"ಕೃಷ್ಣಂ ಪ್ರಣಯ ಸಖಿ' (2024) ಯಶಸ್ಸಿನ ಬಳಿಕ ನಟ ಗಣೇಶ್ ನಟಿಸಿರುವ ಯಾವ ಚಿತ್ರವೂ ಬಿಡುಗಡೆಯಾಗಿಲ್ಲ. ಹಾಗಂತ ಗಣೇಶ್ ಎರಡು ವರ್ಷಗಳಿಂದ ಬ್ರೇಕ್ನಲ್ಲಿದ್ದಾರೆ ಅಂತಲ್ಲ. ಬದಲಾಗಿ ಬ್ಯಾಕ್ ಟು ಬ್ಯಾಕ್ ಐದು ಚಿತ್ರಗಳಲ್ಲಿ ಬಿಜಿಯಿದ್ದಾರೆ. ಇಂದು 48ನೇ ವಸಂತಕ್ಕೆ ಕಾಲಿಡುತ್ತಿರುವ ಅವರು, ಹುಟ್ಟುಹಬ್ಬದ ಖುಷಿಯಲ್ಲಿ ವಿಜಯವಾಣಿಗೆ ಮಾತಿಗೆ ಸಿಕ್ಕಿದ್ದರು. ಸದ್ಯ ಯಾವ ಚಿತ್ರದಲ್ಲಿ ಬಿಜಿಯಾಗಿದ್ದಾರೆ? ಯಾವ ಸಿನಿಮಾ ಯಾವಾಗ ತೆರೆಗೆ ಬರಲಿದೆ? ಅಂತೆಲ್ಲ ಹಲವು ಪ್ರಶ್ನೆಗಳಿಗೆ ಮುಕ್ತವಾಗಿ ಉತ್ತರಿಸಿದ್ದಾರೆ.
* ಎರಡು ವರ್ಷಗಳಿಂದ ನಿಮ್ಮ ಸಿನಿಮಾ ಬರಲಿಲ್ಲವಲ್ಲಾ?
- ವರ್ಷಕ್ಕೆ ಎರಡು ಅಥವಾ ಮೂರು ಸಿನಿಮಾ ಮಾಡಲೇಬೇಕು ಎಂಬುದು ನನ್ನಾಸೆ. ಆದರೆ, ಕೆಲವೊಮ್ಮೆ ಅದು ನಮ್ಮ ಕೈಯಲ್ಲಿ ಇರುವುದಿಲ್ಲ. ಪ್ರ್ಯಾಕ್ಟಿಕಲಿ ಅದು ಕಷ್ಟವಾಗುತ್ತದೆ. ಕೆಲ ಚಿತ್ರಗಳಿಗೆ ಬೃಹತ್ ಸೆಟ್ಗಳು ಬೇಕಾಗುತ್ತದೆ. ದೊಡ್ಡ ಬಜೆಟ್ ಕೇಳುವ ಸಿನಿಮಾಗಳು ಹೆಚ್ಚು ಸಮಯವನ್ನೂ ಕೇಳುತ್ತವೆ. ಆಗ ನಾನು ಚಿತ್ರತಂಡದ ಮೇಲೆ ಒತ್ತಡ ಹಾಕಲು ಆಗುವುದಿಲ್ಲ. ಸದ್ಯ ನಾನು "ಬೃಂದಾ ವಿಹಾರಿ', "ಪಿನಾಕ', "ಯುವರ್ಸ್ ಸಿನ್ಸಿಯರ್ಲಿ ರಾಮ್', "ತಮ್ಮ ಸುಖಾಗಮನ ಬಯಸುವ', "ಜಾಂಗೋ ಕೃಷ್ಣಮೂರ್ತಿ'... ಹೀಗೆ ಐದು ಸಿನಿಮಾಗಳಲ್ಲಿ ನಟಿಸುತ್ತಿದ್ದೇನೆ.
