ಬೆಂಗಳೂರು: ಕರೊನಾ ನಿಯಂತ್ರಣಕ್ಕೆ ಲಾಕ್ಡೌನ್ ಮಾಡಿದ ಕಾರಣಕ್ಕೆ ಸಾಮಾನ್ಯ ಅಪರಾಧ ಪ್ರಕರಣಗಳಲ್ಲಿ ಶೇ.22 ಕುಸಿತ ಕಂಡá-ಬಂದಿದ್ದರೂ, ಆನ್ಲೈನ್ ಮೂಲಕ ಜನರನ್ನು ವಂಚಿಸುವ ಸೈಬರ್ ಅಪರಾಧ ಮಾತ್ರ ಶೇ.60 ಏರಿಕೆ ಕಂಡಿದೆ.
ಮೊದಲಿಗಿಂತಲೂ ಹೆಚ್ಚು ಸಮಯ ಜನರು ಹೆಚ್ಚಾಗಿ ಆನ್ಲೈನ್ ಮೊರೆ ಹೋಗಿದ್ದನ್ನೇ ಮೋಸಗಾರರು ಬಳಸಿಕೊಂಡು ವಂಚಿಸುವ ಪ್ರವೃತ್ತಿ ಹೆಚ್ಚುತ್ತಿರುವುದಕ್ಕೆ ರಾಜ್ಯ ಅಪರಾಧ ದಾಖಲಾತಿ ವಿಭಾಗ (ಎಸ್ಸಿಆರ್ಬಿ) ಅಂಕಿ ಅಂಶಗಳು ಪುಷ್ಟಿ ನೀಡಿವೆ.
ಕೇಂದ್ರ ಸರ್ಕಾರ ಮೊದಲು ಮಾರ್ಚ್ 22ರಂದು ಜನತಾ ಕರ್ಫ್ಯೂ ಘೋಷಣೆ ಮಾಡಿತ್ತು. ನಂತರ ಮಾ. 25ರಿಂದ ಸಂಪೂರ್ಣ ಲಾಕ್ಡೌನ್ ಮಾಡಲಾಗಿದೆ. ಪ್ರತಿಯೊಬ್ಬರೂ ಲಕ್ಷ್ಮಣರೇಖೆ ಎಳೆದುಕೊಂಡು ಗೃಹಬಂಧನದಲ್ಲಿ ಇರುವಂತೆ ಪ್ರಧಾನಿ ನರೇಂದ್ರ ಮೋದಿ ಸೂಚನೆ ಕೊಟ್ಟಿದ್ದರು. ಜನರೂ ಪಾಲಿಸಿದ್ದರು. ಮನೆಬಿಟ್ಟು ಜನ ಹೊರಗೆ ಬಾರದೆ ಇದ್ದರೂ ಅಪರಾಧಗಳು ಮಾತ್ರ ಸಂಪೂರ್ಣ ಹತೋಟಿಗೆ ಬಂದಿಲ್ಲ ಎಂಬುದು ಮಾ.12ರಿಂದ ಏ.13ರವರೆಗೆ ಸಂಗ್ರಹಿಸಿದ ಅಂಕಿ-ಅಂಶದ ಆಧಾರದಲ್ಲಿ ಏ.28ರಂದು ಎಸ್ಸಿಆರ್ಬಿ ಬಿಡುಗಡೆ ಮಾಡಿದ ವರದಿಯಲ್ಲಿ ಬಹಿರಂಗವಾಗಿದೆ. ರಾಜ್ಯಾದ್ಯಂತ ಮಾರ್ಚ್ನಲ್ಲಿ 116 ಕೊಲೆ, 15 ಡಕಾಯಿತಿ, 56 ಸರಗಳವು, 94 ದರೋಡೆ ಪ್ರಕರಣಗಳು ದಾಖಲಾಗಿವೆ.ಲಾಕ್ಡೌನ್ ಅವಧಿಯಲ್ಲಿ 93 ಕೊಲೆ, 13 ಡಕಾಯಿತಿ, 73 ದರೋಡೆ, 31 ಸರಗಳವು ಪ್ರಕರಣಗಳು ದಾಖಲಾಗಿವೆ. ಭೂ ವ್ಯಾಜ್ಯ, ಆಸ್ತಿ ವಿಚಾರಕ್ಕೆ ನಡೆದ ಕೊಲೆ ಪ್ರಕರಣಗಳು ಹೆಚ್ಚಾಗಿ ವರದಿಯಾಗಿವೆ.
