ನವದೆಹಲಿ: ಸದ್ಯ ಜಗತ್ತನ್ನು ಕಾಡುತ್ತಿರುವ ಕರೊನಾ ವೈರಸ್ ಸೋಂಕು ಹರಡುತ್ತಿರುವ ರೀತಿ ಗಮನಿಸಿದರೆ ಕರೊನಾ ಲಾಕ್ಡೌನ್ ಅನ್ನು ಸೆಪ್ಟೆಂಬರ್ ತನಕ ಹಿಂಪಡೆಯುವ ಸಾಧ್ಯತೆಗಳು ಇಲ್ಲ ಎಂದು ಬಾಸ್ಟನ್ ಕನ್ಸಲ್ಟಿಂಗ್ ಗ್ರೂಪ್(ಬಿಸಿಜಿ)ನ ಅಧ್ಯಯನ ವರದಿಯೊಂದು ಹೇಳಿದೆ.
ಚೀನಾದಲ್ಲಿ ಲಾಕ್ಡೌನ್ ಘೋಷಣೆಯಾಗುತ್ತಿರುವಂತೆ ಭಾರತದಲ್ಲೂ ಲಾಕ್ಡೌನ್ ಘೋಷಣೆಯಾಗಿದೆ ಎಂಬುದನ್ನು ಉಲ್ಲೇಖಿಸಿರುವ ವರದಿ, COVID19 ವೈರಸ್ ಹರಡುತ್ತಿರುವ ಸನ್ನಿವೇಶದ ಇಲ್ಲಸ್ಟ್ರೇಷನ್ ಮುಂದಿಟ್ಟುಕೊಂಡು ಜಾಗತಿಕ ಮಟ್ಟದ ಪರಿಸ್ಥಿತಿಯನ್ನು ವಿವರಿಸಿದೆ. ಅಲ್ಲದೆ, ಪ್ರಮುಖ ದೇಶಗಳ ಲಾಕ್ಡೌನ್ ಸನ್ನಿವೇಶ ಮತ್ತು ಹಿಂಪಡೆಯಬಹುದಾದ ಸಂಭಾವ್ಯ ಸಮಯವನ್ನು ಉಲ್ಲೇಖಿಸಿದೆ. ಈ ವರದಿ ಪ್ರಕಾರ, ಭಾರತದಲ್ಲಿ ಕರೋನಾ ಲಾಕ್ಡೌನ್ ಅನ್ನು ಸರ್ಕಾರ ಜೂನ್ ಕೊನೆಯವಾರ ಮತ್ತು ಸೆಪ್ಟೆಂಬರ್ ಎರಡನೇ ವಾರದ ನಡುವೆಯಷ್ಟೇ ಹಿಂಪಡೆಯಬಹುದು.
ಭಾರತದಲ್ಲಿನ ಆರೋಗ್ಯ ವ್ಯವಸ್ಥೆಯ ತಯಾರಿ ಮತ್ತು ಸಾರ್ವಜನಿಕ ನೀತಿಯ ಪರಿಣಾಮಕಾರಿ ಅನುಷ್ಠಾನಗಳನ್ನು ಆಧರಿಸಿ ನಿರೀಕ್ಷಿತ ಸವಾಲುಗಳನ್ನು ಹೇಗೆ ಸ್ವೀಕರಿಸಬಹುದು ಎಂಬುದನ್ನು ಅಂದಾಜಿಸಿಯೇ ಈ "ದೀರ್ಘ ಅವಧಿ"ಯ ನಿರ್ಬಂಧಗಳನ್ನು ಹಿಂಪಡೆಯಬಹುದಷ್ಟೆ. ನಾವು ಈ ವರದಿಯನ್ನು ಆಯಾ ದೇಶಗಳ ಆಂತರಿಕ ಮತ್ತು ಬಾಹ್ಯ ಡೇಟಾ ಸಂಗ್ರಹಿಸಿ ಸಿದ್ಧಪಡಿಸಿದ್ದೇವೆ. ಲಾಕ್ಡೌನ್ ಅವಧಿ, ವೈರಲ್ ಸೋಂಕಿನ ಉಚ್ಛ್ರಾಯ ಸ್ಥಿತಿ, ಆರೋಗ್ಯ ವ್ಯವಸ್ಥೆಯ ಕಾರ್ಯಕ್ಷಮತೆ ಮತ್ತು ಇತರೆ ಆರೋಗ್ಯ ಮತ್ತು ಸಾಮಾಜಿಕ ಪರಿಣಾಮಗಳನ್ನು ಊಹಿಸುವ ಸಲುವಾಗಿ ಈ ಪ್ರೆಡಿಕ್ಷನ್ಸ್ ಅನ್ನು ಪ್ರಕಟಿಸಿಲ್ಲ. ಅಲ್ಲದೆ ಇದು ಬಿಸಿಜಿ ಅಧಿಕೃತ ದೃಷ್ಟಿಕೋನವೂ ಇದರಲ್ಲಿ ಅಡಗಿಲ್ಲ. ವಾಸ್ತವಾಂಶಗಳನ್ನು ಮುಂದಿಟ್ಟು ಅಧ್ಯಯನ ನಡೆಸಿ ವರದಿ ಪ್ರಕಟಿಸಲಾಗಿದೆ ಎಂದು ಬಿಸಿಜಿ ಹೇಳಿಕೊಂಡಿದೆ.
ಇದರಲ್ಲಿ ಮಾರ್ಚ್ 25ರತನಕದ ಡೇಟಾ ಇದ್ದು, ಅಧ್ಯಯನಕ್ಕೆ ಪರಿಗಣಿಸಿರುವ ಅಂಶಗಳಿವು - ಸಂಪೂರ್ಣ ಲಾಕ್ಡೌನ್ ಯಾವ ರಾಷ್ಟ್ರದಲ್ಲಿ ಏನಿದೆ ಸ್ಥಿತಿ?, ಲಾಕ್ಡೌನ್ ಶುರುವಾಗಬಹುದಾದ ಸಂಭಾವ್ಯ ದಿನಾಂಕ, ಆಯಾ ರಾಷ್ಟ್ರಗಳಲ್ಲಿ ಸೋಂಕು ಉಚ್ಛ್ರಾಯ ಸ್ಥಿತಿ ತಲುಪಲಿರುವ ಸಮಯ, ಅಲ್ಪಾವಧಿ ಮತ್ತು ದೀರ್ಘಾವಧಿಯ ಸಂಭಾವ್ಯ ಲಾಕ್ಡೌನ್ ಅಂತ್ಯಗೊಳ್ಳುವ ದಿನಾಂಕಗಳನ್ನು ಪರಿಗಣಿಸಲಾಗಿದೆ. ಆದರೆ, ಇದನ್ನು ಯಾವ ಸರ್ಕಾರಗಳೂ ಅಧಿಕೃತವಾಗಿ ದೃಢೀಕರಿಸಿಲ್ಲ. (ಏಜೆನ್ಸೀಸ್)