* ಈ ವರ್ಷ ಯಾವ ಸಿನಿಮಾ ರಿಲೀಸ್ ಆಗಲಿವೆ?
& ಆಗಸ್ಟ್ನಿಂದ ಡಿಸೆಂಬರ್ ಒಳಗೆ ಒಂದು ಅಥವಾ ಎರಡು ತಿಂಗಳ ಅಂತರದಲ್ಲಿ "ಬೃಂದ ವಿಹಾರಿ' ಮತ್ತು "ಪಿನಾಕ' ಚಿತ್ರಗಳು ಬಿಡುಗಡೆಯಾಗಲಿವೆ. "ಪಿನಾಕ'ದಂತೆಯೇ "ಯುವರ್ಸ್ ಸಿನ್ಸಿಯರ್ಲಿ ರಾಮ್' ಚಿತ್ರದ ಬಜೆಟ್ ಕೂಡ ದೊಡ್ಡದಾಯಿತು. ಹೀಗಾಗಿ ಹೆಚ್ಚು ಸಮಯ ತೆಗೆದುಕೊಳ್ಳುತ್ತಿದೆ. ನಾಯಕ ನಟನಾಗಿ ್ಲೆಕ್ಸಿಬಲ್ ಆಗಿರಬೇಕು. ನಾನೇನೋ ಹಲವು ಕಥೆಗಳನ್ನು ಕೇಳಿದೆ. ಆದರೆ, ಈಗ ಇರುವ ಸಿನಿಮಾಗಳನ್ನು ಮೊದಲು ಒಂದೊಂದಾಗಿ ರಿಲೀಸ್ ಮಾಡಿ, ನಂತರ ಹೊಸ ಸಿನಿಮಾ ಓಕೆ ಮಾಡಬೇಕು ಅಂತ ನಿರ್ಧರಿಸಿ, ಯಾವುದನ್ನೂ ಒಪ್ಪಿಲ್ಲ.
* ಐದೂ ಚಿತ್ರಗಳನ್ನು ಹೇಗೆ ಬ್ಯಾಲೆನ್ಸ್ ಮಾಡುತ್ತಿದ್ದೀರಿ?
- ಐದು ಚಿತ್ರಗಳೂ ವಿಭಿನ್ನ ಜಾನರ್ ಹೊಂದಿದ್ದು, ನನ್ನ ಪಾತ್ರ ಕೂಡ ಒಂದಕ್ಕಿಂತ ಒಂದು ಭಿನ್ನವಾಗಿದೆ. "ಪಿನಾಕ' ಹಿಸ್ಟಾರಿಕಲ್, ಮಿಸ್ಟರಿ, ್ಯಾಂಟಸಿ ಜಾನರ್ ಆಗಿದ್ದರೆ, "ಬೃಂದವಿಹಾರಿ' ಎಮೋಷನ್ಸ್ ಮತ್ತು ಸಂಗೀತ ಹಿನ್ನೆಲೆ ಹೊಂದಿದೆ. "ಯುವರ್ಸ್ ಸಿನ್ಸಿಯರ್ಲಿ ರಾಮ್' ಜರ್ನಿ ಸುತ್ತ ಸಾಗುತ್ತದೆ. "ತಮ್ಮ ಸುಖಾಗಮನ ಬಯಸುವ' ನೀಟ್ ಲವ್ಸ್ಟೋರಿ ಕಮ್ ಡ್ರಾಮಾ ಆಗಿದೆ. ಹೀಗಾಗಿ ಪ್ರತಿ ತಿಂಗಳು 20 ದಿನ ಒಂದು ಚಿತ್ರದ ಶೂಟಿಂಗ್ ಮಾಡಿ, 10 ದಿನ ಬ್ರೇಕ್ ಪಡೆದು ಮತ್ತೊಂದು ಪಾತ್ರಕ್ಕೆ ಸಿದ್ಧನಾಗುತ್ತಿದ್ದೆ. ಇದೇ ರೀತಿ ಎಲ್ಲ ಚಿತ್ರಗಳಲ್ಲೂ ನಟಿಸಲು ಸಾಧ್ಯವಾಯಿತು.
