೀಮ್ಸ್ಗೆ ಕಾರಣವಾಗಿದೆ.
ಟ್ರಕ್ನಲ್ಲಿ ಸುಮಾರು 12 ಟನ್ ತೂಕದ ಕಿಟ್ಕ್ಯಾಟ್ ಚಾಕೊಲೇಟ್ಗಳಿದ್ದವು. ಇಷ್ಟು ದೊಡ್ಡ ಪ್ರಮಾಣದ ಚಾಕೊಲೇಟ್ ಒಮ್ಮೆಲೆ ನಾಪತ್ತೆಯಾಗಿರುವುದು ಕಂಪನಿಗೆ ದೊಡ್ಡ ತಲೆನೋವು ಉಂಟು ಮಾಡಿದೆ. ಈಸ್ಟರ್ ಹಬ್ಬದ ಸಂದರ್ಭದಲ್ಲೇ ನಡೆದಿರುವ ಈ ಘಟನೆಯಿಂದಾಗಿ ಚಾಕೋಲೇಟ್ ಮಾರಾಟದಲ್ಲಿ ವ್ಯತ್ಯಯ ಉಂಟಾಗಬಹುದು ಎಂದು ಸಂಸ್ಥೆ ಪೇಚಿಗೆ ಸಿಲುಕಿದೆ.
ಕಂಪನಿ ಹೇಳಿದ್ದು ಹೀಗೆ
ನಾವು ಯಾವಾಗಲೂ ಒಂದು ವಿರಾಮ ತೆಗೆದುಕೊಳ್ಳಿ ಎಂದು ನಮ್ಮ ಚಾಕೋಲೇಟ್ ಪ್ರಮೋಷನ್ಗಳಲ್ಲಿ ಹೇಳುತ್ತೇವೆ ಮತ್ತು ಕೊಂಡುಕೊಳ್ಳಲು ಪ್ರೋತ್ಸಾಹಿಸುತ್ತೇವೆ. ಆದರೆ, ಈ ಕಿಡಿಗೇಡಿಗಳು ನಮ್ಮ ಸಂದೇಶವನ್ನು ಆಳವಾಗಿ ಸ್ವೀಕರಿಸಿ ಪಾಲಿಸಿದಂತಿದೆ. ಅವರು ಬ್ರೇಕ್ ತೆಗೆದುಕೊಳ್ಳುವ ಬದಲು ನಮ್ಮ 12 ಟನ್ ಚಾಕೋಲೇಟ್ನೊಂದಿಗೆ ಬ್ರೇಕ್ ಹಾಕಿ ಪರಾರಿಯಾಗಿದ್ದಾರೆ ಎಂದು ಹಾಸ್ಯಮಯವಾಗಿ ಕಿಟ್ಕ್ಯಾಟ್ ವಕ್ತಾರರು ಮಾತನಾಡಿದ್ದಾರೆ.
ಕಳ್ಳತನ ಪತ್ತೆ ಹಚ್ಚೋದ್ ಹೇಗೆ?
ಕಳ್ಳತನವಾದ ಚಾಕೊಲೇಟ್ಗಳು ಅನಧಿಕೃತವಾಗಿ ಮಾರುಕಟ್ಟೆಗೆ ಬರುವ ಸಾಧ್ಯತೆ ಇದೆ. ಚಾಕೊಲೇಟ್ ಪ್ಯಾಕ್ ಮೇಲೆ ಇರುವ 'ಬ್ಯಾಚ್ ಕೋಡ್' ಅನ್ನು ಸ್ಕ್ಯಾನ್ ಮಾಡುವ ಮೂಲಕ ಅದು ಕಳುವಾದ ಗುಂಪಿಗೆ ಸೇರಿದೆ ಎನ್ನುವುದನ್ನು ಗ್ರಾಹಕರು ಪತ್ತೆ ಹಚ್ಚಬಹುದು ಎಂದು ಎಂದು ನೆಸ್ಲೆ ಕಂಪನಿ ತಿಳಿಸಿದೆ.
4.13 ಲಕ್ಷಕ್ಕೂ ಹೆಚ್ಚು ಕಿಟ್ ಕ್ಯಾಟ್ ಕಾಣೆಯಾಗುತ್ತಲೇ ಸೋಶಿಯಲ್ ಮೀಡಿಯಾದಲ್ಲಿ ಮೀಮ್ಸ್ಗಳು ಹರಿದಾಡುತ್ತಿದೆ. ಈಗ ಕಳ್ಳರು ಪ್ರಪಂಚದ ಅತಿ ಉದ್ದದ ಬ್ರೇಕ್ ತಗೋತಾರೆ ಎಂದು ಒಬ್ಬರು ಪೋಸ್ಟ್ ಮಾಡಿದ್ದರೆ ಮತ್ತೊಬ್ಬರು "ಇಷ್ಟು ಚಾಕೊಲೇಟ್ ತಿಂದ ಮೇಲೆ ಅವರಿಗೆ ಹಲ್ಲು ನೋವು ಬರಲ್ವಾ?" ಎಂದು ಕಾಮೆಂಟ್ ಮಾಡಿದ್ದಾರೆ.
ಮತ್ತೊಬ್ಬರು ಚಾಕೋಲೇಟ್ ಕದ್ದ ಕಳ್ಳರು ನಾಲ್ಕೈದು ಕಿಟ್ಕ್ಯಾಟ್ ಜೊತೆಗಿಟ್ಟುಕೊಂಡು ತಿನ್ನುತ್ತಿರಬಹುದಾ ಎಂದು ಹಾಸ್ಯಮಾಡಿದ್ದಾರೆ. ಮತ್ತೊಬ್ಬರು ಖದೀಮ ಕಿಟ್ಕ್ಯಾಟ್ನ್ನೇ ಹಾಸಿಗೆ ಮಾಡಿಕೊಂಡಿರಬಹುದು ಎಂದು ಕಾಮೆಂಟ್ ಮಾಡಿದ್ದಾರೆ, (ಏಜೆನ್ಸೀಸ್).