ಹೈದರಾಬಾದ್: ಹೈದರಾಬಾದ್ನ ಐತಿಹಾಸಿಕ ಹೆಗ್ಗುರುತು ಚಾರ್ಮಿನಾರ್, ಹುಸೇನ್ ನಗರ ಲೇಕ್ನ ಬುದ್ಧ ಪ್ರತಿಮೆ, ಇಲ್ಲಿನ ಕಿಮ್ಸ್ ಆಸ್ಪತ್ರೆ ಕಟ್ಟಡ ಎಲ್ಲವೂ ಬಣ್ಣ ಬದಲಾಯಿಸಿವೆ. ಇರುಳಿನಲ್ಲಂತೂ ಆಕರ್ಷಕ ಪಿಂಕ್ ಬಣ್ಣದಿಂದ ಇವು ಸಾರ್ವಜನಿಕರ ಕಣ್ಮನ ಸೆಳೆಯುತ್ತಿವೆ. ಕಾರಣ, ಕ್ಯಾನ್ಸರ್.
ಹೌದು.. ಸ್ತನ ಕ್ಯಾನ್ಸರ್ ಜಾಗೃತಿ ಸಲುವಾಗಿ ಹೈದರಾಬಾದ್ನಲ್ಲಿ ತಿಂಗಳಿಡೀ ವಿಶೇಷ ಕಾರ್ಯಕ್ರಮಗಳು, ಅಭಿಯಾನಗಳು ನಡೆಯಲಿದ್ದು, ಅದರ ಅಂಗವಾಗಿ ನಗರದೆಲ್ಲೆಡೆ ಪಿಂಕ್ ಕಲರ್ ಕಂಗೊಳಿಸುತ್ತಿದೆ. ಹೈದರಾಬಾದ್ನಲ್ಲಿ ಬುಧವಾರದಿಂದಲೇ ಈ ಬದಲಾವಣೆ ಕಂಡುಬಂದಿದೆ.
ಸ್ತನ ಕ್ಯಾನ್ಸರ್ ಬರದಂತೆ ತಡೆಯಲು ಸಾಧ್ಯವಿಲ್ಲ. ಆದರೆ ಅದನ್ನು ಆರಂಭಿಕ ಹಂತದಲ್ಲೇ ಗುರುತಿಸಿದರೆ ಸೂಕ್ತ ಚಿಕಿತ್ಸೆ ನೀಡಬಹುದು. ಹೀಗಾಗಿ ಆರಂಭಿಕ ಹಂತದಲ್ಲೇ ಸ್ತನ ಕ್ಯಾನ್ಸರ್ ಪತ್ತೆ ಮಾಡಲು ಹಾಗೂ ಸ್ತನ ಕ್ಯಾನ್ಸರ್ ಕುರಿತು ಜಾಗೃತಿ ಮೂಡಿಸುವ ಸಲುವಾಗಿ ಅಕ್ಟೋಬರ್ ತಿಂಗಳಾದ್ಯಂತ ಈ ಪಿಂಕ್ ಅಭಿಯಾನ ಹಮ್ಮಿಕೊಳ್ಳಲಾಗಿದೆ. ಉಷಾಲಕ್ಷ್ಮೀ ಬ್ರೆಸ್ಟ್ ಕ್ಯಾನ್ಸರ್ ಫೌಂಡೇಷನ್ (ಯುಬಿಎಫ್) ತನ್ನ ಹತ್ತನೇ ವರ್ಷದ ಪ್ರಯುಕ್ತ ಈ ಅಭಿಯಾನವನ್ನು ವಿಶೇಷವಾಗಿ ಆಯೋಜಿಸಿದೆ.
ಅಕ್ಟೋಬರ್ ತಿಂಗಳನ್ನು ಅಂತಾರಾಷ್ಟ್ರೀಯ ಸ್ತನ ಕ್ಯಾನ್ಸರ್ ಜಾಗೃತಿ ಮಾಸವಾಗಿ ಆಚರಿಸಲಾಗುತ್ತಿದೆ. ವೈಟ್ ಹೌಸ್, ಎಂಪೈರ್ ಸ್ಟೇಟ್ ಬಿಲ್ಡಿಂಗ್, ಬಕಿಂಗ್ಹ್ಯಾಂ ಪ್ಯಾಲೇಸ್, ಲಂಡನ್ ಐಫೆಲ್ ಟವರ್ ಸೇರಿ ವಿದೇಶದ ಹಲವು ಸ್ಮಾರಕಗಳಲ್ಲೂ ಈ ತಿಂಗಳಲ್ಲಿ ಪಿಂಕ್ ಮೆರುಗು ಕಾಣಿಸಲಿದೆ. ಬಣ್ಣದ ಮುಖೇನ ಮೂಡಿಸುವ ಈ ಜಾಗೃತಿ 2000ರಲ್ಲೇ ಆರಂಭಗೊಂಡಿತ್ತು ಎಂದು ಯುಬಿಎಫ್ ತಿಳಿಸಿದೆ. (ಏಜೆನ್ಸೀಸ್)