* ಈ ಬಾರಿಯ ಹುಟ್ಟುಹಬ್ಬ ಆಚರಣೆ ಹೇಗಿರಲಿದೆ? ರೆಸಾಲ್ಯೂಷನ್ ಏನಾದರೂ...
- ಕಳೆದ ಐದು ವರ್ಷಗಳಿಂದ ನಾನು ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿಲ್ಲ. ಈ ಬಾರಿ ತಿರುಪತಿ ತಿಮ್ಮಪ್ಪನ ದರ್ಶನ ಪಡೆಯಲಿದ್ದೇನೆ. ವರ್ಷಕ್ಕೆರಡು ಸಿನಿಮಾ ಮಾಡಲೇಬೇಕು ಅನ್ನೋದೇ ನನ್ನ ರ್ಬತಡೇ ರೆಸಾಲ್ಯೂಷನ್.
* "ಜಾಂಗೋ ಕೃಷ್ಣಮೂರ್ತಿ' ತಡವಾಗುತ್ತಿರುವುದೇಕೆ?
- ಅರಸು ಅಂತಾರೆ ನಿರ್ದೇಶನದ ಚಿತ್ರ "ಜಾಂಗೋ ಕೃಷ್ಣಮೂರ್ತಿ' ಒಂದು ಹಂತದ ಶೂಟಿಂಗ್ ಮುಗಿದ ಬಳಿಕ ಬ್ರೇಕ್ ತೆಗೆದುಕೊಂಡಿದ್ದೆವು. ಸ್ಥಗಿತಗೊಳ್ಳಲಿದೆ ಎಂಬ ರೂಮರ್ ಕೂಡ ಹಬ್ಬಿತ್ತು. ಆದರೆ, ಇತ್ತೀಚೆಗಷ್ಟೆ ನಿರ್ದೇಶಕರು ಮತ್ತು ನಿರ್ಮಾಪಕರು ಬಂದು ಮಾತನಾಡಿದ್ದಾರೆ. ಹೀಗಾಗಿ ಟೇಕಾಫ್ ಆಗಲಿದೆ.
* ಇವತ್ತಿನ ಕನ್ನಡ ಚಿತ್ರರಂಗದ ಸ್ಥಿತಿಯ ಬಗ್ಗೆ...
- ಕನ್ನಡ ಚಿತ್ರಗಳು ಓಡುತ್ತಿಲ್ಲ, ಒಳ್ಳೆ ಕಂಟೆಂಟ್ ಬರುತ್ತಿಲ್ಲ ಎಂದು ಮಾತನಾಡಿಕೊಳ್ಳುತ್ತಿದ್ದಾರೆ. ಆದರೆ, ಈ ಗ್ಯಾಪಲ್ಲಿ ಒಂದೊಳ್ಳೆ ಸಿನಿಮಾ ಥಿಯೇಟರ್ಗಳಲ್ಲಿ ನಿಂತುಕೊಂಡುಬಿಟ್ಟರೆ ಅದು ಎಷ್ಟು ಬಿಜಿನೆಸ್ ಮಾಡುತ್ತೋ ಊಹಿಸಲೂ ಸಾಧ್ಯವಿಲ್ಲ. ಅಷ್ಟು ದೊಡ್ಡ ಮಟ್ಟದಲ್ಲಿ ಹಿಟ್ ಆಗಿಬಿಡಬಹುದು. ಇವತ್ತು $15 ಕೋಟಿ, $20 ಕೋಟಿ ಕೇವಲ ಒಂದು ವಾರದ ಕಲೆಕ್ಷನ್. ಏರಿಳಿತ ಆಗಿದೆ ನಿಜ. ಇನ್ನು ಆರು