ಗಣೇಶ ಮುದ್ರೆಯನ್ನು ದಿನಕ್ಕೆ 4-5 ಬಾರಿ ನಿಯಮಿತವಾಗಿ ಅಭ್ಯಾಸ ಮಾಡುವುದರಿಂದ ಯಾವುದೇ ಅಡೆ ತಡೆೆಗಳನ್ನು ಜಯಿಸಲು ಸಹಾಯ ಮಾಡುತ್ತದೆ. ಶಕ್ತಿ ಮತ್ತು ಆತ್ಮ ವಿಶ್ವಾಸವನ್ನು ಹೆಚ್ಚಿಸುತ್ತದೆ. ಗಣೇಶ ಮುದ್ರೆಯು ಬೆಂಕಿಯ ಅಂಶದೊಂದಿಗೆ ಸಂಪರ್ಕ ಹೊಂದಿದೆ ಮತ್ತು ಆ ಮೂಲಕ ಚಯಾಪಚಯ ಮತ್ತು ಜೀರ್ಣಕ್ರಿಯೆಯನ್ನು ಉತ್ತೇಜಿಸುವಲ್ಲಿ ಸಹಕಾರಿಯಾಗಿದೆ. ಈ ಮುದ್ರೆಯು ಆತ್ಮವಿಶ್ವಾಸವನ್ನು ಹೆಚ್ಚಿಸಲು ಮತ್ತು ಒತ್ತಡವನ್ನು ನಿವಾರಿಸುವಲ್ಲಿ ಪರಿಣಾಮಕಾರಿಯಾಗಿದೆ.
ಗಣೇಶ ದೇವರ ಹೆಸರನ್ನು ಹೊಂದಿರುವ ಈ ಮುದ್ರೆಯು ಆತ್ಮ ಸಾಕ್ಷಾತ್ಕಾರಕ್ಕೆ ಸಹಾಯವಾಗುವ ಮುದ್ರೆಯಾಗಿದೆ. ಸಂಕಲ್ಪ ಸಿದ್ಧಿಯಾಗಲು ಈ ಮುದ್ರೆ ಸಹಕಾರಿ. ಎಲ್ಲಾ ಕಾರ್ಯಗಳಲ್ಲಿ ನಿರ್ವಿಘ್ನವಾಗಿ ನೆರವೇರಲಿ, ಯಾವುದೇ ರೀತಿಯ ಅಡಚಣೆ ಬಾರದಿರಲಿ ಎಂದು ಪ್ರಥಮವಾಗಿ ಗಣೇಶ ದೇವರ ಸ್ಮರಣೆ ಮಾಡುವ ಹಾಗೆಯೇ ಈ ಮುದ್ರೆಯೂ ಆಗಿದೆ. ಗಣೇಶ ಅಥವಾ ಗಣಪ ಮುದ್ರೆಯ ಅಭ್ಯಾಸದಿಂದ ಪೃಥ್ವಿ, ಜಲ, ಅಗ್ನಿ, ವಾಯು, ಆಕಾಶ- ಈ ಐದೂ ಮೂಲಭೂತ ತತ್ವಗಳ ಶಕ್ತಿಗಳು ಸಮ್ಮಿಲನಗೊಂಡು ಆ ಮೂಲಕ ಮೈ-ಮನಗಳನ್ನು ಸದೃಢಗೊಳಿಸುತ್ತದೆ. ಈ ಮುದ್ರೆಯ ಬಳಿಕ ಒಂದೆರಡು ನಿಮಿಷಗಳ ಕಾಲ ಮೌನವಾಗಿ ಧ್ಯಾನಸ್ಥಿತಿಯಲ್ಲಿ ಕುಳಿತರೆ ಮನಸ್ಸಿನ ಒತ್ತಡ ನಿವಾರಣೆಯಾದ ನಿರಾಳತೆ ಉಂಟಾಗುತ್ತದೆ.
ವಿಧಾನ: ಎಡಗೈ ಹಸ್ತವನ್ನು ಬೆರಳುಗಳು ಮಡಚಿದ ಸ್ಥಿತಿಯಲ್ಲಿ ಹೊರಮುಖವಾಗಿ ಎದೆಯ ಮುಂದೆ ಇರಿಸಿ. ಬಲಗೈ ಬೆರಳುಗಳನ್ನು, ಎಡಗೈ ಬೆರಳುಗಳಿಗೆ ಕೊಕ್ಕೆಯ ಹಾಗೆ ಬೆಸೆಯಬೇಕು. ಉಸಿರನ್ನು ಹೊರಹಾಕಿ (ರೇಚಕ ಮಾಡಿ) ಎರಡೂ ಕೈಗಳನ್ನು ವಿರುದ್ಧ ದಿಕ್ಕಿನಲ್ಲಿ ಎಳೆಯಬೇಕು. ಹಿಡಿತದ ಬಿಗಿತವನ್ನು ಸಡಿಲಗೊಳಿಸಬಾರದು. ಅನಂತರ ಉಸಿರನ್ನು ಒಳಗೆ ತೆಗೆದುಕೊಳ್ಳಬೇಕು (ಪೂರಕ ಮಾಡಬೇಕು).