ದಿಗ್ಬಂಧನ ಅವಧಿಯಲ್ಲಿ 1,042 ವಂಚನೆ ಪ್ರಕರಣ
ಲಾಕ್ಡೌನ್ ಅವಧಿಯ ತಿಂಗಳಾದ ಏಪ್ರಿಲ್ನಲ್ಲಿ 1,042 ಸೈಬರ್ ಕ್ರೖೆಂಗಳು ವರದಿಯಾಗಿವೆ. ಮಾರ್ಚ್ ಅವಧಿಯಲ್ಲಿ ಈ ಸಂಖ್ಯೆ 661 ಆಗಿತ್ತು. ಲಾಕ್ಡೌನ್ ಸಮಯದಲ್ಲಿ ಕೇಂದ್ರ ಸರ್ಕಾರದಿಂದ ಖಾತೆಗೆ ಹಣ ಹಾಕಲಾಗುತ್ತದೆ, ಉಚಿತವಾಗಿ ಮೊಬೈಲ್ ಡೇಟಾ ರೀಚಾರ್ಜ್ ಮಾಡಲಾಗುತ್ತದೆ ಎಂಬುದು ಸೇರಿ ಕರೊನಾ ಸಂಕಷ್ಟಕ್ಕೆ ಕೇಂದ್ರ ಸರ್ಕಾರ ಆರಂಭಿಸಿರುವ ಪಿಎಂ ಕೇರ್ಸ್ ನಿಧಿಗೆ ಹಣ ನೀಡುವ ರೂಪದಲ್ಲಿ ವಾಟ್ಸ್ಆಪ್ ಮೂಲಕ ಮೊಬೈಲ್ಗಳಲ್ಲಿ ಅನೇಕ ನಕಲಿ ಲಿಂಕ್ಗಳು ಹರಿದಾಡುತ್ತಿವೆ. ಈ ಲಿಂಕ್ಗಳನ್ನು ಕ್ಲಿಕ್ಕಿಸಿ ಬ್ಯಾಂಕ್ ಖಾತೆ ವಿವರ ನೀಡುವುದು, ಮೊಬೈಲ್ ಸ್ಟೋರೇಜ್ ಪ್ರವೇಶಕ್ಕೆ ಅನುಮತಿ ನೀಡಿ ಗುಪ್ತಮಾಹಿತಿ ಕದಿಯಲು ಅವಕಾಶ ನೀಡುವಂತಹ ಅನೇಕ ತಪು್ಪಗಳಿಂದ ಸೈಬರ್ ಅಪರಾಧಗಳು ಹೆಚ್ಚಾಗುತ್ತಿವೆ. ಈ ಕುರಿತು ಸಾರ್ವಜನಿಕರು ಎಚ್ಚರಿಕೆ ವಹಿಸಬೇಕು ಎಂದು ಪೊಲೀಸರು ಸಲಹೆ ಮಾಡಿದ್ದಾಋಎ.
1,287 ಪ್ರಕರಣ ಏರಿಕೆ
ಲಾಕ್ಡೌನ್ ಕಟ್ಟುನಿಟ್ಟಾಗಿ ಜಾರಿಗೆ ತರುವ ಉದ್ದೇಶದಿಂದ ಕೇಂದ್ರ ಸರ್ಕಾರ ಜಾರಿಗೆ ತಂದ ರಾಷ್ಟ್ರೀಯ ವಿಪತ್ತು ಕಾಯ್ದೆ ಮತ್ತು ಸಾಂಕ್ರಾಮಿಕ ರೋಗಗಳ ಕಾಯ್ದೆಯಡಿ 1,287 ಹೆಚ್ಚು ಪ್ರಕರಣಗಳು ದಾಖಲಾಗಿವೆ. ಮಾರ್ಚ್ ನಲ್ಲಿ 3,499 ಪ್ರಕರಣ, ಏಪ್ರಿಲ್ನಲ್ಲಿ 4,786 ಪ್ರಕರಣ ದಾಖಲಾಗಿವೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಹ್ಯಾಕರ್ಗಳಿಂದ ರ್ಯಾನ್ಸಮ್ವೇರ್ ದಾಳಿ
ಬೆಂಗಳೂರು: ಕರೊನಾ ಅಟ್ಟಹಾಸದಿಂದ ಇಡೀ ವಿಶ್ವವೇ ನಲುಗುತ್ತಿದೆ. ಈ ಪರಿಸ್ಥಿತಿಯಲ್ಲಿ ಖಾಸಗಿ ಕಂಪನಿ ನೌಕರರು ಮನೆಯಲ್ಲೇ ಕುಳಿತು ಕೆಲಸ ಮಾಡುತ್ತಿರುವುದನ್ನೇ ದುರುಪಯೋಗಪಡಿಸಿಕೊಳ್ಳುತ್ತಿರುವ ಹ್ಯಾಕರ್ಗಳು ರ್ಯಾನ್ಸಮ್ವೇರ್ ದಾಳಿ ನಡೆಸುತ್ತಿದ್ದಾರೆ. ಹ್ಯಾಕರ್ಗಳು ರಾಜಧಾನಿಯಲ್ಲಿ ವಕೀಲರೊಬ್ಬರ ಕಂಪ್ಯೂಟರ್ ಹ್ಯಾಕ್ ಮಾಡಿ ದತ್ತಾಂಶ ಕದ್ದಿದ್ದಾರೆ.