ತಿಂಗಳಲ್ಲಿ ಒಂದು ಕನ್ನಡ ಸಿನಿಮಾ ದೊಡ್ಡ ಹಿಟ್ ಆಗಲಿದೆ. ಇವತ್ತು ಸಿನಿಮಾ ಗಳಿಕೆಯ ವಿಚಾರ ಗುಟ್ಟಾಗಿ ಉಳಿದಿಲ್ಲ. ಸಿನಿಮಾದಲ್ಲಿ ಆದಾಯ ಇದೆ. ಸರಿಯಾದ ಸಮಯದಲ್ಲಿ ಸರಿಯಾದ ಸಿನಿಮಾಗಳು ಬರುತ್ತಿಲ್ಲವಷ್ಟೇ. ಒಳ್ಳೆ ಟೈಮಲ್ಲಿ ಬಂದರೆ ಹೊಸಬರ ಚಿತ್ರಗಳೂ ಹಿಟ್ ಆಗುತ್ತವೆ. ಹೊಸಬರ ಚಿತ್ರಗಳು ಚೆನ್ನಾಗಿ ಕಲೆಕ್ಷನ್ ಮಾಡಿಕೊಂಡಷ್ಟೂ ಚಿತ್ರರಂಗಕ್ಕೆ ಒಳ್ಳೆಯದೇ. ಮೊದಲೆಲ್ಲ ಥಿಯೇಟರ್ ಕಲೆಕ್ಷನ್ ಮೇಲೆ ಅವಲಂಬಿಸಿದ್ದೆವು. ನಂತರ ಟಿವಿ, ಒಟಿಟಿ ಹಕ್ಕುಗಳಿಂದ ಆದಾಯ ಆರಂಭವಾದ ಬಳಿಕ ಬಜೆಟ್ ಹಿಗ್ಗಿತು. ಈಗ ಟಿವಿ, ಒಟಿಟಿಯಿಂದ ಹಣ ಬರುತ್ತಿಲ್ಲವಾದರೂ, ಥಿಯೇಟರ್ ಕಲೆಕ್ಷನ್ ಹಿಗ್ಗಿದೆ. ತಿಂಗಳಿಗೆ ಎರಡು ಒಳ್ಳೆ ಸಿನಿಮಾಗಳು ಬ್ಯಾಕ್ ಟು ಬ್ಯಾಕ್ ಬರುತ್ತಿದ್ದರೆ, ಜನ ಮತ್ತೆ ಥಿಯೇಟರ್ಗೆ ಬಂದೇ ಬರುತ್ತಾರೆ.
* ನಟರ ಪ್ಯಾನ್ ಇಂಡಿಯಾ ಮೋಹದಿಂದಾಗಿ ಸಿನಿಮಾಗಳು ತಡವಾಗುತ್ತಿವೆಯಾ?
- ಬೇರೆ ನಟರು ಬಹುಭಾಷೆ, ಪ್ಯಾನ್ ಇಂಡಿಯಾ ಬಗ್ಗೆ ಹೆಚ್ಚು ತಲೆ ಕೆಡಿಸಿಕೊಂಡಿದ್ದಾರಾ ಇಲ್ಲವಾ ಎಂಬುದರ ಬಗ್ಗೆ ನಾನು ಮಾತನಾಡುವುದಿಲ್ಲ. "ಪಿನಾಕ' ಬಹುಭಾಷೆಗಳಲ್ಲಿ ಬರುತ್ತಿದ್ದರೂ, ನನ್ನ ಮೊದಲ ಆದ್ಯತೆ ಕನ್ನಡಕ್ಕೆ. ಯಾವ ಚಿತ್ರವಾದರೂ ಮೊದಲು ಕನ್ನಡದಲ್ಲಿ ರಿಲೀಸ್ ಮಾಡಿ ನಂತರ ಬೇರೆ ಭಾಷೆಗಳಲ್ಲಿ ಬಿಡುಗಡೆ ಮಾಡಿ ಎಂದೇ ನಿರ್ಮಾಪಕರಿಗೂ ಹೇಳುತ್ತೇನೆ.