ಕೋಲಾರ: ಸರ್ಕಾರಿ ಇಲಾಖೆಗಳಲ್ಲಿ ಸಾರ್ವಜನಿಕರ ಸಮಸ್ಯೆಗಳಿಗೆ ಸಕಾಲಕ್ಕೆ ಸ್ಪಂದನೆ ದೊರೆಯುತ್ತಿಲ್ಲ ಎಂಬುದು ಸೇರಿ ಅನೇಕ ದೂರು ಬಂದ ಹಿನ್ನೆಲೆಯಲ್ಲಿ ಉಪಲೋಕಾಯುಕ್ತ ಬಿ.ವೀರಪ್ಪ ಅವರು ಏ.3ರಂದು ಮುಳಬಾಗಿಲು ತಾಲೂಕಿನ ವಿವಿಧ ಇಲಾಖೆಗಳಿಗೆ ದಿಢೀರ್ ದಾಳಿ ನಡೆಸಿ ತಪ್ಪಿತಸ್ಥ 10 ಅಧಿಕಾರಿಗಳ ವಿರುದ್ಧ 11 ಸ್ವಯಂ ಪ್ರಕರಣಗಳನ್ನು ದಾಖಸಿಕೊಂಡಿದ್ದಾರೆ.
ಅಧಿಕಾರಿಗಳ, ಸಿಬ್ಬಂದಿ ಕರ್ತವ್ಯದಲ್ಲಿ ಉದಾಸೀನತೆ, ದಾಖಲೆಗಳ ಅಸಮರ್ಪಕ ನಿರ್ವಹಣೆ, ಹಾಜರಾತಿ ಸೇರಿ ಹಲವು ಲೋಪಗಳು ಕಂಡು ಬಂದಿದ್ದವು. ಬಸ್ ನಿಲ್ದಾಣದಲ್ಲಿನ ಅಂಗಡಿಗಳಲ್ಲಿ ನೀರಿನ ಬಾಟಲಿ, ತಿಂಡಿ, ತಂಪು ಪಾನೀಯಗಳು ಇನ್ನಿತರ ಆಹಾರ ಪದಾರ್ಥಗಳನ್ನು ಪರಿಶೀಲಿಸಿದಾಗ ಅವಧಿ ಮುಗಿರುವುದು ಗಮನಕ್ಕೆ ಬಂದಿತು. ನಂದಿನಿ ಪಾರ್ಲರ್ನಲ್ಲಿ ಬೆಳಗಾವಿ ಕುಂದಾ ಸಿಹಿ ಅವಧಿ ಏ.2ಕ್ಕೆ ಮುಕ್ತಾಯವಾಗಿತ್ತು, ತೂಕದ ಯಂತ್ರಗಳಿಗೆ ಮಾಪನಾಂಕ ರ್ನಿಣಯ ನವೀಕರಿಸದಿರುವುದು, ಮುದ್ರೆ ಇಲ್ಲದಿರುವುದು, ಪ್ರಯಾಣಿಕರ ಅನುಕೂಲಕ್ಕಾಗಿ ಹೋಟೆಲ್, ವಿಶ್ರಾಂತಿ ಕೊಠಡಿ, ಪಾರ್ಕಿಂಗ್ ವ್ಯವಸ್ಥೆ, ಶೌಚಗೃಹ ಶುಚಿತ್ವ, ಕುಡಿಯುವ ನೀರು ಇಲ್ಲದೆ ಇರುವುದು ಕಂಡು ಬಂದ ಹಿನ್ನೆಲೆಯಲ್ಲಿ ಸಂಚಾರ ನಿಯಂತ್ರಕ ರಾಜಪ್ಪ ವಿರುದ್ಧ ದೂರು ದಾಖಲಾಗಿದೆ.
* ಲಂಚಕ್ಕೆ ಬೇಡಿಕೆ ಆರೋಪ
ಭೂ ದಾಖಲೆಗಳ ನಿರ್ದೇಶಕಿ ಕೇಂದ್ರಸ್ಥಾನದಲ್ಲಿ ಉಳಿದುಕೊಂಡು ಕರ್ತವ್ಯ ನಿರ್ವಹಿಸದೇ ಇರುವುದು, ಜತೆಗೆ ಕಚೇರಿಯ ನಿವೇದಿತಾ, ಪುಟ್ಟಸ್ವಾಮಿ, ಅಶೋಕ್ ಮೊಬೈಲ್ನಲ್ಲಿ ಯುಪಿಐ ಪರಿಶೀಲಿಸಿದಾಗ ವೇತನಕ್ಕಿಂತ ಹೆಚ್ಚು ಆರ್ಥಿಕ ವಹಿವಾಟು ನಡೆಸಿರುವುದು, ಬಯೋಮೆಟ್ರಿಕ್ ಹಾಜರಾತಿ ಅಳವಡಿಸದಿರುವುದು, ಲಂಚದ ಬೇಡಿಕೆ ಇಡುತ್ತಿರುವುದಾಗಿ ಸಾರ್ವಜನಿಕರ ದೂರು ಆಧರಿಸಿ ನಿರ್ದೇಶಕಿ ನಿವೇದಿತಾ ವಿರುದ್ಧ ದೂರು ದಾಖಲಾಗಿದೆ.
* ಪರವಾನಿಗೆಗಳು ಕ್ರಮಬದ್ಧವಾಗಿಲ್ಲ
ಅಬಕಾರಿ ಇಲಾಖೆಯಿಂದ ನೀಡಲಾಗಿರುವ ಸಿಎಲ್&7 ಹಾಗೂ ಸಿಎಲ್&9 ಪರವಾನಗಿಗಳು ಕ್ರಮಬದ್ಧವಾಗಿಲ್ಲ, ಸಿಎಲ್&7 ದಾಖಲೆಯಲ್ಲಿ ಕೇವಲ ಪ್ಲಾ$್ಯನ್ ಬ್ಲೂ ಪ್ರಿಂಟ್ ಮಾತ್ರ ಇದ್ದು, ಉಳಿದ ಮಾಹಿತಿಯಿಲ್ಲ. ಗ್ರಾಪಂನಿಂದ ವ್ಯಾಪಾರ ಪರವಾನಗಿ ಪಡೆದುಕೊಳ್ಳದೆ ಇದ್ದರೂ ಸಹ ಅನುಮತಿ ನೀಡಿರುವ ಬಗ್ಗೆ ಲೋಪಗಳು ಕಂಡು ಬಂದಿವೆ. ಇದರಿಂದಾಗಿ ಅಬಕಾರಿ ನಿರೀಕ್ಷಕ ಬಿ.ಎಸ್.ರೋಹಿತ್ ವಿರುದ್ಧ ದೂರು ದಾಖಲಾಗಿದೆ.
* ಅನಧಿಕೃತ ವ್ಯಕ್ತಿಗಳ ನೇಮಕ
ಪಂಚಾಯತ್ ರಾಜ್ ಇಂಜನಿಯರಿಂಗ್ ವಿಭಾಗದ ಸಹಾಯಕ ಕಚೇರಿಯಲ್ಲಿ ಡೇಟಾ ಎಂಟ್ರಿ ಆಪರೇಟರ್ಗಳಾದ ಶಿಲ್ಪಾ, ಸುರೇಶ್, ಸುಭಾಷ್ ಅವರನ್ನು ಅನುಮತಿ ಇಲ್ಲದೆ ಸಹಾಯಕ ಕಾರ್ಯಪಾಲಕ ಅಭಿಯಂತರ ಪ್ರಸನ್ನ ಕುಮಾರ್ ನೇಮಕ ಮಾಡಿಕೊಂಡಿದ್ದಾರೆ. 5&6ವರ್ಷದಿಂದ ಅನಧಿಕೃತವಾಗಿ ಕೆಲಸ ನಿರ್ವಹಿಸುತ್ತಿರುವ ಮತ್ತು ವೇತನಕ್ಕಿಂತ ಹೆಚ್ಚು ವಹಿವಾಟು ನಡೆಸಿದ ಈ ಸಂಬಂಧ ಮುಳಬಾಗಿಲು ಠಾಣೆಯಲ್ಲಿ ದೂರು ದಾಖಲಿಸಲಾಗಿದೆ.
* ಮುಂಚಿತವಾಗಿ ಸಹಿ
ಪಿಚ್ಚಗುಂಟ್ಲಹಳ್ಳಿ ಗ್ರಾಪಂ ಕಚೇರಿಯ ಹಾಜರಾತಿ ಪುಸ್ತಕ ಪರಿಶೀಲಿಸಿದಾಗ ವಾಟರ್ ಮನ್ಗಳಾದ ನಾರಾಯಣಸ್ವಾಮಿ, ಶ್ರೀನಿವಾಸ್ ಮುಂಚಿತವಾಗಿ ಸಹಿ ಮಾಡಿರುವುದು, ರಸ್ತೆ, ಚರಂಡಿ, ಬೀದಿ ದೀಪಗಳು ಇಲ್ಲದಿರುವ ಹಿನ್ನಲೆಯಲ್ಲಿ ಪಿಡಿಒಗಳಾದ ಸಿ.ಪಿ.ಅಶ್ವತ್ಥ್, ರವಣಪ್ಪ ವಿರುದ್ಧ ದೂರು ದಾಖಲಾಗಿದೆ.