ಲಾಕ್ಡೌನ್ ಹಿನ್ನೆಲೆಯಲ್ಲಿ ಕಂಪನಿಯ ಕಾರ್ಯಚಟುವಟಿಕೆ ಸ್ಥಗಿತಗೊಳಿಸಿದ ವೇಳೆ ಕಂಪ್ಯೂಟರ್ಗಳು ಹ್ಯಾಕ್ ಆಗಿವೆ. 500ಕ್ಕೂ ಹೆಚ್ಚು ಗ್ರಾಹಕರ ಲೆಕ್ಕ ಪರಿಶೋಧಕ ದತ್ತಾಂಶವನ್ನು ಹ್ಯಾಕರ್ಸ್ ವಶಕ್ಕೆ ತೆಗೆದುಕೊಂಡು, ಬಿಟ್ಕಾಯಿನ್ಗೆ ಬೇಡಿಕೆ ಇಟ್ಟಿರುವುದು ಬೆಳಕಿಗೆ ಬಂದಿದೆ ಎಂದು ಪಶ್ಚಿಮ ವಿಭಾಗ ಸೈಬರ್ ಕ್ರೖೆಂ ಪೊಲೀಸರು ತಿಳಿಸಿದ್ದಾರೆ.
ಆಗಿದ್ದೇನು?: ಗಾಂಧಿನಗರದ ನಿವಾಸಿ ವಕೀಲ ಬಾಬು ಲಾಲ್ ತೆರಿಗೆ ಸಲಹೆಗಾರರಾಗಿದ್ದು, ಗಾಂಧಿನಗರದಲ್ಲಿ ಕನ್ಸಲ್ಟೆನ್ಸಿ ಹೆಸರಿನಲ್ಲಿ ಕಂಪನಿಯನ್ನು ತೆರೆದಿದ್ದಾರೆ. 500ಕ್ಕೂ ಹೆಚ್ಚು ಗ್ರಾಹಕರಿಗೆ ಲೆಕ್ಕ ಪರಿಶೋಧಕ ವಕೀಲರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಲಾಕ್ಡೌನ್ ಹಿನ್ನೆಲೆಯಲ್ಲಿ ಮಾ. 24ರಂದು ಕಚೇರಿಯನ್ನು ಬಂದ್ ಮಾಡಿದ್ದರು. ಲಾಕ್ಡೌನ್ ಸಡಿಲಿಕೆಯಾದ ಹಿನ್ನೆಲೆಯಲ್ಲಿ ಏ.3ರಂದು ಕಚೇರಿ ಬಾಗಿಲು ತೆರೆದು ಪರಿಶೀಲಿಸಿದಾಗ, ಕಂಪ್ಯೂಟರ್ಗಳು ವರ್ಕ್ ಆಗಿಲ್ಲ. ಬಹುದಿನಗಳ ನಂತರ ಆರಂಭಿಸುತ್ತಿರುವುದರಿಂದ ಹೀಗಾಗಿರಬಹುದು ಎಂದು ತಿಳಿದು ಸುಮ್ಮನಾಗಿದ್ದಾರೆ. ಎರಡು ದಿನಗಳ ನಂತರ ತಂತ್ರಜ್ಞರನ್ನು ಕರೆಸಿ ಪರಿಶೀಲಿಸಿದಾಗ, ಸೈಬರ್ ದಾಳಿ ನಡೆದಿರುವುದು ಕಂಡುಬಂದಿದೆ. ಕಚೇರಿಯಲ್ಲಿನ 2 ಕಂಪ್ಯೂಟರ್ ಹಾಗೂ ಡೇಟಾ ಸಂಗ್ರಹಿಸಿದ್ದ ಹಾರ್ಡ್ ಡಿಸ್ಕ್ ಹ್ಯಾಕ್ ಆಗಿರುವುದು ಗೊತ್ತಾಗಿದೆ. ಕಂಪ್ಯೂಟರ್ನ ಡೆಸ್ಕ್ಟಾಪ್ನಲ್ಲಿ, ‘ನಿಮ್ಮ ಎಲ್ಲ ಕಡತಗಳನ್ನು ಸ್ವಾಮ್ಯಕ್ಕೆ ತೆಗೆದುಕೊಂಡಿದ್ದೇವೆ. ಅದನ್ನು ಹಿಂಪಡೆಯಲು "bitcoin@email.tg ಹಾಗೂ ID As 8C34A7AA' ಬಳಸಿ’ ಎಂಬ ಸಂದೇಶವನ್ನು ಹಾಕಿದ್ದಾರೆ. ರ್ಯಾನ್ಸಮ್ೇರ್ ದಾಳಿ ನಡೆದಿರುವುದು ಪ್ರಾಥಮಿಕ ತನಿಖೆಯಲ್ಲಿ ಗೊತ್ತಾಗಿದೆ. ದೂರಿನ ಅನ್ವಯ ಸೈಬರ್ ಕ್ರೖೆಂ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ಕೈಗೊಳ್ಳಲಾಗಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.
ಹ್ಯಾಕ್ ಆದರೆ ಏನಾಗುತ್ತದೆ?
ಇಮೇಲ್ ಮೂಲಕ ರ್ಯಾನ್ಸಮ್ೇರ್ ಲಿಂಕ್ ಕಳುಹಿಸುತ್ತಾರೆ. ಕಂಪ್ಯೂಟರ್ನಲ್ಲಿ ಆಂಟಿ ವೈರಸ್ ಸಾಫ್ಟ್ವೇರ್ ಅಳವಡಿಸಿಕೊಳ್ಳದಿದ್ದರೆ ಹಾಗೂ ಪೈರಸಿ ಒಎಸ್ (ಆಪರೇಟಿಂಗ್ ಸಿಸ್ಟಮ್ ಬಳಸುತ್ತಿದ್ದರೆ ಕಂಪ್ಯೂಟರ್ ಹ್ಯಾಕ್ ಆಗುತ್ತದೆ. ಕಂಪನಿಯ ವ್ಯವಹಾರದ ಗಣಕೀಕೃತ ವ್ಯವಸ್ಥೆಯನ್ನು ಸೈಬರ್ ಕಳ್ಳರು ತಮ್ಮ ಹಿಡಿತಕ್ಕೆ ತೆಗೆದುಕೊಂಡು, ದತ್ತಾಂಶವನ್ನು ವಶದಲ್ಲಿಟ್ಟುಕೊಳ್ಳುತ್ತಾರೆ. ಹಣ ಸುಲಿಗೆ ಮಾಡುವುದೇ ಹ್ಯಾಕರ್ಗಳ ಉದ್ದೇಶ. ಬಿಟ್ ಕಾಯಿನ್ಗಳ ರೂಪದಲ್ಲಿ ಹಣ ಪಡೆಯುತ್ತಾರೆ. ಈ ಪ್ರಕರಣದಲ್ಲಿ ಕಂಪ್ಯೂಟರ್ನ ಡೆಸ್ಕ್ಟಾಪ್ ಮೇಲೆ ಇಮೇಲ್ ಐಡಿ bitcoin@email.tg ಎಂದು ಹರಿಬಿಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಕೇಂದ್ರ ಗೃಹ ಇಲಾಖೆ ಸೂಚಿಸಿದ್ದ ಸಲಹೆ
| ಗೋವಿಂದರಾಜು ಚಿನ್ನಕುರ್ಚಿ