Haryana Farmers Protest: ಹರಿಯಾಣದಲ್ಲಿ ಭತ್ತದ ಸರ್ಕಾರಿ ಖರೀದಿಯನ್ನು ಯಾವುದೇ ವಿಳಂಬವಿಲ್ಲದೆ ಆರಂಭಿಸಬೇಕು ಎಂದು ಆಗ್ರಹಿಸಿ ಕುರುಕ್ಷೇತ್ರದಲ್ಲಿ ರೈತರು ಪ್ರತಿಭಟನೆ ನಡೆಸಿದ್ದಾರೆ.
ಭಾರತೀಯ ಕಿಸಾನ್ ಯೂನಿಯನ್ (ಚಢೂನಿ) ನೇತೃತ್ವದಲ್ಲಿ ಶಹಾಬಾದ್ ಬಳಿ ರೈತರು ಎನ್ಹೆಚ್-44 ತಡೆದು ಧರಣಿ ನಡೆಸಿದ್ದು, ಇದರಿಂದ ದೆಹಲಿ-ಅಂಬಾಲಾ ಮಾರ್ಗದಲ್ಲಿ ಟ್ರಾಫಿಕ್ ಉಂಟಾಯಿತು. ಪ್ರತಿಭಟನಾಕಾರರನ್ನು ಚದುರಿಸಲು ಪೊಲೀಸರು ಅಶ್ರುವಾಯು ಹಾಗೂ ವಾಟರ್ ಕ್ಯಾನನ್ ಬಳಸಿದ್ದಾರೆ ಎಂದು ರೈತ ಮುಖಂಡರು ಆರೋಪಿಸಿದ್ದಾರೆ.
ಭತ್ತದ ಸರ್ಕಾರಿ ಖರೀದಿ ಸೆಪ್ಟೆಂಬರ್ 20ರೊಳಗೆ ಆರಂಭವಾಗಬೇಕು ಎಂದು ರೈತರು ಈ ಹಿಂದೆ ಗಡುವು ನೀಡಿದ್ದರು. ಗಡುವಿನೊಳಗೆ ಖರೀದಿ ಆರಂಭವಾಗದಿದ್ದರೆ ಸೆಪ್ಟೆಂಬರ್ 22ರಂದು ಶಹಾಬಾದ್ನಲ್ಲಿ ಹೈವೇ ಬಂದ್ ಮಾಡುವುದಾಗಿ ಎಚ್ಚರಿಸಿದ್ದರು.
ರೈತ ಮುಖಂಡ ಗುರ್ಮಾನ್ ಸಿಂಗ್ ಚಢೂನಿ, ಹಲವು ಬಾರಿ ಮನವಿ ಮಾಡಿದರೂ ಭತ್ತ ಖರೀದಿ ಆರಂಭವಾಗಿಲ್ಲ ಎಂದು ಹೇಳಿದ್ದಾರೆ. ರೈತರು ಮಂಡಿಗಳಲ್ಲಿ ಬೆಳೆ ಮಾರಾಟಕ್ಕೆ ಕಾಯುತ್ತಿರುವುದರಿಂದ, ಶೀಘ್ರ ಸರ್ಕಾರಿ ಖರೀದಿ ಆರಂಭಿಸಬೇಕು ಎಂದು ಒತ್ತಾಯಿಸಿದ್ದಾರೆ.
ಹರಿಯಾಣ ಸರ್ಕಾರ ಕೂಡ ಭತ್ತದ ಖರೀದಿ ಪ್ರಕ್ರಿಯೆಯನ್ನು ಸಾಮಾನ್ಯ ಅಕ್ಟೋಬರ್ 1ರ ಬದಲು ಸೆಪ್ಟೆಂಬರ್ 20ರಿಂದಲೇ ಆರಂಭಿಸಲು ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಿತ್ತು. ಮಂಡಿಗಳಿಗೆ ಭತ್ತ ಬೇಗ ಬರುತ್ತಿರುವ ಹಿನ್ನೆಲೆಯಲ್ಲಿ ಖರೀದಿ ಪ್ರಕ್ರಿಯೆಯನ್ನು ಮುಂಚಿತಗೊಳಿಸುವಂತೆ ರಾಜ್ಯ ಸರ್ಕಾರ ಕೇಳಿಕೊಂಡಿತ್ತು.
ಶಹಾಬಾದ್ ಕಾಂಗ್ರೆಸ್ ಶಾಸಕ ರಾಮಕರಣ ಕಾಲಾ ರೈತರ ಬೇಡಿಕೆಗೆ ಬೆಂಬಲ ವ್ಯಕ್ತಪಡಿಸಿದ್ದು, ಭತ್ತದ ಸರ್ಕಾರಿ ಖರೀದಿಯನ್ನು ಸಾಧ್ಯವಾದಷ್ಟು ಬೇಗ ಆರಂಭಿಸಬೇಕು ಎಂದು ಹೇಳಿದ್ದಾರೆ.(ಏಜೆನ್ಸೀಸ್)