ನ್ಯೂ ಮೆಕ್ಸಿಕೋ: ಸಿನಿಮಾ ಶೂಟಿಂಗ್ ವೇಳೆ ಹಾಲಿವುಡ್ ನಟ ಅಲೆಕ್ ಬಾಲ್ಡ್ವಿನ್ ಹಾರಿಸಿದ ಗುಂಡಿಗೆ ಸಿನಿಮಾಟೋಗ್ರಾಫರ್ ಹಲೈನಾ ಹಚ್ಚಿನ್ಸ್ ಬಲಿಯಾಗಿದ್ದಾರೆ. ಅವರ ಹೊಸ ಸಿನಿಮಾದ ಚಿತ್ರೀಕರಣದ ವೇಳೆ ಗುರುವಾರ ನ್ಯೂ ಮೆಕ್ಸಿಕೋದ ಸಾಂತ ಫೆನಲ್ಲಿ ಸಂಭವಿಸಿದ ಈ ದುರ್ಘಟನೆಯ ಬಗ್ಗೆ ಇದೀಗ ಹಲವು ಮಾಹಿತಿಗಳು ಹೊರಬಿದ್ದಿವೆ.
'ರಸ್ಟ್' ಚಿತ್ರದ ಶೂಟಿಂಗ್ ಸಮಯದಲ್ಲಿ ಹಾನ್ನಾ ಗುಟೈರ್ರೆಜ್ ಎಂಬುವರು ಚಿತ್ರಕ್ಕೆ ಶಸ್ತ್ರಾಸ್ತ್ರಗಳ ಸಹಾಯ ಒದಗಿಸಿದ್ದರು. ಅಸ್ತ್ರಗಳನ್ನಿರಿಸಿದ್ದ ಕಾರ್ಟ್ನಿಂದ ಒಂದು ಗನ್ ತೆಗೆದು ಗನ್ನಿನಲ್ಲಿ ಲೈವ್ ಬುಲೆಟ್ಸ್ನ ರೌಂಡ್ ಇರುವ ಬಗ್ಗೆ ಅರಿವಿಲ್ಲದೆ ಸಹಾಯಕ ನಿರ್ದೇಶಕ ಡೇವ್ ಹಾಲ್ಸ್, ನಟ ಬಾಲ್ಡ್ವಿನ್ ಕೈಗೆ ನೀಡಿದ್ದರು. ಅದರಿಂದ ಶೂಟ್ ಮಾಡಲ್ಪಟ್ಟ ಗುಂಡಿನಿಂದ ಕ್ಯಾಮೆರಾ ಹಿಡಿದಿದ್ದ ಹಚ್ಚಿನ್ಸ್ ಮೃತಪಟ್ಟರೆ, ನಿರ್ದೇಶಕ ಜೋಯೆಲ್ ಸೌಜಾಗೂ ಗಾಯಗಳುಂಟಾದವು ಎಂದು ಪೊಲೀಸರ ಪ್ರಾಥಮಿಕ ವರದಿ ತಿಳಿಸಿದೆ.
ಚಿತ್ರೀಕರಣ ನಡೆಯುತ್ತಿದ್ದ ರಾಂಚ್ನಲ್ಲಿ ಘಟನೆಗೆ ಸಂಬಂಧಿಸಿದ ವಿಡಿಯೋ ಫೂಟೇಜ್ಗಳನ್ನು ಪಡೆಯಲು ಮತ್ತು ರಕ್ತದ ಕಲೆಗಳಿಂದ ಕೂಡಿದ ನಟ ಬಾಲ್ಡ್ವಿನ್ರ ಬಟ್ಟೆ ಮತ್ತು ಇತರ ಪ್ರಾಪ್ ಗನ್ಗಳನ್ನು ಪರಿಶೀಲಿಸಲು ಪೊಲೀಸ್ ಅಧಿಕಾರಿಗಳು ಮುಂದಾಗಿದ್ದಾರೆ. ಈ ನಿಟ್ಟಿನಲ್ಲಿ ಸಾಂತ ಫೆನ ಕೌಂಟಿ ಶರೀಫ್ ಕಛೇರಿಗೆ ನಗರದ ನ್ಯಾಯಾಲಯ ಶುಕ್ರವಾರದಂದು ಸರ್ಚ್ ವಾರೆಂಟ್ ನೀಡಿದೆ. ಹೆಚ್ಚಿನ ವಿವರಗಳು ಸದ್ಯದಲ್ಲೇ ಹೊರಬೀಳಲಿವೆ ಎಂದು ವರದಿಗಳು ತಿಳಿಸಿವೆ. (ಏಜೆನ್ಸೀಸ್)