ಈ ರೀತಿ ಆರು ಸಾರಿ ಪುನರಾವರ್ತಿಸಬೇಕು. ಬಳಿಕ ಎರಡೂ ಕೈಗಳನ್ನು ಎದೆಗೂಡಿನ ಮೇಲಿರಿಸಿ. ಇದೇ ರೀತಿ ಕೈಗಳನ್ನು ಬದಲಾಯಿಸಿಯೂ ಅಭ್ಯಾಸ ಮಾಡಬೇಕು. (ಆರು ಬಾರಿ ಪುನರಾವರ್ತಿಸಬೇಕು) ಗಣೇಶ ಮುದ್ರೆ -ಗಣಪ ಮುದ್ರೆ ಮಾಡುವಾಗ ‘ಓಂ ಗಂ ಗಣಪತಯೇ ಸ್ವಾಹಾ’ ಎಂಬ ಮಂತ್ರವನ್ನು ಸುಮಾರು 10 ನಿಮಿಷ ಪಠಿಸಿ.
ಪ್ರಯೋಜನ: ನಿಮ್ಮ ಭುಜಗಳು ಮತ್ತು ನಿಮ್ಮ ಮೇಲಿನ ತೋಳುಗಳಲ್ಲಿ ಮತ್ತು ಸುತ್ತಲಿನ ಪ್ರದೇಶ ಇದರಿಂದ ಸಕ್ರಿಯಗೊಳ್ಳುವುದು ನಿಮ್ಮ ಅನುಭವಕ್ಕೆ ಬರುತ್ತದೆ. ಮೂಲಭೂತವಾಗಿ ಭೌತಿಕ ಮಟ್ಟದಲ್ಲಿ ಆ ನಿರ್ದಿಷ್ಟ ಪ್ರದೇಶಗಳನ್ನು ಆವರಿಸಲು ಮತ್ತು ಬಲಪಡಿಸಲು ಪೂರಕವಾಗುತ್ತದೆ. ಅದು ನಮ್ಮ ಭಂಗಿಯ ತಪ್ಪು ಜೋಡಣೆಯಿಂದಾಗಿ ದುರ್ಬಲಗೊಳ್ಳುತ್ತದೆ. ಗಣೇಶ ಮುದ್ರೆಯು ಅನಾಹತಾ (ಹೃದಯ) ಚಕ್ರವನ್ನು ಸಕ್ರಿಯಗೊಳಿಸುತ್ತದೆ ಮತ್ತು ಉಷ್ಣತೆ ಮತ್ತು ಪ್ರೀತಿಯಿಂದ ಅದು ವಿಕಸನಗೊಳ್ಳಲು ಸಹಾಯ ಮಾಡುತ್ತದೆ. ಹೃದಯದ ಸ್ನಾಯುಗಳಿಗೆ ಉತ್ತಮ ಮಸಾಜ್ ಸಿಗುತ್ತದೆ. ಕೊಲೆಸ್ಟ್ರಾಲ್ ಅಡೆತಡೆಗಳು, ಖಿನ್ನತೆ ಮುಂತಾದ ಹೃದಯ ಪ್ರದೇಶಕ್ಕೆ ಸಂಬಂಧಿಸಿದ ಯಾವುದೇ ಸಮಸ್ಯೆಗಳ ನಿವಾರಣೆಯನ್ನು ಅನುಭವಿಸಬಹುದು. ಸಂಕಲ್ಪ ಸಿದ್ಧಿಯಾಗಲು ಈ ಮುದ್ರೆ ಸಹಕಾರಿಯಾಗುತ್ತದೆ. ಆಜ್ಞಾಚಕ್ರವನ್ನು ಉದ್ದೀಪಿಸಿ ಧೈರ್ಯ-ಸ್ಥೈರ್ಯವನ್ನು ಉಂಟುಮಾಡುತ್ತದೆ. ಸಹಿಷ್ಣುತೆ, ಸೌಹಾರ್ದ, ಹೊಂದಾಣಿಕೆಯ ಗುಣಗಳನ್ನು ಬೆಳೆಸುತ್ತದೆ.
ಮುನ್ನೆಚ್ಚರಿಕೆ : ನಿಮ್ಮ ಉಸಿರನ್ನು ಹಿಡಿದಿಟ್ಟುಕೊಳ್ಳಬೇಡಿ, ನಿಮ್ಮ ತಲೆಯನ್ನು ಮುಂದಕ್ಕೆ ತಳ್ಳುವ ಮೂಲಕ ನಿಮ್ಮ ಕುತ್ತಿಗೆಯನ್ನು ತಗ್ಗಿಸಬೇಡಿ.
( ಪ್ರತಿಕ್ರಿಯೆ: vvsudina@gmail.com )