* ತಹಸೀಲ್ದಾರ್ ಗೀತಾವಿರುದ್ಧ ದೂರು ದಾಖಲು
ತಾಲೂಕು ಕಚೇರಿಗೆ ಭೇಟಿ ನೀಡಿದಾಗ ಆರ್ಆರ್ಟಿ 664, ಬಗರ್ ಹುಕುಂ 193 ಅರ್ಜಿ ಸೇರಿ 2,856 ಅರ್ಜಿ ಬಾಕಿ ಇವೆ. ವರ್ಷದಿಂದ ಪಿಟಿಸಿಎಲ್ ದಾಖಲೆ ನೀಡುತ್ತಿಲ್ಲ, ಗ್ರಾಮ ಸಹಾಯಕ ಸುಬ್ರಮಣಿ ತಾಲೂಕು ಕಚೇರಿಯಲ್ಲಿ ಸಾರ್ವಜನಿಕರಿಂದ ಹಣ ಪಡೆದು ದಾಖಲೆ ನೀಡಿರುತ್ತಿರುವ ಬಗ್ಗೆ ವಿಡಿಯೋ ಚಿತ್ರೀಕರಣ ಮಾಡಿಕೊಂಡಿರುವುದು ಕಂಡು ಬಂದಿದೆ. ಅಭಿಲೇಖಾಲಯದಲ್ಲಿ ದಾಖಲೆಗಳು ಶಿಥಿಲವಾಗಿರುವುದು, ಪಡಿತರ ಚೀಟಿ ತಿದ್ದುಪಡಿ ಅರ್ಜಿಗಳು ಬಾಕಿ ಉಳಿದಿವು ಕಂದು ಬಂದಿದ್ದು, ತಹಸೀಲ್ದಾರ್ ಗೀತಾ ವಿರುದ್ಧ ದೂರು ದಾಖಲಾಗಿದೆ.
* ನಗರಸಭೆಯಲ್ಲಿ ಸಮಸ್ಯೆಗಳ ಪ್ರದರ್ಶನ
ನಗರಸಭೆಯಲ್ಲಿ ಬಯೋಮೆಟ್ರಿಕ್ ಹಾಜರಾತಿ ಇಲ್ಲದಿರುವುದು, ಪೌರಾಯುಕ್ತ ಶ್ರೀಧರ್ ಚಿಂತಾಮಣಿಯಲ್ಲಿ ವಾಸವಿರುವುದು. ಸಿಬ್ಬಂದಿ ಸುಬ್ರಮಣಿ ಎರಡು ದಿನ ಗೈರಾಗಿದ್ದರೂ ಸಹ ಪ್ರಶ್ನೆ ಚಿಹ್ನೆ ಇಟ್ಟುರುವುದು. ಚಲನವಲನ ವಹಿಯಲ್ಲಿ ನಮೂದು ಮಾಡದೆ ಇರುವುದು, ನಗದು ಘೋಷಣೆ ಮಾಡಿಕೊಳ್ಳದೆ ಇರುವುದು, ಆರೋಗ್ಯ ನಿರೀಕ್ಷಕಿ ಪ್ರತಿಭಾ ಬ್ಯಾಂಕ್ ವಹಿವಾಟು ಹೆಚ್ಚಾಗಿರುವುದು. ವಾಣಿಜ್ಯ ಸಂಸ್ಥೆಗಳ ದಾಖಲೆ ಪಾಲನೆ ಮಾಡದೆ ಇರುವುದು, ಬಿ ಖಾತೆ ಮಾಡಲು ನಡವಳಿ ಮಾಡದೆ ಇರುವುದು ಕಂಡು ಬಂದಿವೆ. ವಾಹನಗಳ ದಾಖಲೆಗಳ ಅವಧಿ ಮುಗಿರುವುದು, ಜನನ&ಮರಣ ಪತ್ರ ನೀಡಲು ಹಣ ವಸೂಲಿ ಮಾಡುವುದು ಬೆಳಕಿಗೆ ಬಂದಿದೆ.
* ಅವಧಿ ಮೀರಿದ ಔಷಧ ಪತ್ತೆ
ಸರ್ಕಾರಿ ಆಸ್ಪತ್ರೆಯಿಂದ ಹೊರಗಡೆಗೆ ರೋಗಿಗಳಿಗೆ ಚೀಟಿ ಬರೆದುಕೊಡುವುದು, ಸುಚಿತ್ವ ಕಾಪಾಡದೆ ಇರುವುದು, ಚರ್ಮ ರೋಗಕ್ಕೆ ಸಂಬಂಧಿಸಿದ ಔಷಧಗಳ ಅವಧಿ ಮುಕ್ತಾಯವಾಗಿರುವುದು, ಕರ್ತವ್ಯದ ವೇಳೆ ವೈದ್ಯ ಡಾ.ಕಿಶನ್ ನಿಗದಿತ ಸಮವಸ್ತ್ರ ಧರಿಸದೆ ಇರುವುದು. ಸಿಜೇರಿಯನ್ ಡೆಲಿವರಿಗಳ ಸಂಖ್ಯೆ ಹೆಚ್ಚಾಗಿರುವುದು, ಗರ್ಭಪಾತ ಮಾಡುವಾಗ ಕಾನೂನು ಪಾಲನೆ ಮಾಡದಿರುವುದು ಸೇರಿ ಅನೇಕ ದೂರ ಬಂದ ಹಿನ್ನೆಲೆಯಲ್ಲಿ ಟಿಎಚ್ಒ ಡಾ.ಕೆ.ಎಸ್.ಸುರೇಂದ್ರ ಎದುರಾರರಾಗಿದ್ದಾರೆ.